Papila Leri Humaka Eka Huvo Leyi Fumaka
Eka Timbhoni-kulorhi Ta Yehovha:
I ntsako lowukulu ku va hi mi tsalela n’wina malandza ya Yehovha lama rhandzekaka ni lama tshembekaka, lawa sweswi ma tlulaka nkombo wa timiliyoni. Loko u hlangana ni mupfumeri-kuloni la humaka eka xiphemu xin’wana xa misava, hi xihatla u tsakela vuxaka byo hlawuleka bya rirhandzu ni mupfumeri yoloye. (Yoh. 13:34, 35) A swi kanakanisi leswaku loko u hlaya rungula leri nyanyulaka eka Buku Ya Lembe leyi, leri vulavulaka hi ripfumelo ni ku tshembeka ka vamakwenu va xinuna ni va xisati va le matikweni yo hambana-hambana, u ta tlhela u byi xiya vuxaka byebyo byo hlawuleka.
Swiviko leswi humaka emisaveni hinkwayo swi kombisa leswaku vo tala va n’wina mi va ni Vugandzeri bya Ndyangu nkarhi na nkarhi. Van’wana va n’wina lava nga ni vana lavatsongo mi tirhisa tindlela to tala leti tsakisaka ku endla leswaku vana va n’wina va tsakela dyondzo leyi. (Efe. 6:4) Vukati bya tiya loko mimpatswa yi dyondza swin’we. (Efe. 5:28-33) Hakunene, munhu un’wana ni un’wana swin’we ni mindyangu va vuyeriwa eka lunghiselelo leri ro va ni dyondzo leyi dzikeke ya Rito ra Xikwembu.—Yox. 1:8, 9.
Hi rila na n’wina hinkwenu lava mi lahlekeriweke hi swilo swa n’wina hikwalaho ka timhangu ta ntumbuluko leta ha ku humelelaka. Hi nkhensa hinkwavo lava nga kanakanangiki ku hlanganyela eka matshalatshala yo phalala lava hlaseriweke hi minkarhi yoleyo ya khombo. (Mint. 11:28-30; Gal. 6:9, 10) Ku engetela kwalaho, evandlheni rin’wana ni rin’wana, ku ni van’wana va n’wina lava xiyaka swilaveko swa nyama swa vamakwerhu kutani va teka goza ro va pfuna. Ku fana na Dorkasi wa le Bibeleni, mi ni ‘swiendlo swo tala leswinene naswona mi endla tinyiko to tala ta tintswalo.’ (Mint. 9:36) Tiyisekani leswaku Yehovha wa swi vona leswi naswona u ta mi hakela hi ku pfumelelana na swona.—Mat. 6:3, 4.
Ematikweni man’wana, timfanelo ta n’wina ti khomiwa hi ndlela yo biha hi lava va soholotaka milawu leswaku va “kunguhata khombo hi xileriso xa nawu.” (Ps. 94:20-22) Leswi mi swi tivaka leswaku Yesu u profete hi minxaniso yoleyo, mi tiyisela hi xivindzi naswona mi titshege hi Yehovha tanihi khokholo ra n’wina. (Yoh. 15:19, 20) Vamakwerhu lava rhandzekaka, tiyisekani leswaku nkarhi na nkarhi ha mi katsa eswikhongelweni swa hina tanihi leswi mi hambetaka mi “tihlamulela emahlweni ka mani na mani la lavaka ku tiva hi ta ntshembo lowu mi nga na wona.”—1 Pet. 3:13-15.
Hi rhandza ku bumabumela n’wina vanhu va timiliyoni lava lembe ni lembe mi tshamaka mi tengile emahanyelweni ya n’wina ku nga khathariseki leswi hi vuxisi Sathana a hlohlotelaka mahanyelo yo biha. Hi nkarhi lowu mahanyelo ya misava ma hohlokaka swinene, n’wina mi “kuma matimba eHosini ni le ka ntamu wa vukulu bya yona.” (Efe. 6:10) Mi ‘ambale mahavelo hinkwawo lama humaka eka Xikwembu’ kutani mi yima mi tiyile mi lwisana ni “marhengu ya Diyavulosi.” (Efe. 6:11, 12) Tivani leswaku Yehovha u tirhisa xikombiso xa n’wina leswaku a n’wi hlamula hi ndlela leyi twalaka Sathana, loyi a n’wi tlhontlhaka!—Swiv. 27:11.
A hi tsake swinene ku twa leswaku hi 2011, vanhu va 19 374 737 va ve kona eka Xitsundzuxo xa rifu ra Hosi ya hina. Xin’wana lexi endleke leswaku ku va ni vanhu volavo vo tala swinene hi leswi vo tala va n’wina mi tekeke vuphayona bya nkarhinyana hi April n’wexemu. Timiliyoni ta vaaki va misava ti kote ku twa mpfumawulo wa vun’we wa ku dzunisa Yehovha wu huma eka Timbhoni takwe leti tshembekaka! (Rhom. 10:18) Ku nga khathariseki leswaku a wu ri un’wana wa lava va 2 657 377 lava a va ri maphayona ya nkarhinyana hi n’hweti yoleyo kumbe u tikarhatele ku ndlandlamuxa ntirho wa wena hi ndlela yo karhi, hinkwenu ka n’wina mi endle leswaku hi tsaka hikwalaho ka moya wa n’wina wa ku tinyiketela ni ku hisekela ka n’wina ntirho.—Ps. 110:3; Kol. 3:23.
N’wexemu, vanhu lavantshwa va 263 131 va kombise ku tinyiketela ka vona eka Yehovha. Hi nkhensa Yehovha hikwalaho ka leswi, naswona ha mi nkhensa hinkwenu ka n’wina hi leswi mi hi joyineke leswaku hi yisa xirhambo eka van’wana lexi nge: “‘Tana!’ Naswona mani na mani la swi twaka a a vule a ku: ‘Tana!’ Mani na mani la khomiweke hi torha a a te; mani na mani la swi navelaka a a nwe mati ya vutomi mahala.” (Nhlav. 22:17) Ngopfu-ngopfu endzhaku ka loko emintsombanweni ya hina ya muganga ya 2011 hi kambisise swiyenge swa Mfumo wa Xikwembu lowu simekiweke, sweswi hi swi vula hi ntsako ku tlula rini na rini leswaku “Mfumo Wa Xikwembu A Wu Te!” Hi ku khutaziwa hi xitiyisekiso xa Yesu lexi nge, “Ndza ta hi ku hatlisa,” hi timbilu hinkwato na hina hi hlamula hilaha muapostola Yohane a hlamuleke hakona loko a ku: “Amen! Tana, Hosi Yesu.”—Nhlav. 22:20.
Loko ma ha rindzele xiendlakalo xolexo lexi nyanyulaka, tiyisekani leswaku ha mi rhandza hakunene hinkwenu n’wina vamakwerhu lava rhandzekaka va xinuna ni va xisati, lava kombisaka leswaku mi rhandza Yehovha “hi swiendlo ni ntiyiso”!—1 Yoh. 3:18.
Vamakwenu,
Huvo Leyi Fumaka Ya Timbhoni Ta Yehovha