Ta Rivala

“Ku va presidente wa le United States swi tika lerova munhu a vona nkoka wo khongela.”—BARACK OBAMA, PRESIDENTE WA LE UNITED STATES OF AMERICA.

Loko vanhu va le Argentina lava nga exikarhi ka malembe ya 10 na 24 va vutisiwa leswaku i yini lexi va nga xi endlaka ku kombisa leswaku va tinyungubyisa hi tiko ra ka vona, 56 wa tiphesente ta vona va vule leswaku va nga ambala xikipa xa xipano xa bolo ya milenge xa tiko.—LA NACIÓN, ARGENTINA.

Vuyelo bya ndzavisiso lowu endliweke byi kombisa leswaku mphakelo wa swakudya lowu endlaka tiphesente ta 20 wa tlangisiwa emisaveni hinkwayo, naswona mali ya swona yi endla kwalomu ka 1,3 wa tibiliyoni ta ti thani hi lembe.”—FOOD AND AGRICULTURE ORGANIZATION OF THE UNITED NATIONS, ITALY.

“Namuntlha tinyimpi ni swiviko swa tinyimpi swi tate misava hinkwayo, kutani masocha ya tiko ra rikwavo ma fanele ma tshama ma lunghekile leswaku ma ta sirhelela vanhu ni swilo hinkwaswo swo kwetsima leswi valala va swi tekaka swi nga pfuni nchumu.”—PATRIARCH KIRILL, HEAD OF THE RUSSIAN ORTHODOX CHURCH.

Nhlayo ya timhangu leti vangiwaka hi ntlimbano wa timovha leyi vikiweke hi khampani ya ndzindza-khombo le Jarimani hi 2010 yi kombisa leswaku timhangu leti ti endleke exikarhi ka awara ya nkombo ni ya nhungu nimixo. Mutirhi un’wana wa le ka khampani leyi u te: “Nchumu wun’wana wa nkoka lowu nga sivelaka timhangu leti i ku va munhu a suka ka ha ri ni nkarhi loko a ya entirhweni nimixo.”—PRESSEPORTAL, GERMANY.

Vantshwa Lava Nga Varhangeri eMalaysia

Mphikizano wa le ka TV lowu dumeke swinene eMalaysia wu ni nhloko-mhaka leyi vulavulaka hi ku hlawuriwa ka murhangeri lonene kumbe murhangeri wa vukhongeri bya Mamoslem. Filimi ya nongonoko lowu, lowu nga ni nhloko-mhaka leyi nge “Imam Muda,” kumbe “Murhangeri la ha Riki Muntshwa,” yi tekiwe eKuala Lumpur. Vantshwa lava nghenelaka mphikizano lowu, lava nga exikarhi ka malembe ya 18 na 27 naswona va humaka eka mindhavuko yo hambana-hambana, va humesiwa ha un’we un’we kukondza ku sala un’we. Masagwadi lawa va ma kumaka ma katsa mali ni movha lowuntshwa, kambe muwini u tlhela a nyikiwa ntirho wo va murhangeri, a nyikiwa bazari leswaku a ya dyondza eSaudi Arabia a tlhela a hakeleriwa leswaku a teka riendzo ra swa vukhongeri a ya eMecca. Lava nghenelaka mphikizano lowu va fanele va yi tiva kahle mintirho ya murhangeri, va swi kota ku yimela vukhongeri, va tiva timhaka le ta ha riki eminon’wini ya vanhu va tlhela va tshaha ni Koran. Musunguri wa nongonoko lowu u vule leswaku xikongomelo xakwe i ku “khutaza vantshwa” leswaku va va Mamoslem.

Ku Hoxa Vuxokoxoko Bya Wena Eka Internet

Vanhu vo tala lava tirhisaka ti-Web site to endla xinghana eka Internet a va ri voni khombo ro hoxa vuxokoxoko bya vona bya xihundla kwalaho. Ku ni vuyelo byo tala byo biha lebyi va nga ha langutanaka na byona hi ku famba ka nkarhi. Hi ku ya hi Timothy Wright, la nga nhloko ya xikolo naswona a tshahiweke eka phepha-hungu ra le Australia ra Sydney Morning Herald u te: “Eka thekinoloji ya manguva-lawa ku vulavula handle ko ehleketa, ku hleva, ku hoxa swifaniso swo huma endleleni kumbe ku nghenisa rungula ra xihundla a swi rhabeki naswona swi nga voniwa hi mani na mani la nghenaka eka Internet.” Wright u kombisa leswaku leswi swi vula leswaku “rungula leri munhu a ri hoxaka eka Internet loko a ri ni malembe ya 15, muthori wakwe a nga ri vona endzhaku ka malembe ya khume.”