Mpfuno Lowu Ndzi Nga Wu Rindzelangiki Lowu Kumekaka Eka Xalamuka!
HI MUTSARI WA XALAMUKA! LE BENIN
◼ Loko Noël la nga ni malembe ya 23, a lava ku tshika xikolo kutani a va muchumayeri wa nkarhi hinkwawo, ku nga ntirho wo chumayela lowu endliwaka hi Timbhoni ta Yehovha, maxaka yakwe a ma tivutisa loko a ta swi kota ku kuma mali yo tihanyisa. Swi n’wi tikerilenyana ku kuma ntirho wa nkarhinyana lowu nga ta n’wi nyika nkarhi lowu eneleke wo chumayela. Kutani loko magazini wa Xalamuka! wu humese xihloko lexi nge “Tindlela Ta Ntlhanu To Kuma Ntirho,” Noël u xi hlaye ko tala hi vukheta.a Xana xi n’wi pfunile? Ina, kambe ku nga ri hi ndlela leyi a a yi languterile.
Mukongomisi wa xikolo lexi nga riki xa hulumendhe u vone Noël a ri karhi a chumayela hi yindlu ni yindlu kutani a n’wi vutisa loko a ri Mbhoni ya Yehovha. Mukongomisi yoloye a a lava munhu loyi a nga tirhaka ku dyondzisa, naswona leswi a a xiye vutshila byo dyondzisa lebyi Timbhoni ta Yehovha ti nga na byona, u vutise Noël loko ku ri ni munhu loyi a n’wi tivaka loyi a nga swi tsakelaka ku va mudyondzisi. Loko Noël a vule leswaku a nga tivi munhu, mukongomisi yoloye u n’wi vutisile a ku, “Xana wena a wu nge swi tsakeli?”
Noël a a nga si tshama a tirha tanihi mudyondzisi naswona a a pfa a va ni manghanghamela. Leswi a ku ri xiphiqo eBenin hikuva huvo ya dyondzo a yi lava leswaku loko munhu a lava ku va mudyondzisi a rhanga hi ku kamberiwa loko a nga ri na wona manghanghamela. Mukongomisi yoloye u khutaze Noël a ku, “Wena tikumele xitifiketi ntsena, ntirho u ta wu kuma.”
Noël a a endle nhluvuko eka Xikolo xa Vutirheli bya le Tilweni, lexi ku nga xikolo lexi endleriweke ku pfuna vanhu leswaku va antswisa vuswikoti bya vona byo va swivulavuri swa le rivaleni, naswona xi khomiwa vhiki rin’wana ni rin’wana emavandlheni ya Timbhoni ta Yehovha. Se a a nyikela ni tinkulumo ta le rivaleni evandlheni ra ka vona. Nilokoswiritano, a a chuhile loko a ya eka vakamberi.
Mukamberi u n’wi nyike magazini kutani a n’wi kombela leswaku a hlayela ehenhla ndzimana leyi a yi funghiwe hi muvala wo tshwuka. Noël a a tsake ni swikunwana loko a vona xihloko xa kona lexi nge, “Tindlela Ta Ntlhanu To Kuma Ntirho.” U hlaye ndzimana ya kona hi ku khuluka kutani a kuma xitifiketi.
Endzhaku ka sweswo mukamberi yoloye u vule leswaku nkarhi na nkarhi a a hlaya timagazini ta Timbhoni ta Yehovha. U te: “Timagazini leti ta dyondzisa hakunene, naswona ti tsariwe kahle lerova ndzi tala ku ti tirhisa loko ndzi kambela vanhu.”
Noël u sungule ku dyondzisa, naswona mukongomisi wa xikolo lexi a a lava ku n’wi thola leswaku ni lembe leri landzelaka a tlhela a dyondzisa, kambe se a ku ri na swin’wana leswi Noël a a lava ku swi endla. Haxawa xa kona a a vitaniwe leswaku a ya tirha ehofisini ya Timbhoni ta Yehovha laha sweswi a tirhaka kona.
[Nhlamuselo ya le hansi]