“U Ve Ni Langutelo Lerinene”

● Camila u ni vuvabyi bya ku kayivela ka tisele to tshwuka ta ngati, swiphiqo swa fambiselo ra misiha ni ku nga kuli kahle. Xisweswo, loko a ri ni malembe ya nhungu a a lehe tisentimitara ta 75 ntsena. Vatswari va Camila, lava nga Timbhoni ta Yehovha, va fambe na yena eka nhlangano wa swa vutshunguri lowu a wu khomeriwe eholweni ya mintlango edorobeni leri va tshamaka eka rona le Argentina. Va fike va tshama eka layini ya vumbirhi emahlweni ka xiteji naswona a ku ri ni vanhu va 500.

Loko dokodela a ri karhi a vulavula, u kombetele eka Camila tanihi n’wana la nga ni rihanyo lerinene. Leswi a nga swi tivi leswaku n’wana yoleyo u ni malembe mangani nileswaku xiyimo xakwe xa rihanyo xi njhani, u vutise a ku: “U ni malembe mangani n’wana loyi?”

Marisa, mana wa Camila, u hlamule a ku: “U ni malembe ya nhungu.”

Dokodela u vutise a ku: “Xana u ri u ni tin’hweti ta nhungu?”

Marisa u hlamule a ku: “E-e, malembe ya nhungu.”

Leswi dokodela loyi a a lava ku tiva leswi engetelekeke, u vitane manana ni n’wana wakwe leswaku va ya exitejini leswaku va ta hlamula swivutiso swin’wana. Endzhaku ka loko Marisa a hlamusele minkambisiso leyi madokodela ma yi endleke eka Camila ni matshungulelo lawa ma ringeteke ku ma tirhisa, dokodela loyi u te: “Ku ni vamanana lava rilaka hileswi vana va vona va khomiweke hi mukhuhlwana lowu tolovelekeke. Kambe wena u ve ni langutelo lerinene hambileswi se ku hundzeke malembe ya nkombo madokodela ma ringeta ku tshungula Camila ni ku endla hinkwaswo leswi nga ematimbeni ya wona. U swi kotise ku yini ku va ni langutelo rero?”

Loko Marisa a hlamula xivutiso xexo, u byele vayingiseri hi ta ntshembo wakwe lowu sekeriweke eBibeleni wa misava leyintshwa yo lulama, laha mavabyi ni ku xaniseka hinkwako hambi ku ri rifu hi roxe, swi nga ta herisiwa. (Esaya 33:24; Nhlavutelo 21:3, 4) Eku heteleleni, Marisa u vulavule hi vuxaka lebyi Timbhoni ta Yehovha ti byi tsakelaka bya ku va ni vamakwavo emisaveni hinkwayo naswona u hlamusele ndlela leyi ku rhandzana ka vona ku pfunaka Timbhoni leswaku ti tiyisela miringo ni swiphiqo swin’wana leswi vaka kona evuton’wini.—Yohane 13:35.

Loko nhlangano lowu wu hela, wansati un’wana u ye eka Marisa kutani a n’wi kombela leswaku a n’wi byela leswi engetelekeke malunghana ni tinhla leti a vulavuleke ha tona. Leswi wansati loyi a a tiyimisele ku dyondza, u amukele dyondzo ya le kaya ya Bibele ya mahala, leyi Timbhoni ta Yehovha emisaveni hinkwayo ti yi fambiselaka vanhu lava swi lavaka hi mbilu hinkwayo ku twisisa Bibele ni xikongomelo lexi hlamarisaka xa Xikwembu hi vanhu.

[Xifaniso lexi nga eka tluka 25]

Camila wa malembe ya nhungu swin’we ni mana wakwe Marisa