Xi Tirhise Kun’wana Ni Kun’wana
1. Xana hi xihi xikongomelo xa xiphephana lexi nge Swivutiso Swa Nkoka Swinene?
1 Xiphephana lexi nge Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini? xi endleriwe ku hi pfuna leswaku hi sungula tidyondzo ta Bibele. Hi hala tlhelo, i xitirhisiwa lexinene lexi hi nga xi tirhisaka ku hangalasa timbewu ta ntiyiso. (Ekl. 11:6) Hi leswi swiringanyeto swin’wana leswi nga hi pfunaka leswaku hi xi tirhisa kahle.
2. Hi nga xi tirhisa njhani xiphephana leswaku hi sungula bulo?
2 Ku Sungula Bulo: Nyika n’wini wa muti xiphephana, n’wi kombe swivutiso swa tsevu leswi nga exifunengetweni kutani u n’wi vutisa u ku, “Xana u tshame u tivutisa xin’wana xa swivutiso leswi?” Endzhaku ka loko a hlamurile, kambisisani nhlamulo ya le Bibeleni ya xivutiso lexi a xi hlawuleke exiphephanini xexo kutani u n’wi hlayela rin’wana ra Matsalwa lama kombisiweke. Hlaya kumbe u katsakanya tluka ra le ndzhaku kutani u n’wi nyika buku leyi nge Leswi Bibele Yi Swi Dyondzisaka. Hambiloko a nga yi amukeli buku, u ta va a amukele xiphephana lexi nga ta n’wi pfuna leswaku a dzikisa ntiyiso embilwini yakwe.—Mat. 13:23.
3. I yini leswi hi nga swi endlaka loko n’wini wa muti a khomekile?
3 Loko N’wini Wa Muti A Khomekile: U nga ha ku: “Leswi u khomekeke, ndzi ta ku siyela xiphephana. Xi ni swivutiso swa tsevu leswi vo tala va hina hi tivutisaka swona naswona xin’wana ni xin’wana xi hlamuriwa hi ku tirhisa Bibele. Ndzi nga tsakela ku tiva ndlela leyi u vuyeriweke ha yona siku rin’wana.”
4. I yini leswi hi nga swi vulaka loko hi fambisa xiphephana exitarateni?
4 Loko Hi Chumayela eXitarateni: U nga ha ku: “Xewani. Xana u tshame u tivutisa xin’wana xa swivutiso leswi? [Yimela nhlamulo.] Xiphephana lexi xi nyikela tinhlamulo leti enerisaka leti nga eBibeleni.” Loko munhu wa kona a nga khomekanga, u nga ha bula na yena hi yin’wana ya tinhlamulo leti nga exiphephanini xexo kutani u n’wi nyika buku leyi nge Leswi Bibele Yi Swi Dyondzisaka.
5. Xana hi nga xi tirhisa njhani xiphephana lexi emitini leyi nga riki na munhu?
5 Emitini Leyi Ku Nga Riki Na Munhu: Etindhawini tin’wana, hakanyingi vahuweleri va siya minkandziyiso emitini leyi ku nga riki na munhu. Loko evandlheni ra n’wina swi endliwa sweswo, ha yini minkarhi hinkwayo u nga siyi xiphephana lexi nge Swivutiso Swa Nkoka Swinene emitini leyi ku nga riki na munhu? Loko u tlhelela u nga ha ku, “Loko hi ta a wu nga ri kona kutani hi siye xiphephana lexi enyangweni wa wena. Eka swivutiso leswi nga laha, hi xihi lexi u nga tsakelaka ku hlamuriwa xona?”
6. I yini lexi endlaka leswaku xiphephana lexi nge Swivutiso Swa Nkoka Swinene xi va xitirhisiwa lexinene ngopfu entirhweni wo chumayela?
6 Xiphephana lexi nge Swivutiso Swa Nkoka Swinene xi hlamusela ntiyiso hi ndlela yo olova ni leyi twisisekaka. Xi khumba vanhu va vukhongeri ni va mindhavuko hinkwayo. Xi fambiseka hi ku olova; hambi ku ri vantshwa kumbe vahuweleri lavantshwa va nga xi fambisa. Xana wa xi tirhisa nkarhi wun’wana ni wun’wana loko u pfulekeriwa hi nkarhi?