Swivuriso Swa Nkombo Swa Vutlhari

SWIVURISO leswi nga laha hansi swi kumeka ebukwini ya khale leyi nga ni swivuriso swo tala leswi pfunaka swinene. Xiya ndlela leyi swi nga ku pfunaka ha yona ku tirhisa mali ya wena hi vutlhari.

1. “La rhandzaka silivhere ntsena a nge enerisiwi hi silivhere, hambi ku ri la rhandzaka rifuwo a nge enerisiwi hi vuyelo.” (Eklesiasta 5:10) Marito lawa a ma vuriwanga hi munhu wa manyunyu loyi a a ri xisiwana. Ma vuriwe hi wanuna un’wana loyi a a fume ni swikunwana, ku nga Hosi Solomoni wa le Israyele naswona leswi a swi vuleke swi endlekile evuton’wini byakwe. Swigwili swa manguva lawa na swona swi vule leswi fanaka.

2. “Loko hi ri ni swakudya ni swifunengeto, hi ta eneriseka hi swilo leswi. Hambiswiritano, lava tiyimiseleke ku fuwa va wela endzingweni.” (1 Timotiya 6:8, 9) Marito lawa ma vuriwe hi muapostola Pawulo, loyi a tshikeke ntirho wa xiyimo xa le henhla kutani a va mulandzeri wa Yesu Kreste. Ku hambana ni varhangeri va vukhongeri va namuntlha, Pawulo a a nga dyondzisi vanhu leswaku a ta tifumisa. Kutani a swi fanerile ku va a vula a ku: “A ndzi navelanga silivhere kumbe nsuku kumbe tinguvu ta munhu. N’wina ma swi tiva leswaku mavoko lawa ma khathalele swilaveko swa mina ni swa lava nga na mina.”—Mintirho 20:33, 34.

3. “I mani eka n’wina loyi loko a lava ku aka xihondzo a nga rhangiki a tshama ehansi a hlayela ntsengo, a vona loko wu ringene ku xi heta?” (Luka 14:28) Xifaniso lexi xa Yesu xi nga tirha eka xiyimo lexi u nga ha langutanaka na xona: Loko u xava, ngopfu-ngopfu hi khadi ra xikweleti, xana u nga xavetela swilo handle ko ehleketa kumbe u nga teka nkarhi wa wena kutani u hlayela ntsengo? Xana hakunene wa wu lava nchumu wa kona naswona u ta swi kota ku wu xava?

4. “Mulombi i nandza wa mulombisi.” (Swivuriso 22:7) Ku hohloka ka ikhonomi loku ka ha ku vaka kona ku swi veke erivaleni leswaku a hi swa nkoka ku va ni khadi ra xikweleti ni swikweleti swin’wana. Ebukwini yakwe ya 2009 leyi nge Your Money, Day One, Michael Wagner u te: “Namuntlha swi tolovelekile leswaku munhu a va ni makhadi ya swikweleti ya mune kumbe ku tlula lama kolotaka tidolara to tlula 9 000 [R60 000].”

5. “Lowo homboloka wa lomba kambe a nga tlherisi, kambe lowo lulama u kombisa tintswalo naswona u humesa tinyiko.” (Pisalema 37:21) Vanhu van’wana va languta ku pfumala mali tanihi ndlela yo antswa ya leswaku va nga hakeli swikweleti swa vona. Hi hala tlhelo, vanhu lava byi tekaka byi ri bya nkoka vuxaka bya vona ni Xikwembu a va karhateki hi ku hakela swikweleti swa vona ntsena loko va ta swi kota kambe va tlhela va avela van’wana leswi va nga na swona.

6. “A ndzi ri jaha, kambe se ndzi dyuhele, kambe a ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa.” (Pisalema 37:25) Marito lawa ma vuriwe hi wanuna loyi a a khomiwe hi ndlela yo biha. U hete malembe a ri mubaleki, minkarhi yin’wana a a tshama emabakweni naswona minkarhi yin’wana a a balekela etikweni rin’wana. Eku heteleleni mubaleki loyi, ku nga Davhida, u ve hosi ya Israyele wa khale. U vone ku hetiseka ka marito lama nga laha henhla hi nkarhi wa vutomi byakwe.

7. “Ku nyika swi tisa ntsako lowukulu ku tlula ku amukela.” (Mintirho 20:35) Marito lawa ma vuriwe hi nghwazi leyi tshameke yi hanya. “Hikwalaho ka ntsako lowu a wu vekiwe emahlweni ka yena,” Yesu u hete vutomi bya yena hinkwabyo bya laha misaveni a tirhela van’wana. Sweswi u hanya ematilweni tanihi munhu wa moya evokweni ra xinene ra Yehovha, “Xikwembu lexi tsakeke.”—Vaheveru 12:2; 1 Timotiya 1:11.

Vutomi bya hina a byi nge vi na xikongomelo handle ko va hi tikarhatela ku tekelela xikombiso xa Yesu hi ku endla hinkwaswo leswi hi nga swi kotaka leswaku hi rhangisa swilaveko swa van’wana. A swi kanakanisi leswaku swa antswa ku va munhu la hlayisaka mali leswaku u ta kota ku va munyiki la tsakeke ku ri ni ku yi tirhisa hi vusopfa.