Tirhisa Xibukwana Lexi Nge Xingheniso Xa Rito Ra Xikwembu Leswaku U Sungula Mabulo
1. Hi xihi xitirhisiwa lexintshwa lexi hi xi kumeke leswaku hi ta xi tirhisa ensin’wini?
1 Enhlengeletanweni ya xifundzha leyi a yi ri ni nhlokomhaka leyi nge, ‘Hambetani Mi Lava Mfumo Wa Xikwembu Ku Sungula!’ ku humesiwe xibukwana lexi nge, Xingheniso Xa Rito Ra Xikwembu. Hi nga xi tirhisa njhani xitirhisiwa lexi lexintshwa loko hi lunghiselela swingheniso swa le nsin’wini? Leswi ehansi ka tinhlokomhaka to hambanahambana ta xibukwana lexi leti sekeriweke eBibeleni ku nga ni matsalwa yo hlayanyana, ku fana ni leswi swi nga xiswona ebukwini leyi nge Ku Hlamulana, xi nga pfuna swinene eku sunguleni ka mabulo.
2. Hi nga xi tirhisa njhani xibukwana lexi nge, Xingheniso Xa Rito Ra Xikwembu ensin’wini?
2 U nga ha tirhisa xivutiso 8 kutani u ku: “Hi endzela vaakelani va hina swa xinkarhana hikuva vanhu vo tala va tivutisa leswaku, ‘Xana Xikwembu xi fanele xi soriwa hikwalaho ka leswi vanhu va xanisekaka?’ [Etindhawini tin’wana, swa pfuna swinene ku komba n’wini wa muti xivutiso lexi.] Wena u ri yini hi mhaka leyi? [Yimela nhlamulo.] Bibele yi nyikela nhlamulo leyi enerisaka ya xivutiso lexi.” Hlayani eBibeleni mi tlhela mi burisana hi ndzimana yin’we kumbe to hlayanyana leti kombisiweke. Loko n’wini wa muti a kombisa ku tsakela, u nga n’wi komba swivutiso swa 20 leswi nga exinghenisweni kutani u n’wi kombela leswaku a hlawula xin’we lexi mi nga ta bula ha xona eka riendzo ro vuyela. Kumbe u nga n’wi fambisela yin’wana ya minkandziyiso ya hina leyi hi yi tirhisaka ku fambisa dyondzo, leyi yi hlamuselaka hi vuenti mhaka leyi mi buleke ha yona.
3. Hi nga xi tirhisa njhani xibukwana lexi nge, Xingheniso Xa Rito Ra Xikwembu leswaku hi sungula mabulo ensin’wini leyi vanhu va kona va nga swirho swa vukhongeri lebyi nga riki bya Vukreste?
3 Xivutiso 4 na 13 ku ya eka 17 swi nga ha pfuna ngopfungopfu loko mi chumayela ensin’wini leyi vanhu va kona va nga swirho swa vukhongeri lebyi nga riki bya Vukreste. Hi xikombiso, u nga ha tirhisa rungula leri kumekaka eka xivutiso 17 kutani u ku: “Namuntlha hi burisana na n’wina hi rungula leri khumbaka mindyangu. Xana wa pfumela leswaku mindyangu yi langutana ni swiphiqo swo tala namuntlha? [Yimela nhlamulo.] Vatekani vo tala va kume leswaku marito lawa ya vutlhari ma pfuna: “Wansati u fanele ku va ni xichavo xo enta eka nuna wakwe.” [A swi bohi ku vula leswaku marito wolawo ma kumeka eka Vaefesa 5:33. Loko u vulavula ni wansati, u nga n’wi hlamusela marito lama nga eka Vaefesa 5:28.] Xana u anakanya leswaku loko vatekani va tirhisa xitsundzuxo xexo swi nga va vuyerisa?”
4. I yini leswi u nga swi endlaka loko u gimeta bulo ni munhu loyi a nga xirho xa vukhongeri lebyi nga riki bya Vukreste?
4 Loko mi gimeta bulo, endla malunghiselelo ya leswaku siku rin’wana mi ya emahlweni ni bulo ra n’wina. Kumbexana u nga ha vulavula hi rin’wana ra matsalwa lama nga ehansi ka xivutiso lexi u xi tirhiseke. Hi nkarhi lowu faneleke, byela n’wini wa muti leswaku marito ya vutlhari lawa mi buleke ha wona ma huma eBibeleni. N’wi fambisele nkandziyiso lowu u anakanyaka leswaku wu ta n’wi tsakisa, hi ku ya hi leswi mi buleke ha swona enkarhini lowu hundzeke ni hi langutelo leri a nga na rona hi Bibele.—Vona xiengetelo lexi nga eka Vutirheli Bya Hina Bya Mfumo bya December 2013.