Papila Leri Humaka Eka Huvo Leyi Fumaka
Vamakwerhu Lava Rhandzekaka:
“ONGE mi nga va ni musa lowu nga faneriwiki ni ku rhula leswi humaka eka Xikwembu Tata wa hina ni le ka Hosi Yesu Kreste.” (1 Kor. 1:3) Mawaku ndlela leyi hi wu languteleke hi mahlo-ngati ha yona, nkarhi lowu swivumbiwa hinkwaswo leswi hefemulaka swi nga ta dzunisa Yehovha hi ndlela leyi n’wi fanelaka! (Ps. 150:6) Loko ha ha rindzele siku rero lerikulu, hi hambeta hi chumayela mahungu lamanene ya Mfumo wa Xikwembu ni ku endla vadyondzisiwa.
Ku vula evhangeli i ntirho wa nkoka lowu Yehovha a lavaka leswaku wu endliwa emisaveni, enkarhini lowu. (Mar. 13:10) Leswi hi swi tivaka kahle leswaku Yehovha u tiyimisele leswaku ntirho lowu wu endliwa, hi khongela leswaku a hi pfuna, hi ri karhi hi swi tiva leswaku munhu un’wana ni un’wana u ni lunghelo ro vuyeriwa hi lunghiselelo ra nkutsulo. (Nhlav. 14:6, 7, 14, 15) I ntiyiso leswaku hi langutana ni swiyimo swo tika kambe ha tsaka leswi hi ‘ambexiweke matimba lama humaka ehenhla’ lama nga ta hi pfuna leswaku hi endla ntirho lowu hi wu heta!—Luka 24:49.
Swa tsakisa ku languta ntirho lowu hi wu endleke eka lembe ra ntirho ra n’wexemu kutani hi anakanyisisa hi leswi Yehovha a swi endleke hi ku tirhisa malandza ya yena yo tshembeka. Moya lowo kwetsima wu nyike vanhu va Xikwembu matimba, hikwalaho va kombise rirhandzu leri fanaka ni ra Kreste, kutani va hlula rivengo emisaveni hinkwayo. Rirhandzu ro tano ri vonake emintsombanweni ya hina. Ku sukela hi June ku ya eka December 2003, vapfhumba lava humaka ematikweni yo tlula dzana, va ye emintsombanweni ya matiko hinkwawo ya 32, leyi a yi khomiwe eka matiko-nkulu ya tsevu. Emintsombanweni ya muganga ni le mintsombanweni ya matiko hinkwawo, ku buriwe ni swirho swo tala leswi nga varhumiwa, vamakwerhu lava pfunetaka ku aka ematikweni mambe ni swirho swa ndyangu wa Bethele leswi tirhaka ematikweni mambe.
Loko hi ri emintsombanweni leyi, hi kume broxara leyi nge “Vona Tiko Lerinene” ni buku leyi nge Dyondza Eka Mudyondzisi Lonkulu. Tlhandlakambirhi, hi tivisiwe leswaku loko lembe ra ntirho ra 2004 ri ya eku heleni, ku ta sungula ku tirhisiwa buku leyi pfuxetiweke ya Xikolo xa Ntirho wa Vuphayona. Loko nkarhi wu ri karhi wu famba, lava se va nga ni nkarhi wo leha va ri maphayona, va ta nghena swin’we ni lava va ha ku sungulaka ku phayona, loko ku ri ni xikolo xa maphayona.
Nseketelo wa Xikwembu ni ku hanana ka vanhu ku endle leswaku ku akiwa Tiholo ta Mfumo to tala, ngopfu-ngopfu ematikweni lama nga evuswetini. Miako ya marhavi yi karhi ya kurisiwa ematikweni yo tala hikwalaho ka leswi ku yaka ku va ni xilaveko lexikulu xa swakudya swa moya emisaveni hinkwayo. Broxara leyi nge Tsakela Vutomi eMisaveni Hi Masiku! sweswi yi kumeka hi tindzimi ta 299, naswona ku kandziyisiwe tikopi ta 139 wa timiliyoni; eka buku leyi nge Vutivi Lebyi Yisaka eVuton’wini Lebyi Nga Heriki se ku kandziyisiwe tikopi leti tlulaka 93 wa timiliyoni hi tindzimi ta 161; naswona se ku kandziyisiwe tikopi leti tlulaka 200 wa timiliyoni ta broxara leyi nge I Yini Leswi Xikwembu Xi Swi Languteleke Eka Hina? hi tindzimi ta 267.
Hi mi amukela hi mandla mambirhi n’wina va 258 845 leswi mi kombiseke ku tinyiketela ka n’wina hi ku khuvuriwa ematini eka lembe ra ntirho ra n’wexemu! Hambileswi ku seketela ka n’wina Mfumo wa Xikwembu ku endleke leswaku mi va valala lavakulu va Sathana, ku tlhele ku endla leswaku mi va vanhu vo hlawuleka lava faneriwaka hi mikateko ya Yehovha ni nsirhelelo wa moya, loko mi ri karhi mi tsutsuma emphikizanweni lowu vekiweke emahlweni ka n’wina. (Hev. 12:1, 2; Nhlav. 12:17) Ina, tiyisekani leswaku ‘Loyi a mi rindzaka a nge khudzeheli.’—Ps. 121:3.
Ndzimana ya lembe ra 2004, leyi nge “Tshamani mi rindzile . . . Tshamani mi lunghekile,” yi le nkarhini swinene. (Mat. 24:42, 44) Rito ra Xikwembu ri vula leswaku Vakreste i valuveri emafambiselweni lawa lama yaka eku heleni. (1 Pet. 2:11; 4:7) Hikwalaho, vutomi bya hina byi fanele byi tshama byi dzikile eka swilo swa moya, hi hambeta hi hanya vutomi byo olova naswona hi kambisisa timbilu ta hina hi vukheta. “Dragona leyikulu” yi lava ku hi bvanyangeta kutani yi hi hoxa eka mafambiselo ya yona ya swilo.—Nhlav. 12:9.
Ku hlaya Bibele siku ni siku ku ta hi pfuna leswaku hi tshama hi xalamukile. Ku ta hi pfuna leswaku ‘Ina wa hina a va Ina’ loko swi ta eku tinyiketeleni ka hina nileswaku “hi ku khoma ku tiyile ku tiyiseka loku a hi ri na kona eku sunguleni, ku yisa emakumu.” (Yak. 5:12; Hev. 3:14) Ku hlaya Bibele siku ni siku swi ta hi pfuna hi vona leswaku vanhu vo tala emisaveni a va ha ri na mhaka ni milawu ya Xikwembu leyi nga hundzukiki. (Mal. 3:6; 2 Tim. 3:1, 13) Vutivi bya Bibele byi ta hi pfuna leswaku hi papalata “timhaka ta mavunwa leti kunguhatiweke hi mano” nileswaku hi tshama hi tshembekile eka Yehovha.—2 Pet. 1:16; 3:11.
Vatswari, xana loko mi ri karhi mi kurisa vana va n’wina hi ku tshinya ni nkongomiso wa mianakanyo wa Yehovha, ma va pfuna leswaku va tivekela tipakani ta moya nileswaku va ‘tshama va rindzile’? (Efe. 6:4) Xana mi va letela leswaku va languta vumundzuku bya vona hilaha munhu wo tlhariha ku va tlula hinkwavo a a byi languta hakona? Loko Yesu a a swi lavile, a a ta va a ve muvatli wa ndhuma, musunguri la tivekaka kumbe dokodela loyi ku nga riki na munhu la fanaka na yena, kambe u nyiketele vutomi bya yena evutirhelini bya nkarhi hinkwawo. Onge xikombiso xa yena xi nga mi susumeta leswaku mi pfuna vana va n’wina va teka timhaka ta Mfumo ti ri ta nkoka swinene evuton’wini bya vona.
Ntlawa wa hlonga ro tshembeka ni ro tlhariha, lowu yimeriwaka hi Huvo leyi Fumaka, wu nkhensa “ntshungu lowukulu” hi mbilu hinkwayo, hi leswi wu wu pfunaka ku hetisisa vutihlamuleri bya wona bya ku ‘chumayela mahungu lamanene ya mfumo emisaveni hinkwayo leyi akiweke leswaku byi va vumbhoni.’ (Nhlav. 7:9; Mat. 24:14, 45) N’wina varhandziwa, Yehovha wa mi tiyisekisa leswaku wa wu tsundzuka ‘ntirho wa n’wina ni rirhandzu leri mi ri kombiseke hikwalaho ka vito ra yena, hileswi mi tirheleke vakwetsimi naswona ma ha yaka emahlweni mi va tirhela.’ (Hev. 6:10) Loko mi ri karhi mi hlaya mintokoto leyi tsakisaka ematlukeni lama landzelaka naswona mi vona mihandzu ya ku tirha ka n’wina hi matimba, hi vun’we, swi tiveni leswaku mi hoxe xandla swinene entirhweni wo chumayela lowu endliwaka emisaveni hinkwayo.
Onge mi nga langutana ni vumundzuku mi nga chavi nchumu loko mi ri karhi mi hambeta mi “languta swinene-nene eku nyikiweni ka hakelo,” mi nga pfumeleli munhu ni un’we kumbe dimona leswaku ri mi sivela ku yi kuma. (Hev. 11:26; Kol. 2:18) Ina, tshembani Yehovha, mi ri karhi mi tiyiseka leswaku hinkwavo lava n’wi rhandzaka u ta va pfuna leswaku va kuma vutomi lebyi heleleke.—Yoh. 6:48-54.
Swi tiveni leswaku hi tsakela ku tirha na n’wina leswaku hi tisa ku dzuneka eku vangameni ka Yehovha.
Vamakwenu,
Huvo Leyi Fumaka Ya Timbhoni Ta Yehovha