Wa Tsundzuka Xana?

Xana u tshame u anakanyisisa swinene hi minkandziyiso ya sweswinyana ya Xihondzo xo Rindza? Loko swi ri tano, u ta swi kuma swi tsakisa ku tsundzuka leswi landzelaka:

◻ Ha yini dyondzo ya ku kunguhateriwa yi nga twali?

Loko Xikwembu a xi swi tive ka ha ri emahlweni leswaku Adamu u ta wela exidyohweni ivi xi swi kunguhata, a swi ta vula leswaku Yehovha u ve musunguri wa xidyoho loko a endle munhu naswona a a ta va ni vutihlamuleri lebyi kongomeke eka vubihi ni ku xaniseka hinkwako ka vanhu. Leswi a swi pfumelelani ni mhaka ya leswaku Yehovha i Xikwembu xa rirhandzu lexi vengaka vubihi. (Pisalema 33:5; Swivuriso 15:9; 1 Yohane 4:8)—4/15, matluka 7, 8.

◻ Malunghana ni ku hetiseka ka Esaya 2:2-4, xana vanhu lava humaka ematikweni yo tala va endla yini?

Tanihi leswi va khitikanelaka endlwini ya vugandzeri ya Yehovha, va tlhela va papalata ‘ku dyondza nyimpi’ hikuva va tshemba nsirhelelo wa mavuthu ya le tilweni ya Xikwembu, lama lunghekeleke ku herisa valala hinkwavo va ku rhula.—4/15, tluka 30.

◻ Xana i vamani tinhenha ta Xikwembu leti ku vulavuriwaka ha tona eka Yuwele 3:10, 11?

Kwalomu ka minkarhi ya 280 eBibeleni, Xikwembu xa ntiyiso xi vitaniwa “Yehova wa mav̌andla.” (2 Tihosi 3:14) Mavandla lawa i mavuthu ya tintsumi ta le tilweni leti lunghekeleke ku endla leswi Yehovha a ti lerisaka swona.—5/1, tluka 23.

◻ Hi yihi dyondzo leyi hi nga yi dyondzaka eka xileriso xa Yehovha xa leswaku Yobo a khongelela lava n’wi dyoheleke? (Yobo 42:8)

Loko Yobo a nga si hanyisiwa emavabyini, Yehovha u lave leswaku a khongelela lava va n’wi dyoheleke. Leswi swi kombisa leswaku Yehovha u lava leswaku hi rivalela lava hi dyohelaka emahlweni ko va swidyoho swa hina swi rivaleriwa. (Matewu 6:12; Vaefesa 4:32)—5/1, tluka 31.

◻ Xana Yakobo a vula yini loko a te: “Ku tiyisela a ku endle ntirho wa kona wu helela”? (Yakobo 1:4)

Ku tiyisela ku na leswi ku faneleke ku swi endla, “ntirho.” Ntirho wa kona i ku hi endla hi helela etimhakeni hinkwato. Xisweswo, loko hi pfumelela miringo yi endla ntirho wa yona kambe hina hi nga tirhisi tindlela leti nga riki ta matsalwa leswaku hi yi herisa hi ku hatlisa, ripfumelo ra hina ra ringiwa ni ku hlutiwa.—5/15, tluka 16.

◻ Ha yini Xikwembu xi hlwerile swonghasi ku tlhantlha swiphiqo swa vanhu?

Ndlela leyi Yehovha a langutaka nkarhi ha yona ya hambana ni ya hina. Eka Xikwembu lexi nga riki na makumu, nkarhi wa ku sukela eku vumbiweni ka Adamu ku ta fikela sweswi a wu fiki ni le ka vhiki. (2 Petro 3:8) Kambe ku nga khathariseki langutelo ra nkarhi leri hi nga na rona, siku rin’wana ni rin’wana leri hundzaka ri hi tshineta ekusuhi swinene ni le sikwini ra Yehovha ra ku tilwela.—6/1, matluka 5, 6.

◻ I yini lexi endlaka Timbhoni ta Yehovha ti hiseka?

Dyondzo ya Yehovha yi vumbe vanhu vo hlawuleka, lava dyondzisiweke ku rhandzana ni ku rhandza vaakelani va vona kukota loko va tirhandza. (Esaya 54:13) Rirhandzu hi rona ri susumetelaka Timbhoni ta Yehovha leswaku ti hambeta ti chumayela hambiloko vanhu va nga tsakeli kumbe va kaneta. (Matewu 22:36-40; 1 Vakorinto 13:1-8)—6/15, tluka 20.

◻ I yini leswi vuriwaka hi marito ya Yesu lama nge: “Tikarhateni hi matimba leswaku mi nghena hi nyangwa yo khuma”? (Luka 13:24)

Marito ya Yesu ma vula ku endla matshalatshala, ku lwa hi matimba. Marito ya yena ma tlhela ma kombisa leswaku van’wana va nga ha swi lava ku ‘nghena hi nyangwa’ loko swi va olovela ntsena, hi ku tigedlha. Kutani un’wana ni un’wana wa hina a nga vutisa, ‘Xana ndza tikarhata hi ku chivirika ni ku gingiriteka?’—6/15, tluka 31.

◻ Xana lava pfuxiweke va ta “avanyisiwa hi ku landza swilo leswi tsariweke eka tibuku-nsongwa hi ku ya hi swiendlo swa vona” hi ndlela yihi? (Nhlavutelo 20:12)

Tibuku-nsongwa leti a hi rhekhodo ya swiendlo swa vona swa nkarhi lowu hundzeke; loko va fa va rivaleriwile swidyoho swa vona leswi va swi endleke loko va ha hanya. (Varhoma 6:7, 23) Hambiswiritano, vanhu lava pfuxiweke va ta va va ha ri ehansi ka xidyoho xa Adamu. Kutani, tibuku-nsongwa leti ti ta nyikela swiletelo swa Xikwembu leswi swi faneleke swi landzeriwa hi vanhu hinkwavo leswaku va vuyeriwa hilaha ku teleke eka gandzelo ra Yesu Kreste.—7/1, tluka 22.

◻ Hi tihi tidyondzo leti hi ti kumaka exifanisweni xa Yesu malunghana ni Musamariya wa muakelani? (Luka 10:30-37)

Xifaniso xa Yesu xi kombisa leswaku munhu la lulameke hakunene a nga yingisi milawu ya Xikwembu ntsena kambe u tlhela a tekelela timfanelo ta xona. (Vaefesa 5:1) Xi tlhela xi kombisa leswaku vuakelani byi fanele byi tlula mindzilakana hinkwayo ya tiko, ndhavuko ni vukhongeri. (Vagalatiya 6:10)—7/1, tluka 31.

◻ Hi tihi tindlela tinharhu leti u nga ha tivaka vana va wena ha tona ni ku nyikela nkongomiso wa vutswari?

(1) Pfuna vana va wena ku hlawula muxaka lowu faneleke wa ntirho wo tihanyisa; (2) va endle va lunghekela ku langutana ni ntshikilelo wa mintlhaveko exikolweni ni le ntirhweni; (3) va kombise ndlela yo enerisa swilaveko swa vona swa moya.—7/15, tluka 4.

◻ Xikwembu xi wise hi “siku ra ntlhanu na mambiri” hikwalaho ka xikongomelo xihi? (Genesa 2:1-3)

Xikwembu a xi nga lo karhala loko xi wisa. Ematshan’weni ya sweswo, xi lo tshika ku endla ntirho wa ku tumbuluxa laha misaveni leswaku xi pfumelela swilo leswi xi swi endleke swi ndlandlamuka, swi fikelela ku vangama ka swona loku heleleke, swi tisa ku dzuneka ni xichavo eka xona.—7/15, tluka 18.

◻ Hi tihi tindlela tinharhu leti hi nga tirhisaka vululami ha tona?

Yo sungula, hi fanele hi pfumelelana ni misinya ya milawu ya mahanyelo ya Xikwembu. (Esaya 1:17) Ya vumbirhi, hi tirhisa vululami loko hi khoma van’wana hi ndlela leyi hi lavaka leswaku Yehovha a hi khoma ha yona. (Pisalema 130:3, 4) Ya vunharhu, hi kombisa vululami bya Xikwembu loko hi hlanganyela entirhweni wo chumayela hi ku hiseka. (Swivuriso 3:27)—8/1, matluka 15, 16.