Xana Ndyangu Wa Wena Wu Tilunghiselela Ku Pona?

¹ Ku hetiseka ka vuprofeta bya Bibele i vumbhoni bya leswaku makumu ya misava leyi yo homboloka ma le kusuhi swinene. Sweswi hi hanya eminkarhini yo nonon’hwa leyi fanaka swinene ni liya ya le mahlweni ka Ndhambi. (Mat. 24:37-39) Nowa u pone ndzoviso wa nkarhi wolowo hileswi a a “famba ni Xikwembu xa ntiyiso.” (Gen. 6:9) Tanihi leswi ku poneke yena ni ndyangu wakwe, sweswo swi vula leswaku a a wu dyondzisile ndyangu wakwe tindlela ta Xikwembu. Xana hi nga n’wi tekelela njhani Nowa, kutani hi tilunghiselela ku pona tanihi ndyangu loko ku herisiwa mafambiselo lawa ya swilo yo homboloka?

² Muchumayeri Wa Leswo Lulama: Nowa u hete malembe ya kwalomu ka 40 ku ya eka 50 a ri “muchumayeri wa leswo lulama.” (2 Pet. 2:5) Vaakelani va yena a va n’wi hlekula hikwalaho ka rungula leri a a ri chumayela, ku nga khathariseki leswaku a va kuceteriwa hi tintsumi leti xandzukeke kumbe a va nga kuceteriwi hi tona. Minkarhi yo tala loko hi ri entirhweni wa hina wo chumayela hi hlangana ni vanhu lava nga tsakeriki kumbe lava hi hlekulaka, leswi kombaka leswaku makumu ya mafambiselo lawa ya swilo ya le kusuhi ni ku hela. (2 Pet. 3:3, 4) Hambiswiritano, ku hambana ni vanhu va le nkarhini wa Nowa, vo tala namuntlha va ma tlangela matshalatshala ya hina naswona va “khitikanela” evugandzerini bya Yehovha. (Esa. 2:2) Hi ta ‘tiponisa hina swin’we ni lava va hi yingisaka’ ntsendze loko hi tiyisela. (1 Tim. 4:16) Kutani swi fanerile leswaku vatswari va dyondzisa vana va vona leswaku i swa nkoka ku hisekela ntirho wo chumayela, naswona va va vekela xikombiso lexinene hi leswi va swi vulaka ni hi swiendlo! —2 Tim. 4:2.

³ “U Endle Tano”: Ku pona ka Nowa ni ndyangu wakwe a swi titshege hi ku va va landzela swiletelo swa Yehovha hi vukheta. (Gen. 6:22) Kutani i swa nkoka ni le ka hina namuntlha leswaku hi “tiyimisela ku yingisa” nkongomiso wa Bibele ni wa hlonga ro tshembeka. (Yak. 3:17) Ku ni vana van’wana lava se va kuleke lava tsundzukaka ndlela leyi tata wa vona a wu tirhiseke ha yona ndzetelo lowu a a wu kuma enhlengeletanweni ya Yehovha. Hi xikombiso, vhiki rin’wana ni rin’wana a a fambisa dyondzo ya le kaya ya Bibele, naswona hi mahelo-vhiki man’wana ni man’wana ndyangu hinkwawo a wu ya ensin’wini hilaha nhlengeletano yi khutazaka ha kona. A a endla matshalatshala yo tirha nsimu ni n’wana un’we vhiki rin’wana ni rin’wana. Ku tiyimisela ka yena ku ‘endla tano’ swi khutaze vana va yena, naswona vana vakwe va tsevu va kule va ri malandza yo tshembeka ya Yehovha.

⁴ Makumu ya mafambiselo lawa ma ta fika hi xitshuketa. (Luka 12:40) Loko hina swin’we ni mindyangu ya hina hi tekelela Nowa ni ku va ni ripfumelo, a swi kanakanisi leswaku hi ta va hi lunghekele ku pona!—Hev. 11:7.