Tindlela To Kombisa Vululami
MUVUMBI wa hina u lava leswaku hi tsaka, hi va ni ku rhula naswona hi pfuna van’wana leswaku va tshama va tsakile. U lava leswaku hi “kombisa vululami ni ku rhandza musa.” (Mikiya 6:8) Hi nga swi endlisa ku yini leswi? Hi fanele hi hlakulela timfanelo leti nga ta hi pfuna leswaku hi kombisa vululami. Xiya ndlela leyi Bibele yi nga hi pfunaka ha yona leswaku hi endla tano.
KU HLULA MAKWANGA. Mfanelo ya nkoka leyi nga ta hi pfuna leswaku hi nga vi na makwanga i rirhandzu naswona hi rona ri hi susumetelaka ku rhangisa swilaveko swa van’wana. Vakorinto wo Sungula 13:4, 5 yi vula leswaku ‘rirhandzu ri ni musa naswona a ri lavi leswi vuyerisaka rona ntsena.’ Ku tlula kwalaho, rirhandzu ro tano a hi ri kombi swirho swa ndyangu kumbe vanghana va hina ntsena. Yesu u tshame a vutisa a ku: “Loko mi rhandza lava mi rhandzaka, mi vuyeriwa hi yini?” A a kombisa leswaku hambi ku ri vanhu lava nga xi tiviki Xikwembu va rhandza vanhu lava va rhandzaka ntsena.—Matewu 5:46.
KU HLULA XIHLAWU-HLAWU. Mintirho 10:34, 35 yi ri: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” Xikwembu a xi avanyisi vanhu hi ku ya hi rixaka, xiyimo xa vona xa timali kumbe rimbewu. Eka xona “a ku na Muyuda kumbe Mugriki, a ku na hlonga kumbe munhu la ntshunxekeke, a ku na wanuna kumbe wansati.” (Vagalatiya 3:28) Loko hi tekelela Xikwembu hi ta swi kota ku hlula xihlawu-hlawu. Xiya xikombiso xa Dorothy, loyi a a tshama eUnited States.
Dorothy a a hlundzukisiwa hi xihlawu-hlawu xa rixaka lerova a a lava ku va xirho xa ntlawa lowu a wu lava ku ntshunxa vanhu vantima eku tshikileriweni. Hi nkarhi wolowo, u ye laha Timbhoni ta Yehovha ti hlanganaka kona naswona ndlela ya rirhandzu leyi vanhu vantima ni valungu va nga n’wi amukela ha yona yi n’wi tsakisile swinene. Swi nga si ya kwihi, u swi vonile leswaku Xikwembu hi xona ntsena xi nga cincaka langutelo ra vanhu. Loko a vona ndlela ya rirhandzu leyi Timbhoni leti nga valungu ti n’wi khomeke ha yona—vanhu lava a nga vula leswaku “a a ta va a va dlaye hi mbilu yo basa leswaku a pfuna vanhu vantima”—u khumbeke swinene lerova a rila.
KU TSHIKA KU HANYA BYA GUWELA. Valandzeri van’wana va Yesu a va ri swilovekelo, vadyeleri, a va ya eminkhubyeni ya huwa kumbe varhuketeri loko va nga si va Vakreste. Kambe hikwalaho ka mpfuno wa Xikwembu, va sive mikhuva yoleyo hi rirhandzu, musa ni vunene. (1 Vakorinto 5:11; 6:9-11; Vagalatiya 5:22) Hilaha ku fanaka, namuntlha timiliyoni ta vanhu ti endle ku cinca lokukulu evuton’wini bya tona endzhaku ka loko ti sungule ku gandzela Xikwembu. Xikombiso xin’wana i xa Firuddin, loyi a tshamaka eAzerbaijan.
Firuddin u kuriseriwe endhawini yo hlayisa vana lava feriweke hi vatswari, laha a a tshamela ku lwa ni swifanyetana swin’wana. Loko se a kurile, u ve muleteri wa vanhu lava lwaka hi swibakela [hand-to-hand combat]. U ri: “A ndzi ri ni tihanyi naswona a ndzi ri ni madzolonga. Loko nsati wa mina Zahra o rivala swin’wana hi nkarhi wa swakudya—hambi ku ri rinhi ro xokola meno—a ndzi n’wi ba. Loko wanuna un’wana o n’wi languta loko hi ri eku fambeni, na yena a ndzi n’wi fumbutela!”
Siku rin’wana mbilu ya Firuddin yi khumbekile loko a dyondza mhaka ya leswaku Yesu u kombele Xikwembu leswaku xi rivalela lava n’wi beleleke. (Luka 23:34) U tibyele leswi: ‘Leswi swi nga endliwa ntsena hi N’wana wa Xikwembu.’ Endzhaku ka sweswo, u sungule ku dyondza swo tala hi Xikwembu. Loko Timbhoni ta Yehovha ti n’wi byele leswaku ti nga n’wi pfuna, u amukele dyondzo ya mahala ya Bibele. Swi nga si ya kwihi, vumunhu byakwe byi sungule ku cinca. Kutani u sungule ku n’wi khoma kahle nsati wakwe lerova na yena u sungule ku dyondza Bibele. Namuntlha havumbirhi bya vona va gandzela Xikwembu xa ntiyiso hi vun’we.
I ntiyiso leswaku ku cinca loku hi nga ku endlaka evuton’wini bya hina a ku nge herisi vuhomboloki bya misava hinkwayo! U nga titwa njhani loko wo twa leswaku Xikwembu xi tiyimisele ku tumbuluxa misava leyi ku nga ta va ni vululami eka yona? Phela xi na wona matimba yo endla tano! Nakambe xiya: Eka Timotiya wa Vumbirhi 3:1-4 leyi tshahiweke eku sunguleni ka nhloko-mhaka leyi hundzeke, hi swi vonile leswaku Bibele yi swi veke erivaleni leswaku mahanyelo ya vanhu ma ta va ma ri njhani eminkarhini ya hina. Ndzimana leyi yi hetisekile hakunene, hilaha swi nga hakona hi vuprofeta lebyin’wana bya Bibele. A ho va swiphukuphuku loko hi tshemba leswaku Xikwembu xi ta herisa vuhomboloki. Hakunene Xikwembu xi ta swi endla sweswo. Njhani?
[Bokisi/Xifaniso lexi nga eka tluka 7]
HEIDE A LAVISISA VULULAMI
Heide la tshamaka eUnited States u te: “A ndzi nga lavi ku twa nchumu hi xihlawu-hlawu, tinyimpi, vusweti ni swiendlo swin’wana swa ku kala vululami naswona a ndzi lava ku antswisa swiyimo. Ndzi ringete ku joyina mavandla lama lwelaka ku ringana ka tinxaka naswona eku heteleleni ndzi joyine ntlawa wo karhi wa tipolitiki, kambe leswi hinkwaswo swi ve nyuku wa mbyana.
“A ndzi tibyela leswaku ku fanele ku va ni ku cinca lokukulu naswona vanhu lava a va tivitana mahipi a swi tikomba onge va tisa ku cinca ko karhi. Kambe leswi a va swi endla a swi tlhaveriwanga hi dyambu. Ndzi xiye leswaku vo tala va vona a va lava ku titsakisa hi timhaka ta masangu, swidzidziharisi ni hi vuyimbeleri bya rhok ku ri ni ku antswisa swilo—leswi swi ye swi ndzi tshikilela swinene. Hi nkarhi wolowo, ndzi hlangane ni wansati la nga Mbhoni ya Yehovha naswona u ndzi kombe leswi Bibele yi vulaka leswaku Xikwembu xi ta swi endla. Hi xikombiso, u ndzi hlayele matsalwa yo tanihi Nhlavutelo 21:3, 4, leyi vulaka leswaku Xikwembu xi ta sula mihloti hinkwayo ematihlweni ya vanhu kutani xi herisa ku kolola, xirilo ni xitlhavi—leswi hakanyingi swi vangiwaka hi ku kala vululami. Ndzi tivutisile, ‘Xana switshembiso leswi swi ta hetiseka hakunene?’
“Loko ndzi hlaya leswi Matsalwa ma swi vulaka hi matimba ya Xikwembu, rirhandzu ra xona ni rirhandzu leri ndzi ri voneke exikarhi ka Timbhoni ta Yehovha, a ndzi nga ha kanakani leswaku switshembiso leswi swi ta hetiseka. Sweswi ndzi swi langutele hi mahlo-ngati ku hetiseka ka switshembiso swa Xikwembu.”
[Xifaniso lexi nga eka tluka 6]
Ku tekelela rirhandzu ra Xikwembu swi hi pfuna ku hlula xihlawu-hlawu
[Xifaniso lexi nga eka tluka 6]
Firuddin ni nghamu yakwe Zahra