Vaendli Va Swilo Va Kope Eka Ntumbuluko

“Ndleve leyi twaka ni tihlo leri vonaka—Yehovha u swi endle haswimbirhi.”—Swivuriso 20:12.

MAHLO ya wena ma fana ni tikhamera letitsongo ta thelevhixini. Ma hundzula swilo leswi u swi vonaka kutani ma swi rhumela hi nsiha lowu vuriwaka optic nerve lowu yaka endzhaku ka byongo, laha swilo leswi u swi voneke swi cinciwaka kona swi va swifaniso.

Tihlo ra hlamarisa hambileswi ri nga ritsongo swinene. Ri ringana timilimitara ta 24 ntsena naswona ri tika tigiramu ta 7,5 kambe ri endliwe hi vutshila lebyikulu. Hi xikombiso, tihlo ra wena ra swi kota ku cinca ndlela leyi ri vonaka ha yona loko u ri endhawini leyi nga munyama ni leyi nga ni ku vonakala. Loko wo heta timinete ta 30 ekamareni leri nga ni munyama, mahlo ya wena ma nga ha chava ku vonakala swinene.

I yini leswi endlaka leswaku u kota ku vona kahle loko u ri endhawini leyi nga ni ku vonakala? Tihlo ra wena ri ni tisele to tala ngopfu leti tirhaka kahle endhawini leyi nga ni ku vonakala ku tlula tikhamera to tala ta vhidiyo. Nakambe to tala ta tisele teto ti le ndhawini leyitsongo leyi nga exikarhi ka retina leyi vuriwaka fovea, leyi endlaka leswaku hi swi vona kahle swilo. Leswi u kotaka ku vona swilo swo hlayanyana hi ku tsopeta ka tihlo, u nga ha ehleketa leswaku i tihlo hinkwaro ri vonaka. Lexi hlamarisaka, fovea ya tihlo ra wena yi ringana ni hiko leyi nga emakumu ka xivulwa lexi.

Swifaniso swi suka eka tisele leti hundzisaka ku vonakala swi ya eka tisele ta ku twa leti nga ekusuhi ni tisele ta byongo leti endlaka leswaku u vona swifaniso. Kambe tisele ta ku twa a to hundzisa swifaniso ntsena. Ta swi kambisisa, ti hluta rungula ra nkoka ni ku bakanya rungula leri nga pfuniki nchumu.

Xiphemu xa byongo bya wena lexi tirhaka ku vona xi fana ni muchini lowu rharhanganeke wo tlanga vhidiyo. Xi kambisisa swifaniso hi vukheta ivi xi swi pandza swi va mivala ya xisekelo, leyi yona yi nga ta ku pfuna ku hambanisa mivala yo tala swinene. Byongo bya wena byi tlhela byi hambanisa leswi mahlo ya wena mambirhi ma swi vonaka leswaku u ta kota ku xiya leswaku swi le kule ku fikela kwihi.

Loko mahlo ya wena ma vona vanhu lava nga ekule ma sungula ku vulavula ni byongo lebyi ku pfunaka ku vona kahle leswaku i vamani. Mahlo ya wena ma kota ku vona vuxokoxoko hinkwabyo bya swikandza sweswo ivi ma byi pimanisa ni bya leswi nga emiehleketweni ya wena ku ku pfuna hi ku tsopeta ka tihlo ku vona leswaku i vanghana va wena. Xana sweswo a swi hlamarisi hakunene?

[Xifaniso lexi nga eka tluka 7]

Ndlela leyi tihlo ri kambisisaka rungula ha yona yi tiyisekisa leswaku ri endliwe hi vutshila lebyikulu