Ta Rivala

Nkambisiso lowu nga endliwa hi Nhlangano wa Vuhaxi wa le Britain wu kombise leswaku vanhu va 13 000 lava tshamaka ematikweni ya 26, va vule leswaku “vukanganyisi hi byona lebyi ku vulavuriwaka ngopfu ha byona emisaveni hinkwayo.” Kambe a ku ehleketiwa leswaku vusweti hi byona xiphiqo xa misava hinkwayo.—BBC NEWS, BRITAIN.

“Tikereke ta le United States ti veketela ti-GPS laha ku nga ni swifaniso swa Yesu loko a ha ri ntsongo hikuva emalembeni lama ha ku hundzaka swi yiviwe ngopfu.”—THE WEEK, U.S.A.

“Komiti leyi nyikelaka switsundzuxo [ya le United States] eka Ndzawulo ya Swakudya ni Swidzidziharisi yi ringanyeta leswaku vanhu lava nga ni vuvabyi bya ku tsana ka misiha ni matshimbi va nga pfumeleriwi ku nyikela ngati, hikuva ngati ya vona yi nga ha va yi ri ni vuvabyi byo karhi.”—THE WALL STREET JOURNAL, U.S.A.

Rivoni Leri Dlayaka Switsotswana

Le Scotland eYunivhesiti ya Strathclyde leyi nga eGlasgow, ku endliwe nchumu wun’wana lowuntshwa wa thekinoloji lowu tirhisaka rivoni ra matimba swinene leswaku wu dlaya switsotswana. Nchumu lowu wu vonaka wu pfuna swinene eku dlayeni ka switsotswana ku tlula ku swi dlaya hi ku tirhisa tikhemikhali ntsena. Profesa John Anderson la nga mutivi wa switsotswana u ri: “Miseve ya rivoni leri yi endla leswaku loko switsotswana swi hundza eka rona swi namba swi fa.”

Malariya Ni Khwati Leri Nga Riki Na Mirhi

Makhwati lama nga riki na mirhi ku vuriwa leswaku ma ni tiphesente ta kwalomu ka 50 leti engetelekeke ta malariya. Mhaka leyi yi vuriwe hi valavisisi lava kambisiseke timhaka ta rihanyo eswifundzheni swa 54 swa le Brazil naswona va pfuniwe ni hi swifaniso leswi va swi tekeke hi sethalayiti. Ku vuriwa leswaku nsuna leyi vuriwaka Anopheles darlingi hi yona leyi vangaka malariya exifundzheni xexo. Sarah Olson, murhangeri wa nkambisiso wolowo u te: “Tindhawu leti eka tona ku tsemeleriweke mirhi, leti nga pfuleka naswona ti nga ni swinambyana hi tona leti talaka ku va ni tinsuna leti.” Makhwati lawa eka wona mirhi yi nga tsemeleriwa hi wona lama talaka ku va ni malariya yo tala.

Xitsotswana Lexi Hahaka Lexi Vuriwaka Squid

Vumbhoni bya swifaniso swin’wana bya ha ku kombisa leswaku ti-squid tin’wana ti haha ku fana ni swihaha-mpfhuka. Mutivi wa swikepe swa le ndzeni ka mati u xiye leswaku “ti-squid leti nga leha tisentimitara ta 20, ta swi kota ku hahela ehenhla ka mati hi timitara timbirhi ti tirhisa swipapila ni swiambamberi swa tona ku ringana mpfhuka lowu nga endlaka timitara ta 10.” Ti tswonga mati emirini wa tona kutani ti ma humesela ehandle, sweswo swi ti pfuna leswaku ti kuma matimba yo haha ti huma elwandle. Swifaniso swa kona swi kombisa leswaku ti tirhisa swipapila swa tona tanihi timpapa.