Dyondzo 2
Xikolo Xa Vutirheli Bya Le Tilweni Xa Pfuna
1-5. I vuleteri byihi lebyi xikolo xa vutirheli xi byi nyikelaka ku hi pfuna eku tirheleni ka hina Xikwembu?
1 Xana Yehova u hi leterisa ku yini tanihi malandza ya yena leswaku hi humelela evutirhelini? Swi endliwa hi ku tirhisa nhlengeletano ya yena. Ematikweni yo tala vuleteri byi sungula hi vuswikoti bya xisekelo byo dyondza ku hlaya. Eka lava va dyondzeke ku hlaya ni ku tsala, goza leri landzelaka i ku tsarisa eka Xikolo xa Vutirheli bya le Tilweni.
2 Xikolo lexi xi nyikela vuleteri bya mahala bya vutirheli. Xi pfuna bandlha hi tindlela timbirhi: (1) Xichudeni xin’wana ni xin’wana xi nyikiwa nongonoko wa dyondzo leyi yi xi pfunaka ku antswisa vuswikoti byo hlengeleta rungula, ku ri ndlandlamuxa ni ku ri nyikela eka van’wana hi ndlela leyi twisisekaka; naswona (2) bandlha hinkwaro ri kuma rungula ra ntikelo swinene hi nkarhi wa nongonoko wa vhiki na vhiki. Ku twisisa loku antswisiweke ka swilo swa moya ni ntirho wa vutirheli, swi ta va kona hakunene.
3 Nongonoko etikweni rin’wana ni rin’wana wu lunghiseleriwa hi hofisi ya rhavi ya Sosayiti ya Watch Tower naswona xiyimiso xa lembe na lembe xa nyikeriwa. Kavula, nongonoko wu titshege etibukwini leti nga kona hi ririmi kumbe tindzimi ta tiko rero. Ngopfu-ngopfu wu titshege hi Bibele.
4 Tinkulumo to tala leti pfunaka ta nyikeriwa hi swichudeni vhiki rin’wana ni rin’wana. Nkulumo-nkulu yi vuriwa nkulumo yo laya naswona yi lehe ku tlula letin’wana hi mpimo wo karhi. Yi averiwa makwerhu wa xinuna la fanelekaka, leswaku bandlha ri ta kuma mpfuno lowu taleke eka yona. Tinkulumo letin’wana ti komile naswona ti nga averiwa eka wanuna kumbe eka wansati hi laha xiyimiso xa xikolo xi nga ha kombisaka ha kona. Yin’wana ya tinkulumo to koma ta swichudeni, swi titshege hi xiyimiso xa kwalaho, yi nga va ku hlaya ka Bibele. Tinkulumo letin’wana ti ta ndlandlamuxa tinhloko-mhaka leti averiweke ivi kumbexana ti endliwa ti fanela ndhawu ya kwalaho, loko swi fanela eka mhaka yoleyo. Swiavelo leswi tameriwaka hi vamakwerhu va xisati hakanyingi swi ta va ni swivumbeko swa rungula ra le vutirhelini bya yindlu hi yindlu, kumbexana bulo eka riendzo ro vuyela kumbe endzhaku ka dyondzo ya Bibele, loko ku nyikeriwa vumbhoni bya xitshuketa, kumbe ku vulavurisana ni swirho swa ndyangu wa wena kumbe muhuweleri un’wana.
5 Emabandlheni lamatsongo lama vumbiweke hi vavasati ntsena, mhaka hinkwayo yi nga ha hlanganisiwa. Hi ndlela yihi ke? Hi ku kanerisana tanihi ntlawa, bulo exikarhi ka vamakwerhu vambirhi va xisati, swivutiso ni tinhlamulo kumbe ku hlaya rungula leri kandziyisiweke ntsena.
6. I timfanelo tihi leti ti lavekaka eka mulanguteri wa xikolo?
6 Mulanguteri wa xikolo. Mulanguteri wa Xikolo xa Vutirheli bya le Tilweni wa hlawuriwa eka bandlha rin’wana ni rin’wana. U fanele ku va mudyondzisi la fanelekaka. U fanele ku va ni vutivi lebyinene bya ntiyiso wa Bibele ni vutivi lebyi tirhaka swinene bya ririmi ra swo tala swa swichudeni swa yena. U fanele ku va ni vuxiyaxiya ni ku va ni musa. Hi tlhelo ra moya, u fanele ku va “nkulukumba.” I ntirho wa yena ku ku tsarisa tanihi xichudeni, a ku avela tinkulumo ni ku ku nyika ndzayo ya tintswalo ni leyi akaka.
7. I timhaka tihi leti xiyiwaka loko ku averiwa tinkulumo?
7 Mulanguteri wa xikolo u hlayisa rhekhodo ya lava va tsariseke, ngopfu-ngopfu hi xikongomelo xo endla swiavelo. Swiavelo leswi swa tinkulumo hi ntolovelo swi nyikeriwa ka ha sele kwalomu ka mavhiki manharhu hi ku tsala. Leswi swi ku nyika nkarhi wo kambisisa ni ku lunghiselela mhaka leyi nga ta nyikeriwa. Mulanguteri wa xikolo wa swi xiya leswaku ebandlheni ku ni vanhu va swiyimo swo hambana-hambana hi dyondzo, kutani u endla swiavelo a ri ni leswi emianakanyweni. U ringeta leswaku a nga nyiki xichudeni xin’wana ni xin’wana lexitsongo nhloko-mhaka leyi nga fanelangiki munhu lontsongo. U lava ku nyika nkarhi lowu ringanaka eka xichudeni xin’wana ni xin’wana lexi tsariseke ku hlanganyela enongonokweni.
8. Ha yini swivulavuri leswi nga swichudeni swi nyikeriwa mfungho wo tsundzuxa loko nkarhi wa swona wu herile?
8 Kavula, loko xikolo xi khomiwa, xi fanele xi hlayisiwa xi fambisana ni xiyimiso. Kutani ke, loko tinkulumo ta swichudeni ti hundza nkarhi, mulanguteri wa xikolo kumbe loyi a n’wi pfunaka u ta nyika mfungho wa xitsundzuxo. Xichudeni xi nga ha hetisa xivulwa lexi xi xi sunguleke naswona endzhaku ka sweswo xi fanele xi suka eplatifomo.
9-12. Mulanguteri wa xikolo u kombisa ku khathalela ka yena nhluvuko wa lava va nyikelaka tinkulumo kun’we ni hinkwavo lava nga ebandlheni hi tindlela tihi?
9 Mulanguteri wa xikolo u laya xichudeni xin’wana ni xin’wana, bandlha hinkwaro ri ri karhi ri swi twa, hikuva, handle ka xivulavuri lexi xa ha ku hetaka, van’wana va nga pfuneka eka swona. Ku bumabumela hi minkarhi hinkwayo swa laveka. Entiyisweni, mulayi u ta chivirikela ku ku khutaza. Ndzayo leyi akaka yi ta nyikeriwa hi ku tirhisa tinhla leti kongomeke leti xaxametiweke exiphephanini xa Ndzayo ya Nkulumo, tinhla leti u komberiweke ku tirhela eka tona. (Vona vuxokoxoko eka Dyondzo 20.) Mulanguteri wa xikolo u ta endla matshalatshala yo tolovelana swinene ni swilaveko swa wena tanihi xichudeni, naswona u ta khathalela swinene nhluvuko wa wena.
10 Nakambe u gingiritekela ku endla nongonoko wun’wana ni wun’wana wa xikolo wu va nkateko eka hinkwavo lava nga ebandlheni. U ta ku khutaza ku hlanganyela ku fikela eka mpimo lowu u wu kotaka, ku nyikela tinhlamuselo hi nkarhi wa mpfuxeto wa bulo wa nkarhi na nkarhi ni ku hlanganyela eka mpfuxeto wo tsala lowu tolovelekeke. Loko u nga si tsarisa, u ta ku khutaza ku endla tano, a ku pfuna eka swiphiqo swa wena ni ku ku kombisa ndlela leyi na wena u nga vaka mudzunisi loyi a humelelaka wa Yehova ha yona.
11 Mulanguteri wa Xikolo xa Vutirheli bya le Tilweni nakambe u ni lunghelo ro ku pfuna tanihi xichudeni lexi tsariseke loko u lava mpfuno eka swiavelo swa wena, a ku endzela ekaya ra wena loko swi koteka. Loko ku nga ri na nkarhi lowu aneleke wo endla leswi, u ta kombela vamakwerhu lava vupfeke ni swivulavuri leswi nga ni ntokoto leswaku swi n’wi pfuna. Na n’wina vatswari mi nga pfuna swinene hi ku nyikela mpfuno wo tano eka vana va n’wina vini, hayi ku va lunghiselela tinkulumo, kambe ku nyikela swiringanyeto ni vukongomisi loko swi ta eka ndzavisiso ni ku lunghiselela loku faneleke. Loko u letela muhuweleri lontshwa evutirhelini bya nsimu, u nga ha komberiwa ku pfuna munhu wo tano la fanaka ku lunghiselela swiavelo swa yena exikolweni xa vutirheli.
12 Layiburari ya Xikolo xa Vutirheli bya le Tilweni eHolweni ya Mfumo yi le hansi ka vukongomisi bya mulanguteri wa xikolo. U ta endla leswi a nga swi kotaka ku kombisa vanhu lavantshwa ndlela leyi va nga tipfunaka ha yona eka vuhlayiselo bya yona bya vutivi bya Bibele. U fanele a endla matshalatshala ya leswaku tibuku ta sweswinyana ta Sosayiti, kun’we ni tibuku tin’wana leti pfunaka to endla ndzavisiso eka tona leti nga etixelufini, ti kumeka eka swichudeni ni van’wana.
13-17. Xana nhluvuko lowu endliwaka hi swichudeni wu vonaka njhani hi ku olova eka van’wana?
13 Mimbuyelo ya swichudeni. Loko u nyikiwe xiavelo exikolweni, xi amukele hi mandla mambirhi tanihi lexi taka eka wena hi ku tirhisa nhlengeletano ya Yehova. Hi ku fanana, amukela ni ku tirhisa ndzayo leyi nyikeriwaka hi ku titsongahata lokukulu. Swiringanyeto leswi u nyikiwaka swona hi mulayi swi nga tirhisiwa eku vulavuleni ka wena ka siku na siku ni le vutirhelini bya wena. Hi ku endla matshalatshala yo dyondza ni ku tirhisa rungula leri nyikeriwaka exikolweni lexi, u ta vuyeriwa swinene.
14 Lava va vaka kona ni ku hlanganyela nkarhi na nkarhi enongonokweni wa xikolo va kuma leswaku tinhlamuselo ta vona eminhlanganweni ta antswisiwa swinene, naswona ku hlanganyela ka vona evutirhelini bya nsimu ka humelela swinene. Naswona xikolo xi hlomisela swichudeni swa xinuna ku lunghiselela ni ku nyikela tinkulumo leti ti nyanyulaka ni ku khutaza vayingiseri, hambi swi fambisa swiyenge eminongonokweni ya nhlangano wa ntirho kumbe ku nyikela tinkulumo ta le rivaleni. Hikwalaho ka vuleteri bya Xikolo xa Vutirheli bya le Tilweni, vo tala va swi kotile ku nyikela nsirhelelo lowunene emahlweni ka tihuvo ni vafumi, kasi van’wana va vulavule ni mintlawa ya xikolo kumbe ya vanhu.
15 Nakambe xichudeni xi ta kuma leswaku mikhuva ya ku vulavula loku nga engatini, loku nga pfuniki nchumu, yi ta hela hi ku famba ka nkarhi loko xi tirhisa ndzayo leyi kumiwaka etinkulumeni ta swichudeni, eku vulavuleni ni le ku buleni ka xona ka siku rin’wana ni rin’wana. Hambi hi ri exivandleni xa ntirho wo tihanyisa, eswikolweni swa tiko kumbe kun’wana, ndzetelo wa hina tanihi Timbhoni ta Yehova hi ku hatlisa wu va lowu vonakaka eka vahlaleri. Hi laha magazini wun’wana lowu tivekaka swinene wu phofuleke ha kona: “Hi tin’hweti ti nga ri tingani, Timbhoni letintshwa ti dyondza Bibele hi matimba ku tlula ndlela leyi Vakriste vo tala va dyondzaka ha yona evuton’wini bya vona hinkwabyo. Naswona a hi xiwelo leswi ku lava ku va hinkwavo ka vona va vaka swivulavuri leswi ntshunxekeke ni leswi letelekeke.”
16 I swinene leswaku un’wana ni un’wana wa hina ebandlheni a va ni pakani leswaku hi ta kota ku vona nhluvuko lowu hi wu endlaka evutirhelini. Tipakani to tano hakanyingi ti nga hlanganisiwa swinene ni mpimo wa nhluvuko lowu endliweke eka Xikolo xa Vutirheli bya le Tilweni. Hi xikombiso, xana u twa onge a wu tihlomiselanga ku tlhelela eka vanhu lava tsakelaka ni ku hlamula swivutiso swa vona? Xiphemu lexikulu xa rungula leri nyikeriwaka ni ku kombisiwa exikolweni, xi pfuna eka swona swiyimo leswi.
17 Leswaku ku kumiwa mpfuno lowukulu, xikolo a xi fanelanga ku xiyiwa tanihi dyondzo ya timinete ta makume-mune-ntlhanu ya vhiki na vhiki ntsena. Ku ri na sweswo, loko u ri xichudeni lexi tiyimiseleke, u fanele u va ni nongonoko wa dyondzo ya le kaya ni ku lunghiselela, ku katsa ni ku hlaya Bibele ni vulavisisi byin’wana lebyi faneleke. Hinkwerhu ka hina lava hi vaka kona eminongonokweni ya xikolo hi ta kuma vutivi ni vuswikoti tanihi vatirheli va Yehova loko hi lunghiselela dyondzo ya vhiki na vhiki ka ha ri emahlweni, ku nga ri swivulavuri leswi nga swichudeni ntsena.
18-20. Ha yini hi nga fanelanga hi pfumelela ku kayivela ka vuswikoti bya munhu hi xiyexe swi hi sivela ku hlanganyela hi xitalo exikolweni?
18 Hinkwavo va khutaziwa ku tikarhata, ngopfu-ngopfu ku tsundzuka xikongomelo xa xikolo. A hi ku bombisa vuswikoti bya ku vulavula. Naswona a hi ku kombisa ku tsana ni ku nonon’hweriwa ka van’wana. Entiyisweni, ndlela leyi hi tekaka mintirho ya xikolo ha yona hakanyingi yi ta lawula mpimo lowu hi nga ta vuyeriwa ha wona. I xiphemu xa fambiselo ra Yehova ro dyondzisa. Wa hi dyondzisa ni ku hi letela leswaku hi hetisisa xikongomelo xa yena. Xichudeni xihi na xihi a xi fanelanga xi karhateka hi nkucetelo lowu xi nga na wona, hikuva a hi ringeti ku tsakisa vanhu kumbe ku tixaxameta ni mimpimanyeto hinkwayo ya vanhu yo dyondzisa ni ku vulavula. Hi lava ku amukeriwa hi Xikwembu ni ku kuma nkateko wa xona entirhweni wa hina wa vutirheli.
19 I ntiyiso, vamakwerhu van’wana va xinuna ni va xisati va nga ha titwa hi laha Muxe a titweke ha kona loko a vule leswi eka Yehova: “A ndzi munhu la tivaka ku vulavula swinene, hambi ku ri tolo, ne tolweni.” (Eks. 4:10) Kambe loko u ri ni ripfumelo ra leswaku ku hava lexi nga kotekiki eka Xikwembu, u ta wu hlula ntlhaveko wolowo. (Mat. 19:26) Nakambe, tsundzuka leswaku ku antswisa vuswikoti bya wena byo vulavula Rito ra vutomi hi ndlela yo karhi, i ka nkoka swinene. Hambi ku ri ku antswisa lokutsongo ku nga yisa un’wana egondzweni ra vutomi, naswona xana sweswo a swi nga ta tsakisa ke?
20 Xikongomelo-nkulu xa Xikolo xa Vutirheli bya le Tilweni i ku letela ntirho wa vutirheli. Onge u nga va un’wana wa vunyingi lebyi nkarhi na nkarhi byi vaka kona eka xona ni ku lava mimbuyelo ya xona, ivi u vona nkateko wa Yehova ehenhla ka matshalatshala ya wena yo endla nhluvuko.—Vafil. 3:16.