Vantshwa Va Vutisa

Ndzi Nga Wu Hlurisa Ku Yini Ntshikilelo eXikolweni?

“Ntshikilelo wa le xikolweni a wu heli loko u kula kambe wu ta hi tindlela tin’wana.”—James wa le New Zealand.a

“A ndzi titwa ndzi tshikilelekile swinene exikolweni lerova minkarhi yo tala a ndzi twa onge ndzi ngo rila ndzi ba nkalanga.”—Sharon wa le United States.

XANA u vona onge vatswari va wena a va wu twisisi ntshikilelo lowu u langutanaka na wona exikolweni? Va nga ha ku byela leswaku wena wa antswa hikuva a wu na swikweleti leswi u faneleke u swi hakela, a wu na ndyangu lowu u faneleke u wu hlayisa kumbe muthori loyi u faneleke u n’wi tsakisa. Kambe swi nga ha endleka leswaku loko u ri exikolweni u titwa u langutane ni ntshikilelo wo fana ni lowu vatswari va wena va langutanaka na wona kumbe wo tlula wa vona.

Ku ya ni ku vuya exikolweni swi nga ku vangela ntshikilelo. Tara wa le United States u ri: “Vana a va tshamela ku lwa ebazini ya xikolo. Loko va ri eku lweni, muchayeri a a yimisa bazi kutani hinkwerhu hi boheka ku xika. A hi hlwerisiwa ku ringana hafu ya awara kumbe ku tlula.”

Xana ntshikilelo wa hela loko u fika exikolweni? Nikatsongo! Kumbexana u tshame u titwa hi ndlela leyi hlamuseriwaka laha hansi.

◼ Ntshikilelo lowu vangiwaka hi vadyondzisi.

“Vadyondzisi va mina va lava leswaku ndzi pasela ehenhla, naswona ndzi titwa ndzi ri ni ntshikilelo hikuva ndzi lava ku va tsakisa.”—Sandra wa le Fiji.

“Vadyondzisi va tshikilela swichudeni leswaku swi pasela ehenhla swinene, ngopfu-ngopfu loko xichudeni xa kona xi tlharihile. Vadyondzisi va hi tshikilela hakunene leswaku hi pasela ehenhla.”—April wa le United States.

“Hambiloko u tivekele tipakani ta kahle evuton’wini, vadyondzisi van’wana va ku endla u titwa u ri xikangalafula loko u nga hlawulanga tidyondzo leti vona va ehleketaka leswaku a wu fanele u dyondza tona.”—Naomi wa le United States.

Xana wu ku khumba njhani ntshikilelo lowu vadyondzisi va ku vangelaka wona?

․․․․․

◼ Ntshikilelo lowu vangiwaka hi tintangha.

“Vantshwa lava nga ekusuhi ni ku heta xikolo va ni ntshunxeko lowukulu naswona va delela ngopfu. Loko u nga va joyini, va ku teka u ri xiphukuphuku.”—Kevin wa le United States.

“Siku ni siku ndzi langutana ni ndzingo wa ku nwa byala ni ku hlanganyela eka timhaka ta masangu. Minkarhi yin’wana swa tika ku fambela ekule ni leswi va swi endlaka.”—Aaron wa le New Zealand.

“Sweswi ndzi nga ni malembe ya 12, ntshikilelo lowukulu eka mina i mhaka ya ku gangisana. Exikolweni, un’wana ni un’wana loko a ndzi vona u ri eka mina, ‘U ta tshama ku fikela rini u nga ri na jaha?’”—Alexandria wa le United States.

“A ndzi tshikileriwa leswaku ndzi rhandzana ni mufana un’wana. Loko ndzi ala, va ndzi vule musodoma. Sweswo swi humelele loko ndzi ri ni malembe ya khume!”—Christa wa le Australia.

Xana ntshikilelo lowu vangiwaka hi tintangha wu ku khumba njhani?

․․․․․

◼ Ntshikilelo lowu vaka kona loko u ehleketa ndlela leyi swichudeni-kuloni swi nga ta angula ha yona loko swi twa tidyondzo ta vukhongeri bya wena.

“A swi olovi ku byela swichudeni-kuloni hi tidyondzo ta vukhongeri bya wena hikuva a wu swi tivi leswaku swi ta ku teka njhani endzhaku ka sweswo. U karhata ni hi mhaka ya leswaku swi ta ku teka u ri xiphunta.”—Carol wa le Hawaii.

“Exikolweni xa sekondari ni xa le henhla, vana va tirhisa swidzidziharisi, va hlanganyela eka timhaka ta masangu ni ku nwa byala. Leswi swi vanga ntshikilelo hikuva a wu swi lavi ku hlekuriwa hi vana va xikolo hikwalaho ka leswi u nga faniki na vona ni hikwalaho ka leswi u hanyaka hi milawu ya Xikwembu.”—Susan wa le United States.

Xana u titwa njhani hi timhaka leti khumbaka tidyondzo ta vukhongeri bya wena?

․․․․․

◼ Swilo swin’wana leswi vangaka ntshikilelo. Fungha xiphiqo lexi ku khumbaka swinene eka leswi nga laha hansi kumbe u xi tsala loko xi nga ri kona eka leswi.

□ Xikambelo lexi u faneleke u xi tsala

□ Ntirho wa xikolo lowu u faneleke u wu endla ekaya

□ Vatswari lava lavaka leswaku u pasela ehenhla

□ Ku lwela ku fikelela pakani ya wena yo pasa ku tlula swichudeni hinkwaswo

□ Vana lava ku xanisaka kumbe ku ku khoma-khoma hi ndlela leyi nga fanelangiki

□ Swin’wana ․․․․․

Magoza Ya Ntlhanu Lama Pfunaka Ku Hunguta Ntshikilelo

A swi nge endleki leswaku u heta xikolo u nga kalanga u hlangavetana ni ntshikilelo wo karhi. Kambe ku tshikileleka ngopfu swi nga heta munhu matimba. Hosi Solomoni wo tlhariha u tsarile a ku: “Ku tshikileriwa ku nga hlanganisa nhloko ya lowo tlhariha.” (Eklesiasta 7:7) Kambe a wu fanelanga u pfumelela ntshikilelo wu ku hlanganisa nhloko. Mhaka-nkulu hileswaku u fanele u kuma ndlela yo lawula ntshikilelo wa wena.

Ku lawula ntshikilelo swi fana ni ku tlakula tinsimbi to endla vutiolori ha tona. Leswaku mutlakuri wa tona a kota ku ti tlakula kahle, u fanele a tilunghiselela kahle a nga si sungula ku ti tlakula. U ti tlakula hi ndlela ya kona naswona u papalata ku tlakula leti tikaka ngopfu. Loko a landzelela magoza lawa, u tiyisa misiha yakwe handle ko tivavisa miri. Hi hala tlhelo, loko a tsandzeka ku landzelela magoza lawa, a nga ha tivavisa misiha kumbe a titshova marhambu.

Hilaha ku fanaka, u nga lawula ntshikilelo lowu u langutanaka na wona kutani u hambeta u endla ntirho lowu u faneleke u wu endla handle ko tivavisa. Njhani? Teka magoza lama landzelaka:

1. Kumisisa leswi ku vangelaka ntshikilelo. Xivuriso xa vutlhari xi ri: “U tlharihile la voneke khombo kutani a tumbela.” (Swivuriso 22:3) Kambe a wu nge tumbeli leswaku ntshikilelo wu nga ku hlaseli loko u nga si swi tiva leswaku kahle-kahle wu vangiwa hi yini. Kutani languta swiphiqo leswi u nga swi fungha eku sunguleni. Hi xihi xiphiqo lexi ku khumbaka swinene?

2. Endla ndzavisiso. Hi xikombiso, loko ku ri leswaku ntirho wo tala wa xikolo lowu u wu endlelaka ekaya wu ku vangela ntshikilelo, kambisisa swiringanyeto leswi kumekaka exihlokweni lexi nge “Vantshwa Va Vutisa—Ndzi Nga Wu Kumisa Ku Yini Nkarhi Wo Endla Ntirho-kaya Wa Xikolo?” lexi nga eka Xalamuka! ya February 8, 2004. Loko u titwa u tshikileleka leswaku u hlanganyela eka timhaka ta masangu ni xichudeni-kuloni, u nga pfuniwa hi xihloko lexi nge “Vantshwa Va Vutisa—Ndzi Nga Endla Yini Loko Munhu A Lava Leswaku Hi ‘Jola’?” lexi nga eka Xalamuka! ya March 2007.

3. Lunghiselela ndlela leyi u nga ta angula ha yona. Loko u tshikileriwa hi ndlela leyi swichudeni-kuloni swi nga ta angula ha yona loko swi twa hi ta vukhongeri bya wena, swa antswa u nga rindzi ku kondza un’wana a ku vutisa ha byona u nga si ehleketa leswaku u ta angula njhani. (Swivuriso 29:25) Kelsey, la nga ni malembe ya 18 u ri: “Mina ndzi pfuniwe hi ku lunghiselela ka ha ri emahlweni swichudeni-kulorhi swi nga si vula nchumu. Ana se a ndzi lunghekile leswaku ndzi ta ti hlamusela njhani tidyondzo ta vukhongeri bya mina.” Aaron wa le Belgium la nga ni malembe ya 18, u endle leswi fanaka. U ri: “Ndzi ehlekete ka ha ri emahlweni hi swivutiso leswi ndzi nga ha vutisiwaka swona, kutani ndzi lunghiselela tinhlamulo ta swona. Loko a ndzi nga endlanga tano, a ndzi nga ta va na xivindzi xo pfula nomu ndzi vulavula hi vukhongeri bya mina.”

4. U nga ha yima-yimi. I swiphiqo switsongo leswi helaka loko u swi ba hi makatla. Kambe ematshan’weni ya sweswo swo ya swi nyanya, swi engetela ntshikilelo wa wena. Hi xikombiso, loko u ri Mbhoni ya Yehovha, ku titivisa to ho suka leswaku u Mbhoni swi nga ku sirhelela. Marchet, loyi sweswi a nga ni malembe ya 20 u ri: “Loko ndzi fika exikolweni lexintshwa, a ndzi fika ndzi sungula bulo hi timhaka leti nga ta ndzi pfulela ndlela yo hlamusela milawu leyi sekeriweke eBibeleni leyi ndzi hanyaka ha yona. Ndzi xiye leswaku loko ndzi hlwela ku titivisa leswaku ndzi Mbhoni a swi ya swi ndzi tikela ku sungula bulo. Swi ndzi pfune ngopfu ku byela van’wana hi milawu ya Bibele, ndzi tlhela ndzi hanya ha yona lembe hinkwaro.”

5. Kombela mpfuno. Hambi ku ri munhu la tlakulaka tinsimbi to endla vutiolori ha tona la nga ni matimba swinene ku ni laha a helelaka kona. Swi tano ni le ka wena. Kambe ndzhwalo lowu a wu boheki ku wu rhwala u ri wexe. (Vagalatiya 6:2) Ha yini u nga vulavuli ni vatswari va wena kumbe Vakreste van’wana lava wupfeke hi mhaka leyi? Va kombe tinhlamulo leti u ti tsaleke eku sunguleni ka xihloko lexi. Burisana na vona hi ndlela leyi va nga ku pfunaka ha yona leswaku u langutana ni yin’wana ya mintshikilelo leyi. Liz wa le Ireland, u byele tata wakwe leswaku yena wa chava ku hlekuriwa hikwalaho ka tidyondzo ta vukhongeri byakwe. Liz u ri: “Siku ni siku tatana a a khongela na mina loko ndzi nga si chika emovheni loko hi fika exikolweni. Sweswo a swi ndzi endla ndzi titwa ndzi sirhelelekile.”

Xana Wu Kona Ntshikilelo Lowunene?

Swi nga ha ku tikela ku swi pfumela, kambe ku titwa u tshikilelekile a swi bihanga. Ha yini? Swi nga ha va swi kombisa leswaku wa hiseka naswona ripfalo ra wena ra tirha. Xiya ndlela leyi Bibele yi n’wi hlamuselaka ha yona munhu loyi a tikombaka a nga ri na ntshikilelo nikatsongo, yi ri: “Wena lolo, u ta etlela ku fikela rini? U ta pfuka rini evurhongweni bya wena? Ku etlelanyana, ku khudzehelanyana, ku khondlanyana mavoko u etlela, kunene vusiwana bya wena byi ta ta ku fana ni munhu la tsendzelekaka, ni ku navela ka wena ku fana ni [xigevenga lexi] hlomeke.”—Swivuriso 6:9-11.

Heidi la nga ni malembe ya 16, u yi veka kahle mhaka leyi. U ri: “Xikolo xi nga vonaka xi ri ndhawu yo biha ngopfu, kambe mintshikilelo leyi u langutanaka na yona kwale ya fana ni leyi u nga ta langutana na yona entirhweni.” Entiyisweni ku lawula ntshikilelo a swi olovi, kambe loko u wu lawula kahle, a wu nge ku vavisi. Kahle-kahle wu nga ku tiyisa.

Swihloko swin’wana leswi nge “Vantshwa Va Vutisa” swi kumeka eka Web site leyi nge, www.watchtower.org/ype

[Nhlamuselo ya le hansi]

SWIVUTISO SWO ANAKANYISISA HA SWONA

◼ I yini leswi nga ha kombisaka leswaku u tshikilelekile?

◼ Ha yini ku langutela leswikulu eka wena ni le ka van’wana swi ta nyanyisa ntshikilelo wa wena?

◼ I vamani lava u nga burisanaka na vona loko u twa leswaku ntshikilelo se wu ku hlaserile?

[Xifaniso lexi nga eka tluka 27]

Ku langutana ni ntshikilelo swi fana ni ku tlakula tinsimbi to endla vutiolori ha tona—loko u ti tlakula hi ndlela leyi faneleke u ta va ni matimba