Mikateko Leyikulu Ku Tlula Rifuwo

JON a a tirha ntirho lowu hakelaka swi nyawula le United States. Hambiloko a ha ri jaha a a famba emisaveni hinkwayo naswona mali o yi nusa kunene. Yena ni nkatakwe a va ri ni yindlu yo saseka swinene naswona a va hanya emafurheni. Vanhu vo tala a va va teka va katekile.

Xiya xikombiso xin’wana. Eka vanhu vo tlula 5 000 lava endleke swikombelo swo dyondzela ntirho, Kostasa u ve un’wana wa vanhu va 80 ntsena lava hlawuriweke ku ya dyondzela ntirho ebangi leyi dumeke ya le Yuropa. Endzhaku ka malembe ma nga ri mangani, u kume mintirho leyinene ngopfu, laha a nga hetelela a endliwe murhangeri wa ndzawulo leyikulu ya bangi yin’wana. Loko a tshika ntirho wolowo leswaku a ya sungula khampani ya yena, a a kuma mali yo tala swinene hi lembe ku tlula leyi vanhu vo tala va yi kumaka vutomi bya vona hinkwabyo. A a titwa a katekile.

Kambe, vavanuna lavambirhi va khorwiseka leswaku ku ni mikateko yo tlula rifuwo ra swilo leswi vonakaka. Hi xikombiso, namuntlha Jon u dyondzisa vanhu Bibele a va pfuna leswaku va va ni vuxaka ni Xikwembu. Jon u ri: “Ndzi swi vonile leswaku rifuwo ra swilo leswi vonakaka a ri wu tisi ntsako. Loko u ri karhi u ri hlongorisa naswona u lava leswaku ri nga ku lahlekeli, u sala u nga ha ri na nkarhi. Hi hala tlhelo, loko u hanya hi milawu ya Bibele leyi kongomisaka swi endla leswaku u kuma mikateko yo tala swinene, yo tanihi ku va ni ntsako evukatini, ku va ni ku rhula ka mianakanyo ni ku va ni ripfalo lerinene.”

Kostas na yena u ri: “Xikwembu a xi lavi leswaku hi tiyimisela ku va ni swilo swo tala leswi vonakaka. Ndza tiyiseka leswaku xin’wana ni xin’wana lexi xi hi nyikaka xona ku engetela eka swilo leswi hi swi pfumalaka swa siku ni siku, swi endla leswaku hi boheka ku swi tirhisa hi ku pfumelelana ni ku rhandza ka xona.” Kostas ni ndyangu wakwe va ha ku sungula ku dyondza ririmi rin’wana leswaku va ta dyondzisa vanhu vo tala milawu leyi kongomisaka ya le Bibeleni. U ri: “Hi dyondze leswaku ku nyika swi hi endla leswaku hi tsaka ku tlula loko hi nyikiwa.”—Mintirho 20:35.

Hakunene, Jon na Kostas va dyondze leswaku ku katekisiwa hi tlhelo ra moya i swa nkoka swinene ku tlula ku va ni rifuwo ra swilo leswi vonakaka. Daniel Gilbert, profesa wa le Harvard, u vula leswaku vativi va mianakanyo “va hete makume ya malembe va ri karhi va kambisisa loko rifuwo ni ntsako swi fambisana, naswona va gimete hi ku vula leswaku rifuwo ri endla leswaku munhu a tsaka loko ri n’wi susa evuswetini kutani a va ni mali.” Kambe u tlhele a ku: “Loko munhu se a ri ni mali a ra ha n’wi endli a tsaka.”

Dyondzo Leyi Talaka Ku Dyondziwa Ku Vava

Munhu un’wana loyi a kambisisaka swilo hi vukheta u te: “Loko munhu a kala a va ni mali hambiloko o engeteleriwa muholo, sweswo a swi n’wi endli a va ni ntsako.” Eku sunguleni ka lembe-xidzana leri hundzeke, muviki un’wana u yi twisise kahle mhaka yoleyo loko a vulavurisana na Andrew Carnegie, loyi a a ri kona loko ku sunguriwa tifeme leti endlaka tinsimbi, loyi hi nkarhi wolowo a a ri un’wana wa van’wankumi emisaveni hinkwayo. Carnegie u byele muviki yoloye a ku: “Vanhu a va fanelanga va navela rifuwo ra mina. Xana rifuwo ra mina ri nga ndzi pfuna njhani? Ndzi ni malembe ya 60 naswona a ndza ha swi koti ku gayela swakudya. Loko a ko va ni munhu loyi a nga kotaka ku ndzi tlherisela evuntshweni a tlhela a ndzi nyika rihanyo lerinene, a ndzi ta n’wi nyika timali ta mina hinkwato ta timiliyoni.”

Muviki yoloye u tlhele a ku: “Nkul. Carnegie u lo na swi pfuketana a hundzuluka, ivi a vula hi rito ra le hansi naswona a hele matimba hi ndlela leyi nga hlamuselekiki, a ku, ‘Loko a swi koteka a ndzi ta xavisa swilo swa mina hinkwaswo leswaku ndzi tlhela ndzi va ni vutomi lebyinene.’” N’wankumi un’wana loyi a fuweke swinene la vuriwaka J. Paul Getty, loyi a fuweke hikwalaho ko xavisa oyili, na yena endzhaku ka nkarhi u pfumerile a ku: “Mali a yi tisi ntsako nikatsongo. Kumbexana yi hetela munhu ntsako.”

Swi nga ha va swi fanerile loko u pfumelelana ni mutsari wa Bibele loyi a kombeleke a ku: “U nga ndzi nyiki vusiwana kumbe rifuwo. Ndzi tshike ndzi dya swakudya leswi ndzi averiweke swona, leswaku ndzi nga xurhi kutani ndzi ku landzula ndzi ku: ‘Yehovha i mani?’ nileswaku ndzi nga vi xisiwana kutani ndzi yiva, ndzi thyakisa vito ra Xikwembu xanga.”—Swivuriso 30:8, 9.

Hosi Solomoni wa le Israyele wa khale u te: “Ndzi ve lonkulu ngopfu ni ku tlakuka ku tlula mani na mani la tshameke a va kona eYerusalema emahlweni ka mina.” Kambe, u tlhele a ku: “Hinkwaswo a ku ri vuhava ni ku hlongorisa mheho.” Nakambe Solomoni u te: “Nkateko wa Yehovha—hi wona lowu fuwisaka, naswona a nga engeteli ku vaviseka eka wona.”—Eklesiasta 2:9-11; 5:12, 13; Swivuriso 10:22.

Ndlela Yo Kuma Mikateko Leyi Nga Heriki

Swi le rivaleni leswaku hi nga kuma ntsako wa xiviri ni lowu nga heriki loko se hi ri ni vuxaka ni Xikwembu. Loko hi rhangisa Xikwembu, hi ta kuma leswaku swilo hinkwaswo leswi hi swi endlaka evuton’wini bya hina swa tsakisa naswona swa vuyerisa swinene.

Lexi tsakisaka, hi nga vula leswaku mali a yi nge tshameli ku endla leswaku vanhu va vilela. Bibele ya hi tiyisekisa leswaku enkarhini lowu taka mabindzu lawa vanhu va kona va nga ni makwanga naswona va dyelelaka van’wana ma ta heriseriwa makumu. (1 Yohane 2:15-17) Emafambiselweni lamantshwa ya Xikwembu ya swilo lama nga ta landzela ku ta va ku ri ni milawu leyinene ya xona leyi kongomisaka. Misava yi ta hundzuriwa yi va paradeyisi tanihi leswi a ku ri xikongomelo xa Xikwembu loko xi veka mpatswa wo sungula eka yona. Kunene swi ta tsakisa ku vona vanhu emisaveni hinkwayo va ri lava tsakeke, lava rhuleke ni lava rhandzanaka!—Esaya 2:2-4; 2 Petro 3:13; 1 Yohane 4:8-11.

Vutomi hi nkarhi wolowo byi ta va byi tsakisa naswona a byi nge phirhi. Ku engetela eka ku va ni vuxaka ni Xikwembu, xi ta hi katekisa hi swilo leswi vonakaka loko xi hetisisa xikongomelo xa xona xo sungula xa leswaku vanhu va hanya hilaha ku nga heriki emisaveni leyi nga paradeyisi. Ha tiyisekisiwa leswaku ku ta va ku ri ni ndzalo ya swakudya, ndhawu yo tshama eka yona naswona vanhu hinkwavo va ta va ni ntirho lowu enerisaka. Vusweti byi ta va byi heriseriwe makumu.—Pisalema 72:16; Esaya 65:21-23; Mikiya 4:4.

Munhu un’wana ni un’wana loyi a kombisaka ripfumelo leri humaka  embilwini eka Yehovha, Xikwembu lexi tsaleke Bibele, a nge khomisiwi tingana. (Varhoma 10:11-13) Hikwalaho, i vutlhari ku hlakulela ku kuma mikateko leyikulu ku tlula rifuwo sweswi!—1 Timotiya 6:6-10.

[Nhlamuselo ya le hansi]

[Marito lama tshahiweke exihlokweni lama nga eka tluka 8]

Loko hi rhangisa Xikwembu, vutomi bya hina byi ta vuyerisa swinene

[Xifaniso lexi nga eka tluka 8]

Ku tirhisa mali hi vutlhari swi nga endla leswaku vutomi byi tsakisa swinene