Ndlela Leyi Nyimpi Ni Madzolonga Ya Swa Tipolitiki Swi Hi Khumbaka Hayona
“Nhlayo ya madzolonga ya swa tipolitiki emisaveni yi le henhla, ku sukela loko ku ve ni Nyimpi Ya Vumbirhi Ya Misava naswona tibiliyoni timbirhi ta vanhu ku nga kotara ya nhlayo ya vanhu hinkwavo emisaveni, va tshama etindhawini leti khumbiweke hi madzolonga wolawo.”
Xandla Xa Matsalana Jenerala Wa Nhlangano Wa Matiko Amina J. Mohammed, January 26, 2023.
Etindhawini tin’wana laha ku nga ni ku rhula namuntlha, ku nga sungula nyimpi ni madzolonga ya swa tipolitiki swi nga languteriwanga. Hambi ku ri vanhu lava nga ematikweni ya le kule, va nga khumbiwa hileswi endlekaka etikweni rin’wana loko va swi vona eka inthanete. Vuyelo byo biha lebyi vangiwaka hi nyimpi byi va kona nkarhi wo leha hambiloko se yi herile. Xiya swikombiso swi nga ri swingani:
Ku kayivela ka swakudya. Xiviko lexi humaka eka Vandlha Ra Swakudya Ra Misava xi vula leswaku “nyimpi i yin’wana ya swivangelo leswikulu leswi endlaka leswaku ku va ni ndlala naswona 70 wa tiphesente ta vanhu lava xanisiwaka hi ndlala, va tshama etindhawini leti nga ni nyimpi ni madzolonga ya swa tipolitiki.”
Swiphiqo swa rihanyo ni swa miehleketo. Loko ku ri ni nxungeto wa nyimpi, vanhu lava tshamaka endhawini yoleyo va tshikileleka ni ku vilela. Nakambe vanhu lava tshamaka laha ku nga ni nyimpi, va vaviseka ni ku karhatiwa hi swiphiqo swa miehleketo. Lexi twisaka ku vava, mikarhi yo tala a va koti ku kuma mpfuno wa swa vutshunguri.
Vanhu va boheka ku baleka. Khomixinara leyi Tlakukeke ya Nhlangano wa Matiko ya Vahlapfa yi vule leswaku ku sukela hi September 2023, vanhu lava tlulaka 114 wa timiliyoni emisaveni hinkwayo va boheke ku baleka emakaya ya vona. Nyimpi ni madzolonga ya swa tipolitiki, hi swona leswi endleke va baleka.
Xiphiqo xa ikhonomi. Hakanyingi vanhu va langutana ni swiphiqo swa ikhonomi leswi vangiweke hi nyimpi, swo tanihi ku durha ka swilo. Va xaniseka loko mfumo wu tirhisa mali eka swa tinyimpi, ku ri ni ku yi tirhisa eka swa rihanyo ni dyondzo. Nakambe swa durha ku aka miako ni ku lunghisa nhundzu leyi onhiweke hi nyimpi.
Ku onhiwa ka mbangu. Vanhu va xaniseka swinene loko swilo swa ntumbuluko leswi va swi tirhisaka swi onhiwa hi vomu. Ku thyakisiwa ka mati, moya ni misava swi vanga mavabyi yo hambanahambana naswona tibomo leti salaka endzhaku ka loko nyimpi se yi herile, ti ya emahlweni ti vavisa vanhu.
Handle ko kanakana, nyimpi ya onhetela naswona ya durha swinene.