Bokisi Ra Swivutiso

◼ Xana hi nga vuyeriwa njhani hi ku hlanganyela evandlheni leri averiweke nsimu ya laha hi tshamaka kona?

Hikwalaho ka lunghiselelo ra vandlha, hi kuma matimba ya ku “khutazana erirhandzwini ni le mintirhweni leyinene.” (Hev. 10:24, 25) Evandlheni hi dyondza ntiyiso naswona ha hlomisiwa leswaku hi hetisisa xiavelo xa hina xa ku endla vadyondzisiwa. (Mat. 28:19, 20) Nakambe ha khutaziwa leswaku hi tiyiselela miringo hi ku tshembeka naswona hi ni valanguteri va rirhandzu lava hi pfunaka ku hlula mintshikilelo ni mivilelo leyi andzaka. Swi le rivaleni leswaku vandlha ra laveka leswaku hi tshama hi hanyile emoyeni. Hambiswiritano, xana hi vuyeriwa njhani loko hi hlanganyela evandlheni leri averiweke nsimu leyi hi tshamaka eka yona?

Swiyimo swa hina swa hambana-hambana, naswona swilo swo fana ni ntirho wa ku tihanyisa, munghana wa vukati la nga riki mupfumeri ni swo famba ha swona swi nga khumba xiboho lexi hi xi endlaka emhakeni leyi. Hambiswiritano, ku ni swilo leswi pfunaka swinene hi tlhelo ra moya ni hi tindlela tin’wana, loko munhu a hlanganyela ni vandlha leri tirhaka nsimu leyi a tshamaka eka yona. Vakulu va nga swi kota ku fikelela vahuweleri hinkwavo hi ku hatlisa loko ku ri ni mhaka ya xihatla. Mabokisi Ya Swivutiso ya nkarhi lowu hundzeke ma kandziyise tindlela tin’wana to hambana-hambana leti sweswo swi pfunaka ha tona.—August 1991 (CD-ROM May 1991), minkandziyiso ya Xinghezi ya April 1976 (CD-ROM March 1976), na February 1967 (CD-ROM January 1967).

Hi ntolovelo swa vuyerisa swinene ku ya eminhlanganweni leyi nga ekusuhi, swi hi pfuna leswaku hi hatla hi fika hi vulavula ni van’wana, hi khathalela timhaka tin’wana ni ku hlanganyela eku yimbeleleni ka risimu ro pfula ni xikhongelo. Loko emugangeni wa ka hina ku ri ni lava va ha ku sungulaka ku kombisa ku tsakela, hakanyingi swa hi olovela ku ya eka vona, hi va fambisela dyondzo ya Bibele ni ku va komba tindhawu ta minhlangano leti nga kusuhi na vona.

Ha tiyiseka leswaku tinhloko ta mindyangu ti ta anakanyisisa hi mhaka leyi hi xikhongelo, ti kambisisa timhaka hinkwato leti katsekaka loko ti endla xiboho lexi nga ta vuyerisa mindyangu ya tona hi tlhelo ra moya ni ra nyama.—1 Tim. 5:8.