Pfuna Swichudeni Swa Bibele Leswaku Swi Va Vahuweleri Va Mahungu Lamanene Ya Mfumo
1 Ntirho lowu Yesu a wu leriseke vadyondzisiwa va yena, lowu tsariweke eka Matewu 28:19, 20, a wu ta va wukulu swinene. Vadyondzisiwa va Kreste a va lerisiwe ku endla vadyondzisiwa vo tala, lava na vona a va fanele va chumayela kutani va endla vadyondzisiwa van’wana. Wolawo a ku ri masungulo ya ntirho lowu wu faneleke wu endliwa emisaveni hinkwayo, wo chumayela mahungu lamanene ya Mfumo wa Xikwembu enkarhini lowu wo hlawuleka wa makumu, lowu hi hanyaka eka wona.—Mat. 24:14.
2 Swichudeni swa hina swa Bibele ku nga ha va vana va hina kumbe vanhu van’wana lava va swi tsakelaka ku dyondza na hina Bibele. Hi tiyimisele ku pfuna vanhu volavo leswaku un’wana ni un’wana wa vona a va ni vutihlamuleri byo pfuna van’wana leswaku va va vadyondzisiwa va Yesu Kreste.—Luka 6:40.
3 Va Pfune Leswaku Va Chumayela: Khutaza lava u dyondzaka na vona leswaku va byela van’wana leswi va swi dyondzaka. Va byele mintokoto leyi tsakisaka ya ntirho wa nsimu. Dyondzisa vana va wena va ha ri vatsongo leswaku va hlanganyela hi xitalo entirhweni wo chumayela hilaha va nga kotaka hakona. (Ps. 148:12, 13) Leswi u swi vulaka ni leswi u swi endlaka swi fanele swi kombisa leswaku ntirho wo chumayela i wa nkoka evuton’wini bya wena.—1 Tim. 1:12.
4 Yehovha u tirhisa ntsena lava amukelaka milawu ya yena yo lulama va tlhela va hanya hi yona. I ntiyiso leswaku vahuweleri lavantshwa a va tivi swo tala ku fana ni vahuweleri va Mfumo lava tinyiketeleke va tlhela va khuvuriwa naswona va ri ni ntokoto, kambe va fanele va kholwa tidyondzo ta xisekelo ta Bibele va tlhela va kota ku ti hlamusela. (Vona buku leyi nge Ku Hleleriwa, matl. 79-82.) Tanihi leswi va tihambaniseke ni “Babilona Lonkulu” naswona va nga ha hlanganyeliki eka tipolitiki, va fanele va va kona eka minhlangano hinkwayo ya vandlha.—Nhlav.18:2, 4; Yoh. 17:16; Hev. 10:24, 25.
5 Loko u swi vona leswaku un’wana wa swichudeni swa wena swa Bibele wa faneleka ku va muhuweleri la nga khuvuriwangiki, u fanele u vulavula ni mulanguteri la ungamelaka. U ta hlela leswaku vakulu vambirhi va hlangana na wena swin’we ni xichudeni xa wena xa Bibele, leswaku va ta vona loko xi faneleka ku va muhuweleri la nga khuvuriwangiki wa mahungu lamanene ya Mfumo. Loko xi faneleka u fanele u famba na xona ensin’wini leswaku u ta xi dyondzisa tindlela tin’wana to chumayela.