“Ndzi Lava Ku Dlaya Vukati!”

Yindlu leyi yi hlakarile naswona swa tikomba leswaku a yi khathaleriwi. I khale yi pona swidzedze kambe swin’wana swa swona a swi yi hlakata. Sweswi xivumbeko xa yona a xa ha tiyanga naswona swi tikomba onge yi ta mbundzumuka ku nga ri khale.

XIYIMO xa yindlu leyi xi hlamusela ndlela leyi vukati byo tala byi nga ha yona namuntlha. Xana u tshame u ehleketa leswaku vukati bya wena byi le ku hohlokeni ku fana ni yindlu leyi? Loko swi ri tano, tiyiseka leswaku ku hava mpatswa lowu nga riki na swiphiqo. Entiyisweni, Bibele yi swi veka erivaleni leswaku lava nghenelaka vukati va ta va ni “switlhavi ni nhlomulo.”—1 Vakorinto 7:28, The New English Bible.

Ntlawa wun’wana wa vakambisisi wu kandziyise ntiyiso wa marito wolawo hi ku hlamusela vukati tanihi “ntirho lowu nga ni khombo swinene lowu nkarhi na nkarhi wu endliwaka hi vanhu vo hlayanyana lava xiximekaka emugangeni wa ka hina.” Wu tlhele wu ku: “Hambileswi vanhu lava ha ku nghenelaka vukati va tsakaka naswona swi tikombaka onge swi ta va fambela kahle kambe vukati byi nga va nchumu lowu hetaka matimba ni lowu vavisaka swinene evuton’wini bya munhu.”

Ku vuriwa yini hi vukati bya wena? Xana byi hlakatiwa hi xin’wana xa swiphiqo leswi landzelaka kumbe swo tala swa swona?

Ku tshamela ku holova
Ku tlhavana hi marito
Ku nga tshembeki evukatini
Ku hlundzukelana

Loko vukati bya wena byi tikomba byi tsanile naswona byi ri kusuhi ni ku hohloka, i yini leswi u faneleke u swi endla? Xana ku dlaya vukati hi wona ntlhantlho wa swiphiqo?

“NCHUMU LOWU A WU NGA TOLOVELEKANGA KAMBE SWESWI I TSHAMELO-MAXELO”

Ematikweni man’wana, nhlayo ya vanhu lava dlayaka vukati yi tlakuke hi ku hatlisa. Hi xikombiso, ku ringana malembe yo tala, ku dlaya vukati le United States a swi nga tolovelekanga nikatsongo. Barbara Dafoe Whitehead u tsale ebukwini yakwe leyi nge The Divorce Culture, leswaku endzhaku ka 1960 “nhlayo ya lava dlayaka vukati yi tlakuke hi ku hatlisa swinene.” U te: “Nhlayo ya kona yi phindhiwe kambirhi emalembeni ya khume ntsena naswona yi hambete yi tlakuka kukondza ku va eku sunguleni ka va-1980, laha yi nga tshama yi tlakukile ku tlula ya le matikweni lama hluvukeke ya le Vupela-dyambu. Hikwalaho ka ku tlakuka koloko hi xitshuketa, ku dlaya vukati ku sungule ku va tshamelo-maxelo emalembeni ya 30 ntsena hambileswi eku sunguleni a ku ri nchumu lowu a wu nga tolovelekanga eka Maamerika.”