“Ku Rhula Exikarhi Ka Vanhu Lava Amukelekaka”

Lexi endlaka van’wana va tlangela Khisimusi.

Lembe ni lembe, mupapa ni varhangeri van’wana va vukhongeri va chumayela marungula ya ku rhula, va ri ni ntshembo wa leswaku nguva ya Khisimusi yi ta hetisisa marito ya ntsumi lama nge: “Le henhla ka misava ku va ni ku rhula exikarhi ka vanhu lava amukelekaka.” Van’wana va hlela maendzo yo hlawuleka ya swa vukhongeri leswaku va ya tlangela Khisimusi.

Ha yini ku ri xiphiqo?

Ku rhula loku vaka kona hi nkarhi wa Khisimusi a ku tlhaveriwi hi dyambu. Hi xikombiso, hi December 1914, loko Yuropa yi ri eka Nyimpi yo Sungula ya Misava, masocha ya le Britain ni le Jarimani ma hume emagovelweni kutani ma tlangela Khisimusi swin’we. Ma avelane swakudya, swakunwa ni fole. Ma tlange hambi ku ri bolo ya milenge. Hambiswiritano, ku rhula koloko a ku tlhaveriwanga hi dyambu. Eka papila leri humaka eBritain, socha ra le Britain ri vule leswaku socha ra le Jarimani ri te: “Namuntlha hi ni ku rhula. Mundzuku u lwela tiko ra ka n’wina; mina ndzi lwela ra ka hina.”

Hi yihi milawu ya Bibele leyi nga pfunaka?

“Hikuva hi velekeriwe n’wana . . . Vito ra yena u ta thyiwa . . . Hosana ya Ku Rhula. Ku tala ka ku fuma ka vuhosana ni ku rhula a swi nge vi na makumu.” (Esaya 9:6, 7) Xana vuprofeta byebyo malunghana na Yesu Kreste a byi chaveleli? Yesu a nga velekiwanga laha misaveni leswaku a tisa ku rhula hi siku ro karhi elembeni. Tanihi Hosi leyi nga etilweni, u ta tisa ku rhula ka xiviri loku nga ta ka ku nga heli.

“Hikwalaho ka mina [Yesu] mi va ni ku rhula. Emisaveni mi ni nhlomulo, kambe tiyani timbilu! Misava ndzi yi hlurile.” (Yohane 16:33) Hambi ku ri namuntlha, Yesu u pfuna valandzeri vakwe leswaku va kombisana ku rhula. I ntiyiso leswaku Vakreste va ni nhlomulo. Kambe hikwalaho ka Bibele, va swi twisisa leswaku hikwalaho ka yini ku ri ni ku xaniseka ni ndlela leyi Yesu a nga ta tisa ku rhula loku nga heriki ha yona. Hikokwalaho, va ni ku rhula ka mianakanyo.

Hikwalaho ko landzela marito ya Yesu, Timbhoni ta Yehovha—ku nga khathariseki tiko leri ti humaka eka rona, rixaka, ndlela leyi ti kurisiweke ha yona kumbe ririmi—ti tiphina hi ku rhula ko tano. Tivonele hi ya wena hi ku ya eminhlanganweni eHolweni ya tona ya Mfumo. Kumbexana na wena, ku fana ni vanhu van’wana vo tala, wa pfumela leswaku ku rhula loku ka antswa ku tlula loku Khisimusi yi ku tisaka.