Mufundhisi Loyi A Hlundzukeke A Hlangana Ni Timbhoni Leti N’wi Khomeke Hi Ndlela Yo Rhula

Artur loyi a nga mulanguteri wa muganga eAmerika a a endzele vandlha ra Timbhoni ta Yehovha. Loko a ri kwalaho, u xiye leswaku vandlha rero a ri nga si tshama ri chumayela etindhawini ta mani na mani hi swigolonyana ni hi matafula. Leswaku a khutaza vandlha ku endla tano, Artur ni nsati wakwe Anna ni Mbhoni yin’wana leyi vuriwaka Jirayr, va yimise xigolonyana exidorobanini xin’wana. Va hlawule ndhawu leyi a ku tshamela ku hundza vanhu vo tala.

Vahundzi va ndlela va sungule ku tsakela kutani va teka tibuku leti a ti ri exigolonyanini. Kambe swi nga si ya kwihi, ndlela leyi leyintshwa yo chumayela yi voniwe hi vakaneti. Vafundhisi vambirhi va tshinelele xigolonyana ivi un’wana wa vona a fika a xi raha hi xitshuketa. Endzhaku ka sweswo u be Artur hi mpama a tlhela a lahla manghilazi yakwe ya matihlo ehansi. Artur, Anna na Jirayr va ringete ku khongotela mufundhisi yoloye leswaku a ehlisa moya kambe a swo fana ni kwala. Mufundhisi yoloye u rahe xigolonyana xi wela ehansi. Va tlhele va phyarheka Timbhoni hi nhlambha ivi endzhaku ka sweswo va ti sukela va famba.

Artur, Anna na Jirayr va ye exitichini xa maphorisa ya le kusuhi ku ya vika mhaka yoleyo. Va fike va vula leswi endlekeke ni ku tlhela va bula hi Bibele ni maphorisa yo hlayanyana swin’we ni lava a va tirha kwalaho. Vamakwerhu volavo va yisiwe eka ndhuna ya maphorisa. Eku sunguleni a yi lava ku tiva hileswi a va tele swona. Kambe loko yi twa ku Artur loyi a languteka a ri ni matimba a nga lwanga loko a biwa hi mpama, ndhuna ya maphorisa yi hlamarile kutani yi tshike ku va vutisa hileswi a va tele swona ivi yi lava ku tiva hileswi va swi pfumelaka. Bulo rero ri hete mune wa tiawara! Ndhuna ya maphorisa yi hlamarisiwe hi leswi yi swi tweke lerova yi tiphofula yi ku: “Hakunene lebyi i vukhongeri bya ntiyiso! Ndzi lava ku byi joyina!”

Hi siku leri landzeleke, loko Artur a ri eku chumayeleni etindhawini ta mani na mani ku te wanuna loyi a voneke leswi endlekeke esikwini leri hundzeke. U fike a bumabumela Artur hileswi a koteke ku tikhoma. U tlhele a vula leswaku leswi a swi voneke swi endle leswaku a nga ha va xiximi vafundhisi.

Hi madyambu wolawo, ndhuna ya maphorisa yi vitane Artur leswaku a ta exitichini xa maphorisa. Kambe ematshan’weni yo vulavula hileswi va swi vikeke, ndhuna yoleyo yi sungule ku vutisa swivutiso swo tala swa le Bibeleni. Maphorisa mambirhi ma joyine bulo ra vona.

Eka siku leri landzelaka, Artur u tlhele a endzela murhangeri wa maphorisa leswaku a ya n’wi komba tivhidiyo tin’wana ta hina leti vulavulaka hi Bibele. Murhangeri yoloye wa maphorisa u vitane phorisa rin’wana leswaku va ta hlalela tivhidiyo swin’we.

Mahanyelo yo biha ya mufundhisi ma endle leswaku maphorisa yo tala ma twa mahungu lamanene ro sungula evuton’wini bya wona. Sweswo swi endle leswaku va tirhandza ngopfu Timbhoni ta Yehovha.