Nhlengeletano

Nhlamuselo: I nhlangano kumbe vandla ra vanhu lava matshalatshala ya vona ma endleriwaka ntirho kumbe xikongomelo xo karhi. Swirho swa nhlengeletano swi hlanganisiwe hi malunghiselelo ya vulawuri ni hi mimpimanyeto kumbe swilaveko. Vanhu lava nga Timbhoni leti tinyiketeke ni leti khuvuriweke ta Yehovha va ta enhlengeletanweni ya Yehovha hi ku tirhandzela, ku nga ri hi ku tswaleriwa kona kumbe hi nsindziso wo karhi. Va nghene enhlengeletanweni yakwe ya laha misaveni hikwalaho ka tidyondzo ni mintirho ya yona ni hikwalaho ka leswi va lavaka ku hlanganyela entirhweni lowu yi wu endlaka.

Xana Yehovha u ni nhlengeletano laha misaveni hakunene?

Ku hlamula xivutiso xexo, xiya leswi landzelaka:

Xana swivumbiwa swa Xikwembu swa le tilweni, ku nga tintsumi, swi hlelekile?

Dan. 7:9, 10: “Nḍo languta ku fikela ŝiluv̌elo ŝi ko ŝi v̌ekiwa, kutani Nkulukumba wa masiku a ṭhamisa. Šifunengelo ša yena a ši basile kukotisa gamboko, ni misisi ya yena yi basile kukotisa v̌oya bya nyimpfu le’yi hlantŝiweke. Šiluv̌elo ša yena a ši fana ni malangav̌i ya nḍilo, ni masonḍo ya šona ma ri tani hi nḍilo lo’wu pfuraka. Nambu wa nḍilo a wu huma wu khuluka e mahlweni ka yena. A tireriwa hi madzana ya madzana, kutani dzana ra timillion a ti yimile mahlweni ka yena. Kav̌a loko v̌aav̌anyisi v̌a ṭhama, kutani tibuku ti phendliwa.”

Ps. 103:20, 21: “Nkhensani Yehova, ṅwina tinṭumi ta yena, le’ti tiyeke matimba, le’ti endlaka ŝileriso ŝa yena hi ku yingisa mpfumawulo wa rito ra yena! Nkhensani Yehova, ṅwina tinyimpi ta yena hikwato, le’ti ṅwi tirelaka hi ku endla le’ŝi a ŝi ranḍaka!” (‘Vuthu’ i ntlawa lowu hlelekeke.)

Xana Xikwembu a xi swi twarisa njhani swiletelo eka malandza ya xona ya laha misaveni ya nkarhi lowu nga hundza?

Loko vagandzeri va Yehovha va ha ri vatsongo hi nhlayo, u nyike swileriso eka tinhloko ta mindyangu to tanihi Nowa na Abrahama, kutani vona va tirhe tanihi vavulavuleri va Yehovha emindyangwini ya vona. (Gen. 7:1, 7; 12:1-5) Loko Yehovha a kutsula Vaisrayele aEgipta, u va nyike swileriso hi ku tirhisa Muxe. (Eks. 3:10) ENtshaveni ya Sinayi, Xikwembu xi hlengelete vanhu va xona va va rixaka, xi va nyika nawu ni swiletelo leswaku swi ta lawula vugandzeri bya vona ni vuxaka bya vona. (Eks. 24:12) U veke vaprista leswaku va rhangela etimhakeni ta vugandzeri ni ku letela vanhu hi swilaveko swa Yehovha; hi ku famba ka nkarhi u veke ni vaprofeta leswaku va nyikela xikhutazo ni xitsundzuxo eka vanhu. (Det. 33:8, 10; Yer. 7:24, 25) Xisweswo, hambi leswi Yehovha a yingiseleke swikhongelo swa mugandzeri un’wana ni un’wana, u va nyike swiletelo hi ku tirhisa lunghiselelo ra yena ra nhlengeletano.

Loko nkarhi wa leswaku Yehovha a sungula ku tihlanganisa ni vagandzeri vakwe va ntiyiso hi ku tirhisa Yesu Kreste wu tshinela, Xikwembu xi n’wi rhumele emisaveni leswaku a ta va muvulavuleri wa xona. (Hev. 1:1, 2) Kutani hi ku chuluriwa ka moya lowo kwetsima hi Pentekosta ya 33 C.E., vandlha ra Vukreste ri tswariwile. Endzhaku ka loko Yesu a tlhelele etilweni, vandlha leri ri hundzuke lunghiselelo ra Yehovha ro letela ni ku langutela swilaveko swa Mukreste un’wana ni un’wana. A ku ri ni valanguteri lava a va rhangela emavandlheni ya nkarhi wolowo, naswona huvo leyikulu leyi fumaka a yi endla swiboho leswi faneleke, yi pfuneta ni le ku languteleni ka ntirho. Swi le rivaleni leswaku Yehovha u simeke nhlengeletano emisaveni leyi vumbiwaka hi Vakreste va ntiyiso.—Mint. 14:23; 16:4, 5; Gal. 2:7-10.

Xana mintirho ya Yehovha ya ntumbuluko lowu vonakaka yi kombisa leswaku i Xikwembu xa nhleleko?

Esa. 40:26: “Tlakusani mahlo ya ṅwina, mi languta! I mani l’a tumbulušeke ŝilo ŝeŝo, l’a fambiseke hi ku ri šašameta e v̌andla ra ŝona šana? Wa ŝi v̌itana hikwaŝo hi mav̌ito ya ŝona; hi ntamu lo’wukulu wa yena, ni matimba la’makulu ya yena, ku hav̌a šiṅwe le’ši pfumalekaka.” (Tinyeleti ti hlengeletiwe hi swirimele naswona ti famba hi ku twanana, hambi leswi swihlawulekisi swa nyeleti yin’wana ni yin’wana swi hambanaka. Tipulanete ti famba hi nkarhi wa kona, hi ndzhendzheleko wa tona. Swiphemunyana leswitsongo leswi kumekaka eka athomo yin’wana ni yin’wana swi ni ndzhendzheleko wa swona. Naswona xivumbeko xa hinkwaswo xi landzela ntila wa tinhlayo lowu nga hundzukiki lerova vativi va sayense va kote ku vhumbha vukona bya swilo swin’wana va nga si swi tshubula. Leswi hinkwaswo swi kombisa nhleleko lowu xiyekaka.)

Xana Bibele yi kombisa leswaku Vakreste va ntiyiso a va ta va vanhu lava hlelekeke?

Mt. 24:14; 28:19, 20: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula . . . mi va dyondzisa.” (Xana leswi swi nga hetisisiwa njhani handle ka nhlengeletano? Loko Yesu a letela vadyondzisiwa vakwe vo sungula leswaku va endla ntirho lowu, A nga lo byela un’wana ni un’wana leswaku a tiyela lomu a navelaka ku ya kona leswaku a ya byela van’wana hi ripfumelo ra yena hi ndlela yihi ni yihi leyi a nga ta yi hlawula. U va dyondzisile, a va nyika swiletelo kutani a va rhuma hi mukhuva lowu hlelekeke. Vona Luka 8:1; 9:1-6; 10:1-16.)

Hev. 10:24, 25: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona, kambe hi khongotelana, ngopfu-ngopfu leswi mi vonaka leswaku siku ra Hosi ri ya ri tshinela.” (Kambe hi kwihi laha munhu a nga va kongomisaka kona vanhu lava tsakelaka leswaku va ta yingisa xileriso lexi loko ku nga ri na nhlengeletano leyi nga ni minhlangano ya nkarhi na nkarhi laha va nga hlanganaka kona?)

1 Kor. 14:33, 40: “Hikuva Xikwembu a hi Xikwembu xa mpfilumpfilu, kambe i xa ku rhula. . . . Ntsena hinkwaswo a swi endliwe hi mukhuva lowo saseka, hi nawu wa kona.” (Laha muapostola Pawulo u hlamusela endlelo leri hlelekeke eminhlanganweni ya vandlha. Ku tirhisa ndzayo leyi leyi huhuteriweke swi lava leswaku hi xixima nhlengeletano.)

1 Pet. 2:9, 17: “Kambe n’wina, mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu hi xiviri, leswaku mi ta kota ku twarisa mintirho leyo saseka ya loyi a mi vitaneke ku huma emunyameni, mi ta nghena eku vonakaleni ka yena loku hlamarisaka. . . . Rhandzani nhlengeletano ya vamakwenu.” (Ku hlangana ka vanhu lava matshalatshala ya vona ma endleriwaka ku hetisisa ntirho wo karhi i nhlengeletano.)

Xana lava nga malandza yo tshembeka ya Xikwembu ko va vanhu lava hangalakeke etikerekeni to hambana-hambana ta Vujagana?

2 Kor. 6:15-18: “Mupfumeri a nga fambelana hi mukhuva wihi ni loyi a nga riki mupfumeri xana? . . . Hikokwalaho, Hosi yi ri: ‘Humani exikarhi ka vona, mi hambana na vona; mi nga tshuki mi khumba leswi nga tengangiki, kutani ndzi ta mi amukela. Ndzi ta va tata wa n’wina, na n’wina mi va vana va mina va xinuna ni va xisati.’ Hosi ya matimba hinkwawo yi vula sweswo.” (Xana munhu a nga va nandza wo tshembeka wa Xikwembu hakunene loko a hambeta a hlanganyela evugandzerini ni lava va tikombaka hi ndlela ya vona ya vutomi leswaku kahle-kahle a hi vapfumeri? Vona xihloko-nkulu lexi nge “Babilona Lonkulu.”)

1 Kor. 1:10: “Ndza mi khongotela vamakwerhu, hi vito ra Hosi ya hina Yesu Kriste, ndzi ri: Twananani hinkwenu eku vulavuleni. Ku nga tshuki ku va ni ku avana exikarhi ka n’wina, kambe mi hlangana mi va van’we eku anakanyeni ne makungwini ya n’wina.” (Vun’we byo tano a byi kona exikarhi ka tikereke to hambana-hambana ta Vujagana.)

Yoh. 10:16: “Ndzi ni tinyimpfu tin’wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun’we, ti va ni murisi un’we.” (Tanihi leswi Yesu a ta tisa vanhu vo tano leswaku va va “ntlhambi wun’we,” xana a swi le rivaleni leswaku a va nga ta va va hangalakile etikerekeni ta Vujagana?)

Xana nhlengeletano ya Yehovha leyi vonakaka esikwini ra hina yi nga voniwa njhani?

(1) Yi tlakusa Yehovha hakunene tanihi Xikwembu xin’we xa ntiyiso, ni ku twarisa vito ra yena.—Mt. 4:10; Yoh. 17:3.

(2) Yi xi xiya hi ku helela xiphemu xa nkoka xa Yesu Kreste eka xikongomelo xa Yehovha—tanihi mulweri wa vuhosi bya Yehovha, Muyimeri Lonkulu wa vutomi, nhloko ya vandlha ra Vukreste, Hosi ya Vumesiya leyi fumaka.—Nhlav. 19:11-13; 12:10; Mint. 5:31; Ef. 1:22, 23.

(3) Yi namarhela Rito ra Xikwembu leri huhuteriweke, yi seketela tidyondzo ta yona hinkwato ni mimpimanyeto ya mahanyelo eBibeleni.—2 Tim. 3:16, 17.

(4) Yi tihambanisa ni misava.—Yak. 1:27; 4:4.

(5) Yi hlayisa xiyimo lexi tlakukeke xa ku basa emahanyelweni exikarhi ka swirho swa yona, hikuva Yehovha hi byakwe wa kwetsima.—1 Pet. 1:15, 16; 1 Kor. 5:9-13.

(6) Yi tinyiketela ku endla ntirho lowu Bibele yi vhumbheke leswaku wu endliwa enkarhini wa hina, ku nga ku chumayela mahungu lamanene ya Mfumo wa Xikwembu emisaveni hinkwayo leswaku byi va vumbhoni.—Mt. 24:14.

(7) Ku nga khathariseki ku nga hetiseki ka vumunhu, swirho swa yona swi hlakulela ni ku humesa mihandzu ya moya wa Xikwembu—rirhandzu, ntsako, ku rhula, ku leha mbilu, musa, ku lulama, ripfumelo, vunene, ku tikhoma—swi swi endla hi ndlela leyi swi hambanisaka ni misava hinkwayo.—Gal. 5:22, 23; Yoh. 13:35.

Xana hi nga xi kombisa njhani xichavo enhlengeletanweni ya Yehovha?

1 Kor. 10:31: “Endlani hinkwaswo ku dzunisa Xikwembu.”

Hev. 13:17: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tanihi vanhu lava nga ta vutisiwa ehenhla ka yona.”

Yak. 1:22: “Mi va vaendli va rito, mi nga vi vatwi ntsena.”

Tito 2:11, 12: “Tintswalo ta Xikwembu ta ku ponisa vanhu hinkwavo, ti humeseriwe erivaleni; ti hi dyondzisa ku tshika ku hanya ehandle ka Xikwembu ni ku navela swa misava, kutani hi hanya emisaveni leyi hi ku tikhoma, ni ku lulama, ni vukhongeri.”

1 Pet. 2:17: “Rhandzani nhlengeletano ya vamakwenu.”