Rhumbu Ro Fambisa Ntswamba

Xana Ri Lo Endliwa?

◼ Loko u tshame u vona nyimpfu, mbuti kumbe homu loko yi tswala, a swi kanakanisi leswaku u hlamarisiwe hi leswaku xifuwo lexa ha ku tswariwaka xi hatla xi yima hi milenge leswaku xi ya mama. Eka swifuwo leswitsongo leswi gayelaka, swo tanihi tinyimpfu, swimbutana ni swirhodyana ku ni nchumu wun’wana wo hlamarisa lowu nga vonakiki.

Xiya: Tihomu ti ni khwiri leri avanyisiweke hi swiyenge swa mune leswaku ti kota ku gayela byanyi ni furu. Kambe swirhodyana leswa ha ku tswariwaka swi hanya hi ntswamba ntsena, hikwalaho a swi boheki ku gayela. Hikwalaho loko xirhodyana xi mama ku pfuleka rhumbu rin’wana ro hlawuleka leri endlaka leswaku ntswamba wu nghena hi ku kongoma eka xiyenge xa vumune xa khwiri.

Loko ntswamba a wo nghena eka xiyenge xo sungula xa khwiri lexi vuriwaka rumen, xirhodyana a xi ta vaviseka hikuva xiyenge xexo xi gayela swakudya leswi tikaka ku swi gayela xi swi borisa hi tibaktheriya. Ntswamba lowu boleke wu humesa gasi leyi swirhodyana leswa ha ku tswariwaka swi tsandzekaka ku yi humesa emirini. Hambiswiritano, loko swi nwa ntswamba, ku nga khathariseki leswaku swo wu mama eka mana wa swona kumbe swi wu nwa ebakitini, nomu wa xiyenge xo sungula xa khwiri wa pfaleka.

Lexi hlamarisaka, loko swi nwa mati ku humelela nchumu lowu hambaneke. Swi lava mati yo tala eka xiyenge xo sungula xa khwiri leswaku tibaktheriya ni switsongwatsongwana swi tswalana, swi lunghekela nkarhi lowu swirhodyana swi nga ta sungula ku dya furu. Hambileswi ntswamba wu yaka hi ku kongoma eka xiyenge xo hetelela xa khwiri, mati ma nghena eka xiyenge xo sungula xa khwiri. Rhumbu leri hlamarisaka ra xirhodyana ri hundzisa ntswamba ntsena!

U anakanya yini? Xana rhumbu ro hundzisa ntswamba ri lo tiendlekela? Kumbe ri endliwe hi Muvumbi wo tlhariha?

[Dayagramu/Xifaniso lexi nga eka tluka 13]

(Leswaku u vona rungula leri hleriweke hi ku helela, vona nkandziyiso wa kona)

Ntswamba wu hundza swiyenge swinharhu swa khwiri ra xirhodyana

[Dayagramu]

Rhumbu leri ntswamba wu hundzaka ha rona

1 Rumen

2 Reticulum

3 Omasum

4 Abomasum (xiyenge xo hetelela xa khwiri)