Ku Gandzela Vakokwana

Nhlamuselo: I mukhuva wo fundzha ni ku xixima vakokwana lava feke (hi xiendlo xo karhi kumbe hi ndlela yin’wana) hi ku tshemba leswaku va hanya eka xivandla lexi nga vonakiki naswona va nga kota ku pfuna kumbe va tisa khombo eka lava hanyaka, kutani va fanele va tsakisiwa. A hi dyondzo ya Bibele.

Xana vakokwana lava feke va swi vona swilo leswi endliwaka hi lava hanyaka naswona xana vakokwana lava va swi kota ku pfuna vanhu lava hanyaka?

Ekl. 9:5: “La’v̌a hanyaka v̌a ŝi tiv̌a leŝaku v̌a ta fa, kambe v̌afi a v̌a tiv̌i ntšhumu.”

Yobo 14:10, 21, NW: “Munhu wa laha misaveni wa hela, naswona u kwihi xana? Vana vakwe va xiximiwa, kambe a nga swi tivi.”

Ps. 49:10, 17-19: “La’v̌o tlhariha v̌a fa, na ŝona ŝihunguki ni ŝiphukuphuku ŝi fa na ŝona, v̌a siyela v̌aṅwana e rifuwo ra v̌ona. . . . Siku a nga ta fa, a nga ka a nga teki ntšhumu wa ŝona, ku kwetsima ka yena ku nga ka ku nga šikeli nḍaku ka yena. . . . U ta šikela rišakeni ra v̌atata wa wena. La’v̌a nga ha tiki v̌ona ku v̌onakala, ni siku riṅwe.”

Xana a hi ntiyiso leswaku swakudya leswi vekiweke ealtarini kumbe esirheni a swi khumbiwi hi munhu? Xana leswi a swi kombisi leswaku vafi a swi va pfuni nchumu?

Vona ni xihloko-nkulu lexi nge “Vungoma.”

Xana xi kona xivangelo xo chava leswaku vakokwana wa hina lava feke va nga hi tisela khombo?

Ekl. 9:5, 6: “Kambe vafi . . . riranḍu ra v̌ona, ni ku v̌enga ka v̌ona, ni mona wa v̌ona ŝi lahlekile, a v̌a ha ri na ku av̌eriwa ka hikwaŝo le’ŝi endliwaka e hansi ka dyambu ni siku riṅwe.”

Xana ku ni xiphemu xa munhu xa moya lexi ponaka rifu ra miri?

Ezek. 18:4, NW: “Vonani! Mimoya-xiviri hinkwayo—i ya mina. Moya-xiviri wa tatana ni moya-xiviri wa n’wana—i ya mina. Moya-xiviri lowu dyohaka—hi wona lowu nga ta fa.” (Ni ndzimana 20)

Ps. 146:3, 4: “Mi nga tiṭhembeleni tihosi, hambi v̌a ri v̌ana v̌a v̌anhu . . . Ku hefemula ka v̌ona loko ku hela, v̌a tlhelela e nṭhurini; kutani hi siku rolero makungu ya v̌ona ma ta hela.”

Vativi va sayense ni vativi va vuhandzuri a va kumanga nchumu lexi hanyaka, xiphemu xo karhi lexi hanyaka, lexi salaka xi hanya loko miri wu fa.

Vona ni matluka 224-6, ehansi ka xihloko lexi nge “Rifu.”

Xana a wu ta tsakela leswaku vana va wena ni vatukulu va wena va ku xixima ni ku ku rhandza loko wa ha hanya kumbe va ku phahla esirheni ra wena loko u file?

Ef. 6:2, 3: “‘U va ni xichavo eka tata wa wena ni ka mana wa wena’ hi wona nawu lowo rhanga lowu nga ni xitshembiso, ‘leswaku u kateka, ni leswaku u hanya masiku layo tala emisaveni leyi.’” (Vana lava leteriweke hi misinya ya milawu ya Bibele va kombisa xichavo xo tano lexi tsakisaka timbilu ta vatswari va vona loko va ha hanya.)

Swiv. 23:22: “Yingisa tata wa wena l’a ku v̌elekeke, u nga monyi mana wa wena loko a dyuharile.”

1 Tim. 5:4: “Loko wansati wa noni a ri ni vana kumbe vatukulu, a va rhange va dyondza tifanelo ta vona ta vukhongeri hi tlhelo ra ndyangu wa ka vona, va endla swin’wana ku nkhensa vatswari va vona, hikuva hi swona leswi amukelekaka emahlweni ka Xikwembu.”

Loko vangoma va vula leswaku va nyikela marungula lama humaka eka vafi, xana kahle-kahle ma huma kwihi?

Esa. 8:19: “Loko v̌a nga ku ka ṅwina: V̌utisisani la’v̌a humesaka mimoya ya v̌afi, ni v̌abvumbi la’v̌a hlev̌etelaka, la’v̌a ṅunuṅutaka, mi ta ku: Šana tiko a ri faneli ku v̌utisa Šikwembu ša rona šana? Šana ku nga v̌utisiwa v̌afi e timhaka ta la’v̌a hanyaka šana?” (Xana Xikwembu a xi ta hi tsundzuxa eka mukhuva wo tano loko hakunene a wu hi pfuna ku vulavula ni varhandziwa va hina?)

Mint. 16:16: “Loko hi ya endhawini yo khongela ka yona, hi hlangana ni wanhwana loyi a a ri hlonga, loyi a a ri ni moya wa vungoma, [demona, NW], a fumisa vini va yena hi ku vhumbha.”

Nakambe vona matluka 354-6, ehansi ka xihloko lexi nge “Vungoma.”

Xana hi fanele hi gandzela mani?

Lk. 4:8: “Yesu a n’wi hlamula, a ku: ‘Ku tsariwile va te: “U ta nkhinsamela [Yehovha], Xikwembu xa wena, u gandzela xona ntsena.”’”

Yoh. 4:23, 24: “Nkarhi wa ta, ni sweswi wu tile, lowu vagandzeri va xiviri va nga ta gandzela Tatana hi moya ni ntiyiso, hikuva Tatana ú lava vagandzeri lavo tano. Xikwembu i moya; kutani lava xi gandzelaka, va fanele ku xi gandzela hi moya ni ntiyiso.”

Hi wihi ntshembo lowu nga kona wa ku hlanganisiwa ka swirho swa ndyangu enkarhini lowu taka, ku katsa ni lava feke?

Yoh. 5:28, 29: “Mi nga hlamaleni hi mhaka leyi, hikuva nkarhi wa ta lowu hinkwavo lava nge masirheni va nga ta twa rito ra yena, kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”