Vantshwa Va Vutisa

Xana Swi Hoxile Ku Va Ni Ndhuma?

Tsala rito leri lavekaka leswaku xivulwa lexi xi helela:

․․․․․ i swinene ku va ni ndhuma.

A. minkarhi hinkwayo
B. minkarhi yin’wana
C. a hi swinene

NHLAMULO i “B.” Ha yini? Hikuva ku va ni ndhuma swi vula ku va u rhandziwa hi vanhu vo tala—sweswo a swi bihanga! Bibele yi profete leswaku Vakreste va ta va “ku vonakala ka matiko” naswona vanhu va ta lava ku tihlanganisa na vona. (Esaya 42:6; Mintirho 13:47) Hi ndlela yoleyo, ku nga vuriwa leswaku Vakreste va dumile.

Xana a wu swi tiva?

Yesu a a dumile. Hambiloko a ha ri ntsongo, a a “tsakeriwa hi Xikwembu ni vanhu.” (Luka 2:52) Bibele yi vula leswaku loko Yesu se a kurile, “mintshungu leyikulu [a] yi n’wi landzela ku suka eGaleliya, eDekapolisi, eYerusalema, eYudiya ni le ntsungeni wa Yordani.”—Matewu 4:25.

Ha yini sweswo a swi ri swinene eka yena?

Xivangelo hileswaku Yesu a a nga lavi ku dzunisiwa kumbe ku hlongorisa ndhuma naswona a a nga lavi ku amukeriwa hi vanhu. Yesu a a endla leswinene naswona minkarhi yin’wana sweswo a swi endla leswaku vanhu va n’wi tsakela swinene. (Yohane 8:29, 30) Kambe a a swi xiya leswaku ku tsakeriwa hi vanhu lava minkarhi yin’wana va cincaka miehleketo ya vona, a swi ta va swa xinkarhana. A a swi tiva leswaku hi ku famba ka nkarhi vanhu va ta n’wi dlaya!—Luka 9:22.

Mhaka Ya Nkoka Yo Yi Tsundzuka:

Ku va ni ndhuma swi fana ni ku va ni rifuwo. A hi minkarhi hinkwayo swi nga biha ku va na rona. Lexi nga biha hileswi vanhu va swi endlaka leswaku va ri kuma kumbe leswaku va tshama va ri na rona.

Xitsundzuxo.

Vantshwa vo tala va nga endla hinkwaswo leswi nga ematimbeni ya vona leswaku va va ni ndhuma. Van’wana va hanyela ku tsakisa vanhu. Van’wana i swifamona leswi ringetaka ku sindzisa vanhu leswaku va swi rhandza—hambiloko va swi endla hi ku chava.a

Eka matluka lama landzelaka, hi ta kambisisa tindlela teto timbirhi leti nga ni khombo naswona ti kucetelaka vanhu leswaku va hlongorisa ndhuma. Endzhaku ka sweswo, hi ta kambisisa ndlela leyinene yo va ni ndhuma.

Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype

a Bibele yi vulavula hi swifamona leswi vuriwaka “Manefilimi,” leswi na swona swi vuriwaka “vavanuna va ndhuma.” A swi endla swilo leswaku swi vangamisiwa.—Genesa 6:4.

TINDLELA TO VA NI NDHUMA

KU HANYELA KU TSAKISA VANHU

Ndzi lava ku tsakeriwa hi van’wana.
Leswaku va ndzi tsakela, ndzi fanele ku hanya hi ndlela ya vona.

“Ndzi ringete ku cinca vumunhu bya mina leswaku ndzi fana ni van’wana. Eku sunguleni a swi tikomba swi tirha. Kambe endzhaku ka nkarhi ndzi swi xiyile leswaku a wu fanelanga u cinca vumunhu bya wena leswaku u ta tsakeriwa.”—Nicole.

Nawu wa Bibele: “U nga endli swilo hileswi van’wana va swi endlaka naswona u nga pfumeleli vanhu va ku kucetela ku endla leswo biha.”—Eksoda 23:2, Holy Bible—Easy to Read Version.

SWIFAMONA

Vanhu va ndzi rhandza naswona ndzi lava leswaku swi tshama swi ri tano.
Ndzi ta endla hilaha ndzi nga kotaka hakona leswaku ndzi hambeta ndzi rhandziwa—hambiloko sweswo swi lava ndzi kandziyela van’wana.

“Hakanyingi vantshwa va ehleketa hi ndlela leyi fanaka naswona leswi swifamona swi dumeke swinene, muntshwa la nga ni tingana a nga vona onge hinkwaswo leswi swi swi vulaka i ntiyiso.”—Raquel.

Nawu wa Bibele: “Leswi mi lavaka vanhu va swi endla eka n’wina, swi endleni eka vona hilaha ku fanaka.”—Luka 6:31.

NDLELA LEYINENE
Loko u tirhisa tinhla letinharhu leti nga eximatsini, u nge he dumi ku fana ni le ku sunguleni—kambe u ta rhandziwa hi vanhu lavanene!

Tiva milawu leyi u faneleke u hanya ha yona. Bibele yi vula leswaku vanhu lava wupfeke va ‘leteriwe ku hambanisa leswi lulameke ni leswi hoxeke.’—Vaheveru 5:14.
Namarhela leswi u pfumelaka eka swona. Tekelela Yoxuwa loyi hi xivindzi a nga te: “Hlawulani namuntlha loyi mi nga ta n’wi tirhela . . . Kambe loko ku ri mina ni vandyangu wa mina, hi ta tirhela Yehovha.”—Yoxuwa 24:15.
Tiyiseka hi ndlela leyi u yi hlawuleke. Muapostola Pawulo u tsundzuxe Timotiya a ku: “Xikwembu a xi hi nyikanga moya wa vutoya, kambe xi hi nyike moya wa matimba.”—2 Timotiya 1:7.

LESWI TINTANGHA TA WENA TI SWI VULAKA

Melissa—I ntiyiso leswaku u nga ringeta ku hanya ku fana ni vantshwa van’wana lava nga exikolweni. Kambe sweswo a swi pfuni nchumu! Ku va Mukreste swi endla leswaku u va ni mahanyelo lamanene. A swi endli leswaku u nga tiphini. Swi endla leswaku u rhandzeka.

Ashley—A ndzi titwa ndzi nga dumanga exikolweni, kambe loko ndzi ya eminhlanganweni ya Vukreste a ndzi hlangana ni vanghana lava rhandzaka leswi ndzi nga xiswona. Hi nkarhi wolowo, matshalatshala man’wana ni man’wana lawa a ndzi ma endla leswaku ndzi amukeleka eka vadyondzi-kulorhi a ma va nyuku wa mbyana.

Phillip—Leswaku vanhu va ku rhandza, na wena u fanele u va rhandza. Masiku lawa ndzi ringeta ku endlela vanghana va mina swilo swo karhi leswitsongo naswona leswi swi endla leswaku vunghana bya hina byi kula.