Mahetelelo Lama Humelelaka

U NGA ha va u endle ndzavisiso wa vukheta u tlhela u hlela rungula ra nkulumo ya wena. Nakambe u nga ha va u lunghiselele xingheniso lexi pfuxaka ku tsakela. Kambe ka ha ri na xin’wana lexi lavekaka—mahetelelo lama humelelaka. U nga ma bi hi makatla. Leswi u swi vulaka emakumu hakanyingi hi swona swi tsundzukiwaka nkarhi wo leha. Loko mahetelelo ma nga nyawuli, ni swo tala leswi swi vuriweke emahlweni ka wona swi nga dzudzekeriwa hi ntikelo wa swona.

Xiya leswi landzelaka: Loko Yoxuwa a ri kusuhi ni ku fa, u nyikele nkulumo leyi nga rivalekiki eka vakulukumba va tiko ra Israyele. Endzhaku ko hlamusela ndlela leyi Yehovha a khomeke tiko ra Israyele ha yona ku sukela eminkarhini ya Abrahama, xana Yoxuwa u phindhe tinhla leti a ti vuleke eku sunguleni, a nyikela nkatsakanyo wa mhaka ntsena? Nikatsongo. Ku ri na sweswo, u khutaze vanhu hi matimba swinene a ku: “Chavani Yehovha mi n’wi tirhela hi ndlela leyi pfumalaka xihoxo ni ntiyiso.” Tihlayele mahetelelo ya Yoxuwa lama tsariweke eka Yoxuwa 24:14, 15.

Nkulumo yin’wana leyi dumeke, leyi kumekaka eka Mintirho 2:14-36, yi nyikeriwe hi muapostola Petro emahlweni ka ntshungu eYerusalema eNkhubyeni wa Pentekosta ya 33 C.E. Xo sungula, u hlamusele leswaku a va tivonela ku hetiseka ka vuprofeta bya Yuwele malunghana ni ku chuluriwa ka moya wa Xikwembu hi mahlo ya vona. Endzhaku, u kombise ndlela leyi sweswo swi hlanganaka ha yona ni vuprofeta byo vulavula hi Mesiya lebyi nga eka Tipisalema, lebyi profeteke ta ku pfuxiwa ka Yesu Kreste ni ku tlakuseriwa ka yena evokweni ra xinene ra Xikwembu. Kutani loko a gimeta, Petro u andlale mhaka-nkulu leyi un’wana ni un’wana wa vayingiseri vakwe a a fanele a langutana na yona. U te: “Hikokwalaho yindlu ya Israyele hinkwayo a yi tive hakunene leswaku Xikwembu xi n’wi endle Hosi ni Kreste, yena Yesu loyi mi n’wi beleleke.” Lava a va ri kona va vutisile va ku: “Vavanuna, vamakwerhu, xana hi fanele ku endla yini?” Petro u hlamule a ku: “Hundzukani, un’wana ni un’wana wa n’wina a khuvuriwa hi vito ra Yesu Kreste.” (Mint. 2:37, 38) Hi siku rero, vanhu va kwalomu ka 3 000 eka lava n’wi yingiseleke, va amukele ntiyiso malunghana na Yesu Kreste, hi ku susumetiwa hi leswi va swi tweke.

Tinhla Leti U Faneleke U Ti Tsundzuka. Leswi u swi vulaka emahetelelweni ya nkulumo ya wena swi fanele swi fambisana hi ku kongoma ni nhloko-mhaka ya yona. Swi fanele swi va mahetelelo lama twalaka ya tinhla-nkulu leti u ti ndlandlamuxeke. Hambileswi u nga rhandzaka ku katsa marito-nkulu yo karhi ya nhloko-mhaka ya wena, swi le ka wena ku phindha nhloko-mhaka ya wena hi ku kongoma.

Hi ntolovelo, xikongomelo xa nkulumo ya wena i ku khutaza van’wana leswaku va teka goza ro karhi hi ku tirhisa rungula leri u ri nyikelaka. Xin’wana xa swikongomelo-nkulu swa mahetelelo i ku va komba leswi va faneleke va endla swona. Loko u hlawule nhloko-mhaka ya wena ni tinhla-nkulu, xana u tivutisisile leswaku ha yini rungula ra kona ri ta va ra nkoka eka vayingiseri va wena ni pakani leyi u lavaka ku yi fikelela loko u nyikela rungula ra kona? Loko swi ri tano, u ta va u tiva goza leri u lavaka leswaku va ri teka. Kutani u fanele u hlamusela goza ra kona, kumbexana ni ndlela leyi va nga ri tekaka ha yona.

Ku tlhandlekela emhakeni ya ku komba vayingiseri va wena leswi va faneleke va endla swona, mahetelelo ya wena ma fanele ma khutaza. Ma fanele ma katsa ni swivangelo leswi twalaka swa ku teka goza, kun’we ni vuyelo lebyi nga vaka kona loko va endla tano. Loko xiga xo hetelela xi anakanyiwe kahle, xi tlhela xi vekiwa kahle, xi ta pfuneta leswaku nkulumo ya wena hinkwayo yi va leyi humelelaka.

Xalamuka loko nkulumo yi ya eku heleni. Leswi u swi vulaka swi fanele swi komba leswaku ya hela hakunene. Rivilo ra wena na rona ri fanele ri va leri faneleke. U nga vulavuli hi ku jaha enkulumeni hinkwayo kutani u fika u yi heta swi nga languteriwanga. Hi tlhelo lerin’wana, u nga tshiki mpfumawulo wa rito ra wena wu ya wu tsana. Rito ri fanele ri twala kahle, kambe ri nga tingi vayingiseri. Swiga swa wena swi nga ri swingani swo hetelela swi fanele swi twala leswaku u gimeta mhaka ya wena. U fanele u swi vula hi ku hiseka ni hi ku tiyiseka. Loko u lunghiselela ku nyikela nkulumo ya wena, u nga rivali ku titoloveta ndlela leyi u nga ta gimeta ha yona.

Xana mahetelelo ma fanele ma leha ku fikela kwihi? A wu kona nkarhi lowu vekiweke. Mahetelelo a ma fanelanga ma leha ngopfu. Loko ma lehe kahle swi ta vonaka hi ndlela leyi ma khumbaka vayingiseri ha yona. Minkarhi hinkwayo mahetelelo yo olova, lama kongomeke ni lama akaka ma tlangeriwa. Mahetelelo yo lehanyana lama lungiweke hi xifaniso xo koma na wona ma nga tirha kahle loko ma hleriwe hi vukheta. Teka mahetelelo yo koma ya buku hinkwayo ya Eklesiasta, lama kumekaka eka Eklesiasta 12:13, 14, u ma ringanisa ni ya Dyondzo ya le Ntshaveni leyi komeke swinene, lama tsariweke eka Matewu 7:24-27.

Entirhweni Wa Nsimu. A ku na kun’wana laha hi ntolovelo u nga ta boheka ku tirhisa mahetelelo ku tlula entirhweni wa nsimu. Loko u lunghiselerile naswona u khathala swinene hi vanhu, u nga humelela hakunene. Xitsundzuxo lexi nga eka matluka lama hundzeke xi nga humelela swinene ni loko u vulavula ni n’wini wa muti hi ku kongoma.

Bulo ra kona ri nga va leri komeke swinene. N’wini wa muti a nga va a khomekile. Hi minete yin’we ntsena u nga va u hete riendzo ra wena. Loko swi fanerile, u nga vula swin’wana swo fana ni leswi: “Ndza swi vona leswaku u khomekile. Kambe ndzi rhandza ku ku siya ni yinhla yin’we ntsena leyi khutazaka. Bibele yi komba leswaku Muvumbi wa hina u ni xikongomelo xo hlamarisa—xa ku hundzula misava leyi yi va ndhawu leyi vanhu va nga ta hanya eka yona hi masiku. Mina na wena hi nga va kona eParadeyisini yoleyo, kambe hi fanele hi dyondza leswi Xikwembu xi swi lavaka.” Kumbe u nga tshembisa ku tlhela u vuya hi nkarhi lowu nga ta n’wi pfumelela.

Loko riendzo ri kavanyeteka hileswi n’wini wa muti a nga riki na ntirhisano—kumbexana a kariha kunene—ni kwalaho wa ha ri na nkarhi wa ku endla leswinene. Tsundzuka ndzayo leyi kumekaka eka Matewu 10:12, 13 ni le ka Varhoma 12:17, 18. N’wangulo wa wena lowunene wu nga cinca vonelo rakwe hi Timbhoni ta Yehovha. U ta va u tirhile.

Hi hala tlhelo, u nga va u ve ni bulo lerinene na n’wini wa muti. Ha yini u nga tlheli u phindha yinhla-nkulu leyi u lavaka leswaku a yi tsundzuka? N’wi khutaze leswaku a endla swo karhi hi yinhla ya kona.

Loko swi vonaka onge mi nga ya emahlweni ni bulo ra n’wina enkarhini lowu taka, nyika munhu wa kona xivangelo xa ku va u swi langutele hi mahlo-ngati ku tlhela u vuya mi ta bula. Vutisa xivutiso—kumbexana lexi hlamuriweke ebukwini leyi nge Ku Hlamulana Hi Matsalwa kumbe buku yin’wana leyi lunghiseleriweke ku fambisa tidyondzo ta le kaya ta Bibele. U nga rivali pakani ya wena, leyi hlamuseriweke hi Yesu eka Matewu 28:19, 20.

Xana u gimeta dyondzo ya le kaya ya Bibele? Ku phindha nhloko-mhaka swi ta pfuna xichudeni leswaku xi tsundzuka leswi ku vulavuriweke ha swona. Ku tirhisa swivutiso swa mpfuxeto swi ta pfuna ku dzikisa tinhla-nkulu emianakanyweni ya xichudeni, ngopfu-ngopfu loko mpfuxeto wa kona wu nga endliwi hi ku jaha. Ku vutisa ndlela leyi rungula leri dyondziweke ri nga xi pfunaka ha yona xichudeni kumbe ndlela leyi xi nga ri hlamuselaka van’wana ha yona swi nga xi pfuna leswaku xi ehleketa hi tindlela ta xiviri leti xi nga swi tirhisaka ha yona leswi xi swi dyondzeke.—Swiv. 4:7.

Tsundzuka—mahetelelo ya wena hi wona ma endlaka leswaku nkulumo ya wena hinkwayo yi va leyi humelelaka.