Wa Tsundzuka Xana?

Xana minkandziyiso ya sweswinyana ya Xihondzo xo Rindza a yi ri ya risima eka wena? Kutani ha yini u nga kambeli mianakanyo ya wena hi swivutiso leswi landzelaka:

◻ Hi swihi swivutiso swimbirhi leswi pfuneke Vakreste vo tala lava langutaneke ni ku endla swiboho swo karhi malunghana ni ntirho, leswaku va fikelela xiboho xa munhu hi xiyexe?

Xivutiso xo sungula xa nkoka hi lexi nge: Xana ntirho wolowo hi lowu soriwaka hi Bibele? Xivutiso xa vumbirhi xi ri: Xana ku endla ntirho wolowo swi ta ku vangela ku seketela xiendlo xo biha?—4/15, tluka 28.

◻ Xana ‘ntumbuluko wa vanhu wu vekiwe ehansi ka vuhava’ hi ndlela yihi? (Varhoma 8:20)

Hi “vekiwe ehansi ka vuhava” hikwalaho ka leswi vatswari va hina vo sungula, Adamu na Evha va swi endleke. A ku nga ri “hi ku rhandza ka hina” naswona a hi tihlawulelanga. Hi tswarisiwe sweswo. Hambileswi vatswari va hina vo sungula sweswi a va ta hundzisela ku nga hetiseki, ku nga xidyoho ni rifu, hi tintswalo Yehovha u va pfumelerile leswaku va va ni vana. Rifu ri tlulele vanhu hinkwavo, hikwalaho ka sweswo, Xikwembu xi ‘veke ntumbuluko ehansi ka vuhava.’—5/1, tluka 5.

◻ Ha yini swi twala ku vula leswaku “xilo xo nyenyetsa” xi ta ‘yima endhawini yo kwetsima’ enkarhini lowa ha taka? (Matewu 24:15)

Eku sunguleni, ‘xilo xo nyenyetsa lexi yimeke endhawini yo kwetsima’ a xi fambisana ni nhlaselo wa Varhoma lava rhangeriweke hi Ndhuna Gallus hi 66 C.E. Leswi namuntlha swi fanekiselaka nhlaselo wolowo—ku nga ku sungula ka “nhlomulo lowukulu”—swa ha ta. (Matewu 24:21) Kutani “xilo xo nyenyetsa lexi onhetelaka,” xa ha ta yima endhawini yo kwetsima enkarhini lowu taka.—5/1, matluka 16, 17.

◻ Xana tatana na manana lava tirhaka va nga wu kuma njhani nkarhi wo va ni vana va vona?

Manana loyi a titwaka a karhele loko a vuya entirhweni, a nga kombela vana va yena leswaku va n’wi pfuna ku lunghiselela swakudya. Tatana la nga ni swilo swo tala leswi a faneleke a swi endla hi mahelo-vhiki, a nga endla swin’wana swa swona ni vana va yena.—5/15, tluka 6.

◻ Lava va ‘fambaka endleleni ya Yehovha’ va fanele va endla yini? (Yeremiya 7:23)

Ku famba endleleni ya Yehovha swi lava vutshembeki—ku tiyimisela ku tirhela yena ntsena. Swi lava ntshembo—ku pfumela hi mbilu hinkwayo leswaku switshembiso swa Yehovha swi tiyile naswona swi ta hetiseka. Ku famba endleleni ya Yehovha swi lava ku yingisa—ku landzela milawu yakwe u nga hambuki, ni ku hlayisa mimpimanyeto ya yena leyi tlakukeke. (Pisalema 11:7)—5/15, tluka 14.

◻ Hi yihi mintirho ya mune ya nkoka leyi “tinyiko leti nga vanhu” ti nga yi hetisisaka? (Vaefesa 4:8)

Ti nga hi ololoxa hi musa lowukulu, ti hi aka hi rirhandzu, ti kondletela vun’we bya hina evandlheni ni ku hi sirhelela hi xivindzi. (Vaefesa 4:12-14)—6/1, tluka 14.

◻ Hi nga dyondza yini eka xinakulobye lexi Pawulo a a ri na xona ni vanhu va kwalomu ka dzana lava boxiwaka eka Mintirho ni le ka mapapila ya yena?

Minkarhi hinkwayo hi fanele hi tirhisana ni nhlengeletano ya Xikwembu ni vandlha ra ka hina swin’we ni vapfumeri-kulorhi. Ha wu lava mpfuno, nseketelo ni nchavelelo wa vona loko swilo swi famba kahle ni loko swi nga fambi kahle.—6/1, tluka 31.

◻ Hi tihi tinhla tinharhu, leti ti nga ha tirhisiwaka ku pfuna van’wana leswaku va anakanya hi Muvumbi?

I nhleleko lowu nga kona evuakweni hinkwabyo, masungulo ya vutomi emisaveni, ni ku hlamarisa lokukulu ka byongo bya munhu swin’we ni vuswikoti bya byona byo hambana-hambana.—6/15, tluka 18.

◻ Hikwalaho ka yini swi ri swa nkoka swinene ku twisisa nhlamuselo ya vito ra Muvumbi?

Vito ra Xikwembu ri vula leswaku “Xi Endla Leswaku Swi Va Kona” naswona ri kandziyisa leswaku xa tiyimisela ku endla xo karhi, kutani xi swi endla. Loko hi tiva vito ra xona hi tlhela hi ri tirhisa, hi ta swi twisisa ku antswa leswaku xi hetisisa switshembiso ni swikongomelo swa xona hi ku hiseka.—6/15, tluka 21.

◻ Xana vana va nga katseka njhani edyondzweni ya Bibele ya ndyangu?

Loko swi koteka, endlani leswaku n’wana un’wana ni un’wana a va ni Bibele yakwe ni buku leyi dyondziwaka. N’wana lontsongo a nga ha komberiwa ku hlamusela xifaniso lexi fambisanaka ni rungula leri dyondziwaka, naswona la kulekenyana a nga ha averiwa ku hlaya tsalwa ro karhi ka ha ri emahlweni. N’wana lonkulu a nga averiwa ku kombisa leswaku rungula leri dyondziwaka ri tirha njhani hi xiviri eka swirho swa ndyangu.—7/1, tluka 15.

◻ Hi tihi tipakani tin’wana leti ndyangu wu nga ti katsaka loko ku lunghiseleriwa minhlangano ya vandlha?

(1) Un’wana ni un’wana endyangwini a a tiyimisele ku hlamula eminhlanganweni; (2) un’wana ni un’wana a a lwele ku hlamula hi marito yakwe; (3) a katsa matsalwa eka tinhlamulo takwe; naswona (4) a kambisisa rungula ku vona ndlela leyi a nga ri tirhisaka ha yona evuton’wini bya yena n’wini.—7/1, tluka 20.

◻ Hi xihi xilotlelo xa vukati lebyinene?

Xilotlelo xin’wana xa nkoka xo kuma ntsako evukatini i mbulavurisano lowunene. Leswi swi katsa ku phofula ndlela leyi hi titwaka ha yona ni leswi hi swi anakanyaka. Nakambe mbulavurisano lowunene wu katsa swilo leswi akaka, leswi phyuphyisaka, leswinene, leswi dzunekaka ni leswi chavelelaka. (Vaefesa 4:29-32; Vafilipiya 4:8)—7/15, tluka 21.

◻ ‘Ndlela ya Yehovha’ i yini? (Pisalema 25:8, 9, 12)

Ndlela yoleyo i ndlela ya rirhandzu. Yi sekeriwe eku endleni ka leswi lulameke hi ku ya hi mimpimanyeto ya Xikwembu. Ku kombisiwa ka rirhandzu leri, leri fambisanaka ni misinya ya milawu, Bibele yi ku vitana “ndlela leyi tlakukeke.” (1 Vakorinto 12:31)—8/1, tluka 12.