Ku Vuya Ka Kreste

Nhlamuselo: Loko a nga si suka emisaveni, Yesu Kreste u tshembise ku vuya. Swiendlakalo leswi tsakisaka leswi fambisanaka ni Mfumo wa Xikwembu swi khumbana ni xitshembiso xexo. Swi fanele swi xiyiwa leswaku ku ni ku hambana exikarhi ka ku ta ni ku va kona. Hambi loko ku ta ka munhu (loku fambisanaka ni ku fika kumbe ku vuya kakwe) swi humelelaka hi nkarhi lowu vekiweke, kambe endzhaku ka sweswo vukona byakwe byi nga ha heta malembe yo tala. EBibeleni, rito ra Xigriki erʹkho·mai (leri vulaka “ku ta”) ri tlhela ri tirhisiwa ku kombetela eka Yesu loko a yisa nyingiso wakwe entirhweni wa nkoka hi nkarhi wo karhi wa ku va kona kakwe, hi leswaku, entirhweni wakwe tanihi muavanyisi wa Yehovha enyimpini ya siku lerikulu ra Xikwembu xa Matimba Hinkwawo.

Xana swiendlakalo leswi fambisanaka ni vukona bya Kreste swi endleka hi nkarhi wo koma swinene kumbe swi heta malembe yo tala?

Mt. 24:37-39: “Ku [va kona, NW] [“ku vuya” RS, TEV; “vukona” Yg, Ro, ED; Xigriki, pa·rou·siʹa] ka N’wana-wa-Munhu ku ta fana ni leswi humeleleke emasikwini ya Nowa. Hikuva emasikwini wolawo, loko ndhambi ya mati yi nga si ta, vanhu a va ri eku dyeni, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona; a va nga anakanyi nchumu ku kondza loko ndhambi leyi ya mati yi ta, kutani yi va kukula hinkwavo; swi ta va tano ni le ku vuyeni ka N’wana-wa-Munhu.” (Swiendlakalo swa le ‘masikwini ya Nowa’ leswi hlamuseriwaka laha swi endleke emalembeni yo tala. Yesu u fanise ku va kona kakwe ni leswi humeleleke enkarhini wolowo wa khale.)

Eka Matewu 24:37, (NW), ku tirhisiwe rito ra Xigriki pa·rou·siʹa. Hi ku kongoma ri vula “ku va swin’we ni.” Greek-English Lexicon (Oxford, 1968) ya Liddell na Scott yi nyikela “vukona bya vanhu,” tanihi nhlamuselo ya yona yo sungula ya pa·rou·siʹa. Mongo wa rito leri wu kombisiwe kahle eka Vafilipiya 2:12, laha Pawulo a hambanisaka ku va kona kakwe (pa·rou·siʹa) ni ku nga vi kona kakwe (a·pou·siʹa). Hi hala tlhelo, eka Matewu 24:30, leyi vulavulaka hi “N’wana-wa-Munhu [la taka, NW] emapapeni ya le tilweni, hi matimba ni ku kwetsima lokukulu” tanihi muavanyisi wa Yehovha enyimpini ya Armagedoni, ku tirhisiwe rito ra Xigriki er·khoʹme·non. Vahundzuluxeri van’wana va tirhise la ‘taka’ eka marito lawa hamambirhi ya Xigriki, kambe lava nga ni vuxiyaxiya lebyikulu va kombisa ku hambana ka wona.

Xana Kreste u ta vuya hi ndlela leyi vonakaka emahlweni ka vanhu?

Yoh. 14:19: “Endzhaku ka nkarhinyana, misava a yi nga ha ndzi voni, kambe n’wina [vaapostola va Yesu vo tshembeka] mi ta ndzi vona. Leswi ndzi hanyaka, na n’wina mi ta hanya.” (Yesu u tshembise vaapostola vakwe leswaku u ta tlhela a ta, a ta va tlhandlukisela etilweni leswaku va va na yena. A va ta n’wi vona hikuva a va ta va swivumbiwa swa moya ku fana na yena. Kambe misava a yi nga ha ta n’wi vona. Ringanisa 1 Timotiya 6:16.)

Mint. 13:34, NW: “[Xikwembu] xi n’wi [Yesu] pfuxe eku feni, xi n’wi endle leswaku a nga ha tlheli a bola.” (Mimiri ya vanhu ya bola hi ntumbuluko. Hi yona mhaka leyi 1 Vakorinto 15:42, 44 yi tirhisaka rito “bola” loko yi vulavula hi “miri wa ntumbuluko.” Yesu a nge he pfuki a ve ni miri wo tano.)

Yoh. 6:51: “Hi mina vuswa lebyi hanyaka lebyi xikeke hi le tilweni; loko munhu a dya vuswa bya kona, ú ta hanya hilaha ku nga heriki, kutani vuswa lebyi ndzi nga ta byi nyika vanhu, i nyama ya nga; ndza yi nyika leswaku misava yi va ni vutomi.” (Loko Yesu se a wu nyikerile, a nga ha wu teki nakambe. Xisweswo a nga va tsoni vanhu mimpfuno ya gandzelo ra vutomi bya yena byo hetiseka.)

Nakambe vona matluka 100-101, ehansi ka “Ku Wutliwa.”

Xana swi vula yini leswaku Yesu u ta ta “hi mukhuva lowu” a tlhandlukeleke etilweni ha wona?

Mint. 1:9-11: “A tlakuriwa va ri karhi va langutile [vaapostola va Yesu], kutani papa ri siva, va nga ha n’wi voni. Va te va ha tlakusile mahlo va languta etilweni loko a ri karhi a tlhandluka, hi nomu lo vavanuna vambirhi lava ambaleke swo basa, va humelela kwala va nga kona, va ku: ‘Vavanuna va Galeliya, mi yimele yini mi langutile etilweni ke? Yesu loyi a susiweke exikarhi ka n’wina ni ku tlakuleriwa etilweni, ú ta tlhela a vuya hi mukhuva lowu mi n’wi voneke a ya etilweni ha wona.’” (Xiya leswaku ku vuriwa leswaku ‘hi mukhuva lowu fanaka,’ hayi hi miri lowu fanaka. Xana u tlhandluke hi “mukhuva” wihi? Hi laha ndzimana 9 yi kombisaka ha kona, u nyamalarile, ku famba kakwe ku voniwe hi vadyondzisiwa vakwe ntsena. Tiko hinkwaro a ri swi xiyanga leswi endlekeke. Swi ta va tano ni loko Kreste a vuya.)

Swi vula yini leswaku u ‘ta hi mapapa’ ni leswaku “un’wana ni un’wana u ta n’wi vona”?

Nhlav. 1:7: “Vonani, wa ta hi mapapa! Un’wana ni un’wana ú ta n’wi vona, ku katsa ni lava va n’wi dlayeke. Tinxaka hinkwato ta vanhu va misava ti ta ba nkosi ti rila hikwalaho ka yena.” (Na Matewu 24:30; Marka 13:26; Luka 21:27)

Xana “mapapa” ma yimela yini? Ku nga vonakali. Loko xihaha-mpfhuka xi ri emapapeni yo tsindziyela kumbe xi ri ehenhla ka mapapa, hi ntolovelo vanhu lava va nga emisaveni a va xi voni, hambi leswi va nga ha twaka ku pfuma ka tinjhini. Yehovha u byele Muxe a ku: “Nḍi ta ta ka wena e papeni le’ro ṭinḍiyela.” Muxe a nga xi vonanga Xikwembu, kambe papa rero a ri kombisa ku va kona ka Yehovha loku nga vonakiki. (Eks. 19:9; nakambe vona Levhitika 16:2; Tinhlayo 11:25.) Loko Kreste a a ta humelela hi ndlela leyi vonakaka ematilweni, swi le rivaleni leswaku a hi “un’wana ni un’wana” loyi a a ta n’wi vona. Hi xikombiso, loko a humelela eAustralia, a a nga ta vonaka eYuropa, eAfrika ni le Matikweni ya Amerika, a swi tano ke?

Xana ‘un’wana ni un’wana u ta n’wi vona’ hi ndlela yihi? Va ta vona hi swiendlakalo emisaveni leswaku u kona hi ndlela leyi nga vonakiki. Naswona loko yi vulavula hi ku vona loku nga riki ka nyama, Yohane 9:41 ya vika: “Yesu a ku ka vona [Vafarisi]: ‘Loko a mi file mahlo, a mi nga ta va na nandzu; kambe sweswi, leswi mi nge: “Ha vona”, nandzu wa ha ri na n’wina.’” (Ringanisa Varhoma 1:20.) Endzhaku ka ku vuya ka Kreste, vanhu van’wana va kombisa ripfumelo; va xiya xikombiso xa vukona byakwe. Van’wana va ale vumbhoni bya kona, kambe loko Kreste a teka goza ra ku va muavanyisi wa Xikwembu eka lavo biha, na vona va ta vona hi ku kombisiwa ka matimba yakwe leswaku ndzoviso wa kona a wu humi evanhwini kambe wu huma etilweni. Va ta swi tiva leswi humelelaka hikuva va tsundzuxiwile ka ha ri emahlweni. Hikwalaho ka leswi swi va welaka, va ta “ba nkosi [va] rila.”

I vamani “lava va n’wi dlayeke”? Hi ku kongoma, i masocha ya Rhoma lama dlayeke Yesu. Kambe va fe khale. Kutani leswi swi fanele swi kombetela eka vanhu lava xanisaka kumbe ku ‘tlhava’ valandzeri va Kreste va ntiyiso hi ndlela leyi fanaka “emasikwini ya makumu.”—Mt. 25:40, 45.

Xana hakunene ku nga vuriwa leswaku munhu u ‘tile’ kumbe u ‘kona’ loko a nga vonaki?

Muapostola Pawulo u vulavule hi ku ‘va ekule hi miri kambe a ri kona hi moya’ evandlheni ra le Korinto. (Xiitaliki i xerhu.)—1 Kor. 5:3.

Yehovha u vulavule hi ku “šika” a ya pfilunganya ririmi ra vaaki va xihondzo xa Babele. (Gen. 11:7) U tlhele a vula leswaku u ta “šika” a ya ntshunxa Vaisrayele evuhlongeni aEgipta. Naswona Xikwembu xi tiyisekise Muxe xi ku, “Mombo wa mina wu ta famba” leswaku wu ya kongomisa Vaisrayele eTikweni ra Xitshembiso. (Eks. 3:8; 33:14) Kambe ku hava munhu la tshameke a vona Xikwembu.—Eks. 33:20; Yoh. 1:18.

Xana hi swihi swin’wana swa swiendlakalo leswi Bibele yi swi hlanganisaka ni vukona bya Kreste?

Dan. 7:13, 14: “Uṅwana l’a fanaka ni ṅwana wa munhu [Yesu Kreste] a humelela hi mapapa ya le henhla, a fika e ka Nkulukumba wa masiku [Yehovha Xikwembu], a tisiwa e mahlweni ka yena. Kutani a nyikiwa ku fuma, ni ku kwetsima, ni v̌uhosi leŝaku v̌a tinšaka hikwato, ni v̌a matiko hikwawo, ni v̌a tinḍimi hikwato v̌a ta ṅwi tirela.”

1 Tes. 4:15, 16: “Lexi hi mi byelaka xona hi vito ra [Yehovha, NW], hi lexi: Hina hi nga ta va ha ha hanya loko Hosi yi vuya, hi nga ka hi nga rhangeli lava tietleleleke; hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni.” (Kutani, lava nga ta fuma na Kreste va ta pfuxiwa leswaku va ta va na yena etilweni—ku ta rhanga lava nga fa emalembeni lama hundzeke ivi ku landzela lava nga ta fa endzhaku ka ku vuya ka Hosi.)

Mt. 25:31-33: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi.”

2 Tes. 1:7-9: “Xi ta mi nyika ku wisa swin’we na hina, n’wina mi xanisiwaka; xi ta endla sweswo siku Hosi Yesu a humelelaka hi le tilweni, swin’we ni tintsumi ta yena ta matimba, emalangavini ya ndzilo. Xi ta ba lava va nga xi tiviki, va nga lava nga yingisiki Evhangeli ya Hosi ya hina Yesu. Vanhu lava va ta avanyisiwa hi ku yisiwa eku onhakeni loku nga heriki, ni ku vona nghohe ya Hosi a va nga yi voni, hambi ma ri matimba ya yona layo kwetsima a va nga ma voni.”

Lk. 23:42, 43: “Xidyohi [lexi nga ni ntwela-vusiwana lexi beleriweke etlhelo ka Yesu] xi engeta xi ku: ‘Yesu, ndzi anakanye, loko u nghena eMfun’weni wa wena.’ Yesu a ku ka xona: ‘Ndzi tiyisile ndzi ri ka wena [namuntlha, NW] u ta va na mina eParadeyisini.’” (Ehansi ka ku fuma ka Yesu, misava hinkwayo yi ta va paradeyisi; vafi lava nga emiehleketweni ya Xikwembu va ta pfuxiwa leswaku va ta kuma lunghelo ra ku tsakela vutomi lebyi hetisekeke emisaveni hi masiku.)

Nakambe vona matluka 123-7, ehansi ka xihloko lexi nge “Masiku Ya Makumu.”