Ta Rivala
◼ “Makhombo yo tala lama fambisanaka ni maxelo ma andze ngopfu exikarhi ka va-1970 na va-1990, ku nga khathariseki leswaku ya vangiwa hi mahiselo ya misava hinkwayo kumbe hi swin’wana.”—THE ECONOMIST, BRITAIN.
◼ Le Illinois, eU.S.A. xifanyetana xa tin’hweti ta khume hi vukhale xi ni layisense yo va ni xibamu. Layisense ya kona, yi komberiwe hi tata wa xona, eka yona ku hlamuseriwe leswaku xifanyetana lexi xi lehe tisentimitara ta 68,5 naswona xi tika tikhilogiramu ta kaye. Ku nga khathariseki leswaku u ni malembe mangani wa yi kuma layisense yo va ni xibamu.—CABLE NEWS NETWORK, U.S.A.
◼ Van’wasayense va cince mati lama a ma “hisa ku tlula ni mati lama virisiweke” ivi ma va ayisi. Handle ka ayisi ya “ntolovelo,” ku ni “mixaka yin’wana ya 11 ya tiayisi leti vumbekaka hambi ku nga titimeli.”—SANDIA NATIONAL LABORATORIES, U.S.A.
Le Georgia Ku Tlhele Ku Va Ni Ntshunxeko Wa Vukhongeri
Huvo ya le Yuropa ya Timfanelo ta Vanhu yi endle xiboho lexi lwisanaka ni xa hulumendhe ya tiko ra le Georgia leyi a yi pfumelela ku hlaseriwa ka Timbhoni ta Yehovha. Huvo yi tlhele yi endla leswaku Timbhoni ti xiximiwa tanihi vukhongeri bya Vukreste lebyi tivekaka, leswaku ti hlengeletana ti dyondza Bibele, yi tlhela yi lerisa leswaku tin’wana leti hlaseriweke ti fanele ti rihiwa mali leyi ti yi hakeleke eka magqweta ni le tihubyeni loko ti ya tenga nandzu lowu ni hikwalaho ka leswi ti xanisiweke. Exikarhi ka October 1999 na November 2002, Timbhoni ta Yehovha ti hlaseriwile naswona ku ni milandzu ya 784 leyi mangariweke eka valawuri va le Georgia. Kambe va yi bakanyele le kule. Maphorisa ma ale ku ti nghena timhaka leti ma tlhela ma ala ku sirhelela Timbhoni. Ku hlaseriwa ka Timbhoni ku hunguteke swinene ku sukela hi November 2003.
Ndhawu Yo Kambisisa Tipulanete Ya Khale Le Peru
Vayimburi va ringanyete leswaku sweswi swa tika ku tiva loko marhumbi lama nga ePeru lama nga ni malembe ya 2 300 hi vukhale a ma ri yona ndhawu yo kambisisa tipulanete. Ndhawu leyi vuriwaka Chankillo, yi katsa swihondzo swa 13 leswi nga enhlohlorhini ya ntshava leswi swi vonakaka onge i meno. Magazini lowu nge Science wu vula leswaku ndhawu leyi ku voniwaka tipulanete eka yona “yi endliwe hi ndlela ya leswaku loko ku fika vuxika ni ximumu kambirhi lembe ni lembe hi masiku yo karhi loko dyambu ri huma niloko ri pela ri famba entileni wa swihondzo leswi, naswona sweswo swi endla leswaku ku tiviwa ku sungula ka ku leha ka lembe leri pimiwaka hi ku ya hileswaku dyambu ri le kwihi.” Swihondzo leswi nga exikarhi swi kombisa lomu dyambu ri xaka ni ku pela kona. Endhawini leyi, leyi omeke, a swi ri swa nkoka leswaku “vanhu va wu tiva hi ku kongoma nkarhi lowu a va fanele va byala ha wona.”
[Dayagramu/Xifaniso eka tluka 29]
(Leswaku u swi vona kahle, pfula nkandziyiso hi woxe)
Vugima-dyambu bya June Ku tsemakanya ka dyambu a ikhweyita Vugima-dyambu bya December
↑ ↑ ↑
Ndhawu yo kambisisa tipulanete
[N’wini wa Xifaniso]
REUTERS/Ivan Ghezzi/Handout
Swifaniso Leswi Endlaka Vavasati Va Nga Tsaki
Xiviko lexi humaka eYunivhesiti ya Missouri-Columbia, le United States xi te: “Swifaniso swa vavasati vo xonga va tlhela va lala swinene, leswi nga eka swifunengeto swa timagazini swi endla leswaku vavasati hinkwavo va nga tsaki hi mimiri ya vona ku nga khathariseki leswaku va nyuherile kumbe va larile, va lehile kumbe va komile kumbe va ni malembe mangani.” Laurie Mintz profesa wa dyondzo ni ntivo-miehleketo u vule leswaku “a ku anakanyiwa leswaku endzhaku ka loko vavasati lava nyuheleke va vone swifaniso swa vavasati vo lala lava kombisiweke emaphepheni ni le ka thelevhixini hi vona va nga tsakiki ngopfu ku tlula vavasati vo lala.” U tlhele a vula leswaku “hi kume leswaku a hi vavasati lava nyuheleke ntsena lava nga tsakiki. Wansati un’wana ni un’wana loko a vona swifaniso leswi a nga tsaki.”