Ntirhisano Wu Pfuna Ndyangu Leswaku Wu Antswisa Vugandzeri Bya Wona
LOKO swirho swa ndyangu swi lava ku antswisa vugandzeri bya swona swi fanele swi tirhisana. Loko Yehovha a vumbe mpatswa wo sungula, u kandziyise ndlela leyi ntirhisano wu nga wa nkoka ha yona. Evha a a fanele a tirha na Adamu tanihi “muhetisisi” wakwe. (Gen. 2:18) Evukatini, wanuna ni wansati va fanele va khomisana naswona va seketelana. (Ekl. 4:9-12) Nakambe vatswari ni vana va fanele va khomisana leswaku va kota ku endla mintirho leyi Yehovha a va nyikeke yona.
Ku Gandzela Xikwembu Tanihi Ndyangu
Barry na Heidi va ni ntlhanu wa vana. Va xiye leswaku ku khomisana emhakeni yo va ni dyondzo ya ndyangu ya Bibele ya nkarhi na nkarhi swi va pfuna leswaku va endla nhluvuko. Barry u te: “Nkarhi na nkarhi ndzi nyika vana va hina swiavelo leswitsongo leswi va nga ta swi endla eka dyondzo ya ndyangu. Minkarhi yin’wana ndzi va kombela leswaku va lunghiselela tinhlamulo tin’wana leti sekeriweke eka swihloko swa Xalamuka! Hi tlhela hi titoloveta leswi hi nga ta swi vula ensin’wini leswaku n’wana ha un’we a ta va ni xingheniso lexi a nga ta xi tirhisa.” Heidi u engetele a ku: “Ha un’we wa hina u ni nxaxamelo wa tipakani leti a lavaka ku ti fikelela entirhweni wa Yehovha naswona nkarhi na nkarhi hi kambisisa tipakani toleto loko hi endla dyondzo ya ndyangu ku vona loko ku ri ni nhluvuko lowu hi wu endlaka.” Nakambe mpatswa lowu wu xiye leswaku loko wu va ni madyambu yo karhi laha wu nga hlaleliki thelevhixini, sweswo swi endla leswaku ndyangu hinkwawo wu kota ku va ni nkarhi wo hlaya.
Minhlangano Ya Vandlha
Mike na Denise va kurise mune wa vana. Xana ku khomisana swi wu vuyerise njhani ndyangu wa vona? Mike u ri: “Minkarhi yin’wana, hambiloko hi hlele kahle leswaku hi ta fika hi nkarhi eminhlanganweni, a hi tsandzeka, kambe hi kume leswaku ku khomisana swi hi pfune leswaku hi fika eminhlanganweni hi nkarhi.” Denise u te: “Loko vana va ri karhi va kula, ha un’we wa vona a a ri ni mintirho leyi a a fanele a yi endla. Xinhwanyetana xa hina Kim, a xi pfuneta hi ku sweka ni hi ku deka tafula.” Michael, n’wana wa vona wa jaha u ri: “Hi Ravumbirhi nimadyambu a ku khomiwa minhlangano ya vandlha ekaya. Kutani a hi basisa kamara leri minhlangano a yi khomeriwa eka rona hi veketela switulu.” Matthew, n’wana wa vona un’wana wa jaha u ri: “Tatana a a tiyiseka leswaku u hatla a vuya hi le ntirhweni hi masiku ya minhlangano leswaku a hi pfuna ku va hi lunghekela ku ya eminhlanganweni.” Xana ku ve ni vuyelo byihi?
Ntirho Wa Vona Wu Tswale Mihandzu
Mike u ri: “Hi 1987, mina na Denise hi sungule ku phayona. Hi nkarhi wolowo, vana va hina vanharhu a va ha tshama na hina ekaya. Lavan’wana vambirhi va ve maphayona naswona lavan’wana va tirhile loko ku akiwa eBethele. Nchumu wun’wana lowu nga tlhela wu hi tsakisa hileswi ndyangu wa hina wu koteke ku pfuna vanhu va 40 leswaku va nyiketela vutomi bya vona eka Yehovha kutani va khuvuriwa. Nakambe hi tsakele lunghelo ro tirha tanihi ndyangu eka mintirho yo aka ematikweni man’wana.”
Hakunene ku khomisana tanihi ndyangu swa vuyerisa. Xana u nga kuma tindlela tin’wana leti wena u nga khomisanaka ha tona ni swirho swa ndyangu wa wena? U nga tiyiseka leswaku ku va ni moya wo khomisana swi ta pfuna ndyangu wa wena leswaku wu hambeta wu antswisa ndlela leyi wu gandzelaka Yehovha ha yona.
[Xifaniso lexi nga eka tluka 28]
Ku lunghiselela leswi mi nga ta swi vula loko mi ri ensin’wini swi ta mi pfuna leswaku mi endla nhluvuko