Ku Voninga Ka Xihadyana Lexi Vuriwaka Bobtail Squid Xa Le Hawaii

XIHADYANA lexi xi hlota nivusiku naswona xi kota ku voninga hi ndlela yo hlamarisa leyi endlaka leswaku xi nga vonaki loko xi voningeriwa hi n’weti ni tinyeleti. Xihadyana lexi xi kota ku endla sweswo hi leswi xi tirhisanaka ni baktheriya leyi humesaka ku vonakala. Ku tirhisana ka swona ku nga pfuna vanhu hi ndlela yo karhi. Ku nga hi pfuna eka rihanyo ra hina.

Xiya: Xihadyana lexi xi tshama ematini yo tenga ya le ribuweni ra Swihlala swa le Hawaii. Ku vonakala loku humaka eka n’weti ni tinyeleti hi ntolovelo ku endla leswaku ndzhuti wa xona wu vonaka eka swiharhi leswi swi xi dyaka. Kambe, xihadyana lexi xi humesa ku vonakala hi le hansi ka xona loku fanaka ni ku voninga ka nivusiku. Kutani sweswo swi endla leswaku xi nga vonaki xi tlhela xi nga vi ni ndzhuti. Vutshila lebyikulu bya squid byi le ka xirho xa xona lexi humesaka ku vonakala, lexi hlayisaka baktheriya leyi nga vonakiki ya ntumbuluko, leyi humesaka ku vonakala loku ringaneke leswaku yi kanganyisa swiharhi leswi swi xi dyaka.

Baktheriya leyi yi tlhela yi pfuna ku lawula ku etlela ni ku pfuka ka xona. Leswi swi tsakisa valavisisi hikuva swi nga endleka leswaku bobtail squid a hi yona ntsena leyi tirhisanaka ni baktheriya ni mindzhendzheleko ya ntumbuluko leyi endlekaka siku ni siku. Hi xikombiso, eka swiharhi leswi an’wisaka, baktheriya leyi pfunetaka ku gayela swakudya, yi landzela matirhelo lama fanaka. Loko matirhelo lawa mo kavanyetiwa swi nga vanga ntshikilelo, vuvabyi bya chukele, ku nyuhela ngopfu ni ku nga etleli kahle. Ku dyondza hi baktheriya leyi nga eka xihadyana lexi, ku nga endla leswaku vanhu va kota ku twisisa ndlela leyi miri wa munhu wu tirhaka ha yona.

U anakanya yini? Xana ku voninga ka xihadyana lexi vuriwaka bobtail squid xa le Hawaii ku lo tiendlekela kumbe ku lo endliwa?