Xana U Lava Nkarhi Lowu Engetelekeke?

LOKO swo tala swa swivutiso leswi u swi fungheke ku ri xa vumbirhi kumbe xa vunharhu eka leswi nga exihlokweni lexi, a swi kanakanisi leswaku u lava nkarhi lowu engetelekeke. Xiphiqo xexo a xi na wena wexe. Etindhawini to tala vanhu va boheka ku endla swilo leswi faneleke swi endliwa, naswona swi nga ha endleka swilo sweswo swi nga fambisani nikatsongo ni leswi nga swa nkoka hakunene eka vona. Ematshan’weni ya sweswo, ku nga ha va ku ri swilo leswi lavaka ku endliwa hi nkarhi wolowo, swo tanihi ku lunghisa movha, ku endla leswi laviwaka hi muthori wa vona ni ku khathalela swikavanyeto leswi ngo na swi pfuketana swi humelela. Kutani loko u ri karhi u khathalela swikavanyeto swin’wana ni swin’wana leswi vaka kona, u nga ha vona onge a wu koti ku lawula ndlela leyi nkarhi wa wena u wu tirhisaka ha yona. U nga ha ehleketa leswaku u tshama u khomekile lerova a wu swi koti ku tiphina hi vutomi.

Kutani u tibyela leswaku xiyimo lexi xi ta hundza. Vutomi byi ta hetelela byi famba kahle kutani u kuma nkarhi wo endla swilo leswi hakunene swi nga swa nkoka eka wena, leswi ku tsakisaka ni leswi endlaka leswaku vutomi bya wena, bya ndyangu wa wena ni bya van’wana byi va ni xikongomelo. Kambe sweswo swi ta endleka rini? Xana swi tikomba onge u ta kuma nkarhi lowu engetelekeke namuntlha? Xana u ta wu kuma vhiki leri? Xana u ta wu kuma n’hweti leyi taka?

Entiyisweni, a swi tshembisi leswaku misava leyi yi nga cinca. Kambe u nga swi kota ku tixavela nkarhi. U nga swi endlisa ku yini sweswo?

[Bokisi leri nga eka tluka 3]

U tala ku wu kuma rini nkarhi wo endla swilo leswi nga swa nkoka hakunene eka wena?

◯ Siku ni siku

◯ Hi mahelo-vhiki

◯ A wu wu kumi nikatsongo

Hi siku ro karhi, xana u

◯ Endla leswi u hleleke ku swi endla?

◯ Endla swilo leswi u lerisiweke ku swi endla nkarhi na nkarhi leswi kavanyetaka mintirho ya wena?

◯ Boheka ku hatla u endla mintirho yin’wana ni yin’wana leyi ngo na swi pfuketana yi humelela?

Hi siku ro karhi, xana u

◯ Ehleketa leswaku wa swi kota ku lawula leswi endlekaka evuton’wini bya wena?

◯ Titwa u sindzisiwa ku endla mintirho leyi nga pfuniki nchumu?

◯ Titwa u endlisiwa mintirho yo hambana-hambana handle ko tilawula?

Loko siku ri pela, xana u va u

◯ Swi endlile swilo swa nkoka?

◯ Wu hetile ntirho wa nkoka hambileswi u nga ha vaka u nga wu endlanga kahle?

◯ Nga wu kumanga nkarhi wo endla swilo swa nkoka hakunene?

Hakanyingi u titwa njhani loko siku ri pela?

◯ U titwa u tsakile naswona u enerisekile

◯ U titwa u nga tsakanga, u karhele naswona u karhatekile

◯ U titwa u hele matimba