Ku Antswisa Vutshila Bya Hina eNsin’wini—Ndlela Yo Hlamula Vanhu Lava Lavaka Ku Siva Bulo

Lexi Endlaka Swi Va Swa Nkoka: A hi nge u tiva leswaku ku ni mhangu ya ntumbuluko leyi nga le kusuhi ni ku endleka. Vanhu va ta fa handle ka loko vo balekela endhawini leyi hlayisekeke. U ya ekaya ka muakelani wa wena leswaku u ya n’wi lemukisa, kambe u ku nghena enon’wini a ku byela leswaku u khomekile. A swi kanakanisi leswaku a wu nge hatliseli ku tshika ku n’wi pfuna. Vo tala ensin’wini ya hina a va hi amukeli, a va swi xiyi leswaku rungula ra hina leri ponisaka vutomi i ra nkoka. Loko hi va endzela, kumbexana va va va khomekile. (Mat. 24:37-39) Kumbe swi nga ha endleka va nga ri tsakeli rungula ra hina hikwalaho ka mavarivari lawa va ma tweke lama nga riki ntiyiso. (Mat. 11:18, 19) Va nga ha ehleketa leswaku a hi hambananga ni vukhongeri lebyi humeseke mihandzu yo biha. (2 Pet. 2:1, 2) Loko n’wini wa muti a nga tsakeli eku sunguleni, a hi fanelanga hi hatla hi lela.

Ndlela Leyi U Nga Swi Endlaka Ha Yona:

Loko u nga si ya chumayela hi yindlu ni yindlu, tinyike nkarhi wo anakanyisisa hi vanhu lava nga ha sivaka bulo lava u nga ha hlanganaka na vona kutani u anakanya hi ndlela leyi u nga va hlamulaka ha yona.
Loko n’wini wa muti a ringeta ku siva bulo, ringeta ku ya emahlweni ni bulo hi ndlela yo rhula. Kumbexana u nga endla tano hi ku n’wi bumabumela. Hi xikombiso, loko a vula leswaku u ni vukhongeri bya yena, u nga ha ku, “A ndzi lava ku kuma munhu wo fana na wena loyi a tsakelaka swilo swa moya.” Minkarhi yin’wana ku twisisa ndlela leyi n’wini wa muti a titwaka ha yona kumbe swiyimo swakwe swi ta ku pfulela ndlela yo ya emahlweni u nyikela vumbhoni. Hi xikombiso, loko a ku u khomekile, u nga ha ku: “Ndza swi twisisa. Kambe ndzi nga si famba, ndzi tsakela ku ku nyika swo karhi.” Ndlela yin’wana leyi u nga yi tirhisaka i ku vutisa n’wini wa muti xivutiso loko a vula leswaku a nga tsakeli. U nga ha ku, “U vula leswaku a wu yi tsakeli Bibele kumbe i vukhongeri hinkwabyo lebyi u nga byi tsakeliki?”
Tirhisa vutlhari. Tsundzuka leswaku Yehovha a nga sindzisi vanhu leswaku va yingisela. (Det. 30:19) Un’wana ni un’wana u ni ndzhwalo wakwe wa vutihlamuleri emahlweni ka Yehovha. (Gal. 6:5) Loko n’wini wa muti a nga lavi ku twa nchumu, swa antswa hi famba. Loko hi xixima ndlela leyi a titwaka ha yona, hi nga ha pfulela muhuweleri un’wana ndlela yo nyikela vumbhoni enkarhini lowu taka.—1 Pet. 3:15.

Ringeta Ku Endla Leswi N’hweti Leyi:

Loko u hlangana ni munhu loyi a lavaka ku siva bulo, loko mi huma emutini wa kona, burisana ni loyi u fambaka na yena malunghana ni ndlela leyi a wu ta va u hlamule ha yona hi ndlela yo antswa.