Tlharhi Lerintshwa Ro Lwisana Ni Dari

HI LAHA swi vikiweke ha kona hi Awake! ya May 8, 1993, dari ri vuya tanihi ntungu wa misava hinkwayo. The New York Times (March 23, 1993) yi vike leswaku “n’wexemu, le Brazil a ku ri na 560 000 wa vanhu lava khomiweke hi dari.” Lembe na lembe vanhu va 8 000 va le Brazil va fa hi dari. Sweswi mukambisisi wa le Colombia, Dok. Manuel Elkin Patarroyo, u tshubule xitshunguri xin’wana—murhi wo tlhavela wa tikhemikhali lowu durhaka tisente ta 90 ntsena. Dok. Patarroyo u ri: “Wu chipe ku tlula na Khokha-khola le Colombia.” Ku fikela sweswi wu tikombe wu tirha eka tiphesente ta 67 ta vavabyi. Hambi leswi wu nga herisiki dari leri dlayaka, wu vonaka wu ri ndlela leyikulu yo sivela ku khomiwa hi dari.