Ta Rivala

“Loko ku nga si va ni tikhompyuta, [vativi va swimilana] a swi va tikela ku lavana ni tibuku leswaku va nyika ximilana lexintshwa vito, kutani leswi swi endle leswaku ku va ni mavito yo tala lama fanaka.” Sweswi ku vuriwa leswaku eka mavito lama nga kona ya timiliyoni, mavito ya 477 601 i vamavizweni.—SCIENCE, U.S.A.

“Eka vanhu va le Chayina, lava vulaka leswaku va tsakile va endla tiphesente ta tsevu ntsena.” Nkambisiso wun’wana wu kume leswaku vanhu va tiphesente ta kwalomu ka 39 va vula leswaku “nchumu lowu endlaka leswaku munhu a tsaka” i “rifuwo.”—CHINA DAILY, CHINA.

“Ndzavisiso . . . lowu endliweke ku kambisisa ku pakanisa ka tinhlayo ta vugevenga ta le Rhaxiya wu kombise leswaku tinhlayo teto a ti ri ta vukanganyisi etikweni hinkwaro.” Vanhu va nawu va hehliwa hi ku lava ku endla onge “a ku na vugevenga” ni hi ku endla onge va tlhantlhe swiphiqo swo tala swa vugevenga, kasi a va endlanga nchumu.—RIA NOVOSTI, RUSSIA.

“Le [Berlin], ku nga ntsindza wa Jarimani, xichudeni xin’we eka swinharhu swa le yunivhesiti swi nga vona swi antswa ku xavisa miri [leswi katsaka vunghwavava ni ku cina hi ndlela yo pfuxa ku navela ka rimbewu] tanihi ndlela leyi nga ta swi pfuna ku kuma mali yo hakelela tidyondzo ta swona.”—REUTERS NEWS SERVICE, GERMANY.

Ku Tisasekisela Ku Ya Veleka

Ti-Web site to endla xinghana eka Internet ta yi khumba ndlela leyi vamanana va tivisaka ha yona leswaku se va velekile. Xiviko lexi humaka eka xitichi xa TV xa le Amerika xa ABC xi kombisa leswaku “masiku lawa vamanana lava ha ku velekaka va byelana ndlela leyi a va tsake ha yona eka Internet,” kasi khale a va rhumelana tithelegiramu. Hakanyingi leswi va swi hoxaka swi katsa swifaniso swa manana ni ricece rakwe loko ra ha ku velekiwa. Vamanana va manguva lawa, lava khathalaka ngopfu hi ndlela leyi va langutekaka ha yona va tisasekisa va nga si ya veleka. Xiviko lexi xi tlhela xi ku: “Van’wana va lava ni munhu loyi a nga ta va sasekisa leswaku a famba na vona loko va ya exibedlhele.” Ha yini? Toni Golen, la nga mukongomisi wa ta vutshunguri ni ku veleka exibedlhele lexi vuriwaka Beth Israel Deaconess Medical Center lexi nga eBoston, u vula leswaku va lava ku veleka va sasekile.

Endla Vutiolori Leswaku U Va Ni Rihanyo Lerinene

Valavisisi va vula leswaku ku heta nkarhi wo tala u lo tshama entirhweni, exikolweni kumbe u hlalela TV, swi nga endla leswaku munhu a khomiwa hi vuvabyi lebyi nga tshungulekiki. Phepha-hungu leri vuriwaka Vancouver Sun ri te: “Loko u tshamile, tisele ta miri leti pfunaka misiha leswaku yi hunguta mafurha lama nga engatini kutani ti ma hisa, ta yima ti nga tirhi.” Phepha-hungu rero ri tlhele ri vula leswaku “hi lava leswi engetelekeke ku tlula ku endla vutiolori lebyi endlaka mbilu ya hina yi ba hi ku hatlisa” leswaku hi tshama hi ri ni rihanyo lerinene. “Kutani nkarhi na nkarhi hi fanele hi endla vutiolori lebyi ringaniseriweke kahle lebyi nga ta pfuna miri leswaku wu swi gayela kahle swakudya leswi hi swi dyaka.”