Leti Humaka Eka Vahlayi

Magoza Ya Nkombo Ya Ku Va Mutswari Lonene (August 2007) Magazini lowu a wu ri nhlamulo ya swikhongelo swa mina. Ndzi na n’wana wa nhwanyana la nga ni mune wa malembe loyi a rhandzaka Yehovha, kambe ndza chava ku endla xihoxo tanihi mutswari. Hikwalaho ndzi kombela Yehovha siku ni siku leswaku a ndzi pfuna leswaku ndzi kota ku n’wi letela. Ndza nkhensa swinene leswi mi khathalaka hi hina vatswari.

Y.M.A., Mexico

Swihloko leswi, leswi tlhandlamanaka a swi fana ni ku kuma buku ya nkongomiso leyi vulavulaka hi swilaveko swo karhi swa ndyangu wa hina, a swi vulavula hi timhaka to tala leti a ti ndzi vilerisa! Swi ndzi tiyisekise hilaha ku engetelekeke malunghana ni ndlela leyi Yehovha a khathalaka ha yona hi vanhu va yena. U yingise swikhongelo swa mina a tlhela a vona ni mihloti ya mina naswona wa yi tiva ndlela leyi a ndzi ri lava ha yona rungula leri.

J. M., United States

Eka matluka ma nga ri mangani mi kote ku tsala switsundzuxo ni swiletelo swa nkoka leswi tirhaka hakunene. Hina hi fanele hi landzela switsundzuxo leswi!

E. L., Finland

Xana Ku Va Ni Ntshembo Swi Nga Endla Leswaku U Va Ni Rihanyo Lerinene? (September 2007) Xihloko lexi xi ndzi pfune swinene, tanihi leswi minkarhi yo tala a ndzi tshamela ku tisola hikwalaho ka swiphiqo leswi a ndzi va na swona. Hikwalaho, a ndzi anakanya leswaku a ndzi manana lonene naswona a ndzi tshama ndzi tshikilelekile. Hambileswi swi nga ndzi oloveliki ku va ni ntshembo, rungula leri ri hungute ku vilela ka mina. Ndza nkhensa swinene hikwalaho ka nkhathalelo lowu hi kombisiwaka wona hi swihloko swo fana ni lexi.

A. S., Ecuador

I Khale Vanhu Va Chongorisiwa Hi Ku Pandza Ka Matino (September 2007) Ndzi dokodela wa meno tlhelo mudyondzisi wa vutshunguri bya meno. Ndzi tsakisiwe swinene hi xihloko xa n’wina lexinene lexi tlheleke xi tsariwa kahle. A wu ri nkatsakanyo wo hlamarisa wa matimu ya vutshunguri bya meno. Ndzi byele vanghana va mina vo tala ni vatirhi-kulorhi hi rungula leri.

C. R., United States

Xana Swi Vangiwa Hi Xikwembu? (September 2007) Mina ni vanghana va mina van’wana ha hlangana hi bula hi tindlela leti tirhaka leti hi nga ti tirhisaka loko ku ri ni xiyimo xa xihatla. Hi dya swakudya swo miyeta nyoka, hi kambisisa tinhla letinene leti nga ebokisini leri nge “Xana U Swi Lunghekerile Ku Baleka?” exihlokweni lexi ku vulavuriweke ha xona laha henhla, kutani hi kambisisa swiputsa swa xilamulela-mhangu leswi vanhu va nga ri vangani va hina va swi lunghiseleleke. Hi tlhela hi bula hi nkoka wa ku va ni langutelo leri faneleke loko ku lunghiseleriwa swilo swa xilamulela-mhangu. Ha swi twisisa leswaku ku hlengeleta swilo leswi tirhisiwaka loko ku ri ni mhangu a hi ntirho wa hina wa nkoka tanihi malandza ya Xikwembu. Ku ri na sweswo, ntirho wa hina lowukulu i ku chumayela mahungu lamanene ya Mfumo wa Xikwembu ni ku byela van’wana hi xitshembiso lexi hlamarisaka xa Xikwembu xa misava leyi ku nga ta va ku nga ri na nxungeto wa khombo rihi na rihi—ra ntumbuluko kumbe leri vangiweke hi munhu.

R. G., United States

Sirhelela Vana Va Wena! (October 2007) Ndzi tshame ndzi pfinyiwa loko ndza ha ri ntsongo. Ni sweswi a ndzi si swi kota ku byela vatswari va mina leswi nga humelela. Hikwalaho swihloko leswi swi ndzi chavelerile swinene. Ndza tshemba hi mbilu ya mina hinkwayo leswaku vatswari va ta hlaya magazini lowu kutani va sirhelela vana va vona. Ndza n’wi nkhensa swinene Yehovha leswi a hi nyikeke rungula leri leri lavekaka. Swihloko leswi swi hi chavelerile swinene hina lava tshameke va pfinyiwa.

R. I., Japani