Xibukwana Xa Mina Xa Pinki
Hi ku vula ka Cynthia Newell
LOKO ndza ha ri ni malembe ya nkombo, xinhwanyatana xin’wana lexi a ndzi famba na xona hi bazi ra xikolo le Shreveport, eLouisiana, le U.S.A., xi ndzi nyike xibukwana xa pinki lexi nge Listening to the Great Teacher. Xi vule leswaku xi ta ndzi xavisela xibukwana xolexo hi tisente ta 50. Hikwalaho xi te ekaya ka hina ivi hi hlayela tisente ta 50.
A ndzi nga lavi ku hambana ni xibukwana xolexo xa pinki. Endzhakunyana ka loko ndzi xi kumile ndzi sungule ku vabya ivi ndzi yisiwa exibedlhele. Ndyangu wa ka hina a wu ndzi chavelela hi ku ndzi hlayela xibukwana xa mina lexi ndzi xi rhandzaka. Kambe, loko ndzi ri karhi ndzi kula a ndzi nga ha xi hlayi ngopfu hikuva a xi tsaleriwe vana. Xibukwana xexo a xi ndzi dyondzise swilo swa nkoka, kambe se a ndzi lava vutivi lebyi engetelekeke. Ndzi sungule ku ya etikerekeni to hambana-hambana vhiki na vhiki ndzi ri karhi ndzi lava tinhlamulo leti humaka eBibeleni ta swivutiso swa mina. Hambiswiritano, a ndzi ti kumanga tinhlamulo leti ndzi enerisaka.
Loko se ndzi ri exikolweni xa le henhla, vukhongeri a ndzi nga ha byi teki byi ri bya nkoka hambileswi a ndza ha swi navela ku tiva Bibele naswona a ndzi hlaya Bibele ya mina nkarhi na nkarhi. Siku rin’wana ndzi xiye leswaku mudyondzi-kulorhi un’wana a a nga yimbeleli risimu ra rixaka. Ndzi n’wi vutisile leswaku ha yini a nga yimbeleli, hiloko a ku, “Se ndzi tinyiketele eka Yehovha, hikwalaho xana ndzi nga tinyiketela njhani eka Xikwembu ni le ka mujeko hi nkarhi wun’we?” Mhaka yoleyo a yi twala! Ndzi tivutisile, ‘Kambe i mani Yehovha?’
Xivutiso xin’wana ni xin’wana lexi a ndzi xi vutisa, mudyondzi-kulorhi a a ndzi hlamula hi ku tirhisa Bibele. Ndzi tivutisile: ‘Xana u swi dyondze rini leswi? Hi tintangha; kambe yena u tiva Bibele hinkwayo!’ U te: “Ndzi dyondze Bibele eHolweni ya Mfumo.” Ndzi pfumele hi mbilu hinkwayo loko a ndzi rhamba leswaku ndzi ya enhlanganweni hi Sonto. A ndzi ye etikerekeni hinkwato leti nga kona edorobeni, kambe a ndzi swi tivi leswaku swi te njhani leswaku ndzi nga fiki eHolweni ya Mfumo ya Timbhoni ta Yehovha. Hi Sonto yoleyo ndzi swi tivile leswaku ndzi kume ndhawu leyi dyondzisaka ntiyiso wa le Bibeleni.
Loko nhlangano wu herile ndzi ye laha ku kumekaka tibuku, naswona loko ndzi ku hahlu, mahlo hiloko ndzi vona xibukwana xa mina xa pinki! Se a ku hundze malembe ya khume ndzi ri ni xibukwana lexi ndzi xi xaviseriweke hi xinhwanyatana xin’wana ebazini, naswona se a ndzi rivele leswaku ndzi xi kume eka mani. Hiloko ndzi namba ndzi tsundzuka leswaku a ndzi xi kume eka Nancy, loyi a ndzi rhambeke ku ta enhlanganweni wolowo!
Endzhaku ka sweswo, ndzi sungule ku dyondzeriwa Bibele vhiki na vhiki naswona ndzi endle nhluvuko hi ku hatlisa. A a ndzi dyondze swo tala eka xibukwana xa mina xa pinki lerova leswi ndzi swi dyondzeke loko ndzi ri karhi ndzi dyondzeriwa Bibele ndzi hatle ndzi swi twisisa. Swi nga si ya kwihi ndzi nyiketele vutomi bya mina eka Yehovha naswona ndzi khuvuriwe hi 1985 ndzi ri ni malembe ya 18. Hi nkarhi wolowo, Nancy u rhurhele eFlorida, hiloko hi hambanisa sweswo.
Endzhaku ka malembe ma nga ri mangani, ndzi tekiwile. Hi 1991, mina ni nuna wa mina Drew hi nghenele ntirho wa nkarhi hinkwawo wo chumayela le xidorobanini xa le vuxeni bya Texas. Kambe xana a ku humelele yini hi Nancy? A ndzi nga swi tivi. Hiloko siku rin’wana nivusiku loko ndzi ri karhi ndzi hlaya Xihondzo xo Rindza xa December 1, 1992, ndzi huwelela ndzi ku: “Hi loyi Nancy! Ndzi n’wi kumile!” A a ri exifanisweni xa vanhu lava ha ku thwasaka exikolweni xa Giliyadi. Yena ni nuna wa yena Nick Simonelli, a va averiwe ku ya aEcuador, le Amerika Dzonga.
Hi 2006 mina ni nuna wa mina hi endle xikombelo xo ya tirha eka matsima ya Timbhoni ta Yehovha yo aka ematikweni yo hambana-hambana. A hi tsake swinene loko hi twa leswaku xiavelo xa hina xo sungula a ku ri ku ya engetela miako ya rhavi ra le Ecuador! Hi siku ra mina ro sungula erhavini ra le Ecuador, Nancy u tile kwalaho. A a endzele erhavini hi siku rero. Hi vonanile hiloko hi angarhana—a hi tlhele hi hlangana endzhaku ka malembe ya 32 ndzi kume xibukwana xa mina xa pinki. Ndza n’wi nkhensa Yehovha hikwalaho ka xibukwana xolexo ni hikwalaho ka xinhwanyatana lexi ndzi nyikeke xona.
[Bokisi/Swifaniso leswi nga eka tluka 23]
TIBUKU LETI PFUNEKE VANHU VA TIMILIYONI
Hi 2003, endzhaku ka loko buku leyi nge Listening to the Great Teacher yi ri ni malembe ya 32 yi kandziyisiwile, ku humesiwe buku yin’wana leyi pfuxetiweke. Buku ya kona hi leyi nge Dyondza Eka Mudyondzisi Lonkulu. Namuntlha ku kandziyisiwe tikopi leti tlulaka 65 wa timiliyoni ta buku leyi, leyi vulavulaka hi tidyondzo ta Yesu hi tindzimi leti tlulaka 100. U nga tikumela buku leyi nge Dyondza Eka Mudyondzisi Lonkulu eka Mbhoni ya Yehovha leyi tshamaka endhawini ya ka n’wina.
[Swifaniso leswi nga eka tluka 23]
Swifaniso leswitsongo: Loko ha ha ri vana
Cynthia
Nancy
Xifaniso lexikulu: Hi ri erhavini ra le Ecuador endzhaku ka malembe yo tala