Papila Leri Humaka Eka Huvo Leyi Fumaka

LESWI hi nga le kusuhi ni mafambiselo lamantshwa ya swilo, i swa nkoka leswaku hi tshama hi langutele ku fika ka siku ra Yehovha. (Sof. 3:8) Muprofeta Daniyele u vule leswaku “Xikwembu . . . i Muhlavuteri wa swihundla, naswona xi tivise . . . leswi nga ta humelela exiphen’wini xo hetelela xa masiku.” (Dan. 2:28) Hakunene i lunghelo ku hanya eku heleni ka nkarhi wolowo lowu profetiweke, ni ku twisisa swihundla swa Yehovha leswi a swi twarisaka namuntlha!

Hi ku tirhisa “hlonga ro tshembeka ni ro tlhariha,” Yehovha u hlavutele xikongomelo xa yena ka ha ri ni nkarhi leswaku a hlengeleta “ntshungu lowukulu” wa vagandzeri ematikweni hinkwawo hi nkarhi lowu wa le ‘masikwini yo hetelela’ lama nga ni maxangu. (Mat. 24:45; Nhlav. 7:9; 2 Tim. 3:1) Esaya 2:2, 3 yi hlamusela leswaku ntirho lowu, lowu endliwaka emisaveni hinkwayo wu ta endliwa “exiphen’wini xo hetelela xa masiku.” Lembe ni lembe ku va ni ku hlengeletiwa loku ka vanhu hambileswi mpfilumpfilu ni madzolonga swi tinyikeke matimba emisaveni.

Hi lembe ra 2004, hi pfuniwe leswaku hi vona xilaveko xo yingisa marito ya Yesu lama nge: “Tshamani mi rindzile . . . Tshamani mi lunghekile.” (Mat. 24:42, 44) Entiyisweni, Vakreste lava vonaka “swikombiso swa minkarhi” leyi, va swi twisisa kahle leswi humelelaka emisaveni naswona va teka goza leri faneleke. (Mat. 16:1-3) Yehovha u ta hetisisa leswi a swi vuleke eRitweni rakwe, hi ku hambeta a seketela vanhu va yena lava a nga hlela leswaku va endla ntirho wakwe, hambileswi va nga ha langutanaka ni nkaneto.

Ku nga khathariseki matshalatshala ya van’wana yo kavanyeta kumbe yo sivela ku chumayela hi Mfumo, vamakwerhu va hambeta va hlengeletana ni ku vulavula ntiyiso. (Mint. 5:19, 20; Hev. 10:24, 25) Hi June 2004, huvo ya swivilelo ya le Moscow, eRhaxiya yi seketele xiboho lexi endliweke hi huvo leyitsongo xo yirisa mintirho ya Timbhoni ta Yehovha ni ku herisa vandla ra tona ra le nawini edorobeni rolero. Hambiswiritano, vamakwerhu a va helanga matimba; va tiva leswi Xikwembu xi swi languteleke eka vona, naswona va yingisa xona tanihi Mufumi ku tlula vanhu. (Mint. 5:29) Ha tiyiseka leswaku Yehovha u ta kongomisa malandza yakwe hambileswi tihuvo ti yirisaka ntirho wa wona.

Eka malembe ma nga ri mangani lama hundzuke, le Riphabliki ra Georgia, vamakwerhu va lahlekeriwe hi nhundzu ya vona, va xanisiwa hi ntshungu wa vapfukeri ni ku vona minkandziyiso ya vona yi ri karhi yi hisiwa. Kambe tlhari rihi ni rihi leri a ri endleriwe ku hlasela vona ri tsandzekile. (Esa. 54:17) Hi lembe ra ntirho ra 2004, Timbhoni ta Yehovha ti tlhele ti amukeriwa ximfumo le Georgia. Mintsombano yi fambe kahle handle ko kavanyetiwa, naswona minkandziyiso a yi aleriwi leswaku yi nghena etikweni. Ku vikiwe nhlohlorhi leyintshwa ya vahuweleri ni ya lava veke kona eXitsundzuxweni.

Le Armenia, Eritrea, Riphabliki ra Korea, Rwanda, ni le Turkmenistan, vamakwerhu va khomiwile hikwalaho ka ripfumelo ra vona. Hambileswi va xanisiweke, va xi tiva xivangelo xa Matsalwa xa ku xanisiwa ka vona, ku nga xona xi va pfunaka ku tshama va tshembekile, va rindzela leswaku Yehovha a va ponisa.—1 Pet. 1:6; 2 Pet. 2:9.

Loko u ri karhi u hlaya hi ta Swiendlakalo-nkulu Swa N’wexemu kutani u kambisisa Xiviko Xa Misava Hinkwayo xa 2004, u ta tsakisiwa hi vunene bya Yehovha. (Ps. 31:19; 65:11) Hi ni ntshembo wa leswaku Buku Ya Lembe leri yi ta ku khutaza leswaku u hambeta u famba hi ndlela leyi tsakisaka Xikwembu.—1 Tes. 4:1.

Ku karhi ku endliwa matshalatshala lamakulu ya leswaku ntiyiso wu fikelela vanhu hinkwavo. Hi xikombiso, ku lunghiseleriwe tivhidiyo, ti-DVD ni swilo swin’wana hi ririmi ra mavoko ni minkandziyiso ya lavo-fe-mahlo, leswaku lava nga twiki ni lavo-fe-mahlo va kuma swakudya swa moya. Vahuweleri vo tala va Mfumo va dyondze tindzimi leti vulavuriwaka hi vanhu lava rhurheleke ensin’wini ya vandlha ra vona.

Ku engetela kwalaho, ku simekiwe mintlawa yo tala leyi nga yoxe emasin’wini lawa swi tikaka ku ma fikelela. Rhavi rin’wana ri ni mintlawa yo tlula 300 leyi nga yoxe, leyi nga ni vahuweleri vo tlula 7 000. Swi le rivaleni leswaku ku ta simekiwa mavandlha lamantshwa! Ku engetela kwalaho, eka vanhu lava ringanaka 16 760 607, lava veke kona eXitsundzuxweni eka lembe ra ntirho leri hundzeke, lava tlulaka 10 wa timiliyoni a ku nga ri Timbhoni. Lexi i xikombiso lexi nga lo dlaa, erivaleni xa leswaku va ha tele vanhu lava nga ta amukela ntiyiso.

Hi nkhensa Yehovha hikwalaho ka mikateko leyi fuweke ni ndlela ya rirhandzu leyi a hi khathalelaka ha yona siku ni siku. (Swiv. 10:22; Mal. 3:10; 1 Pet. 5:7) Loko hi ri karhi hi ya emahlweni hi ri nyandza yin’we “exiphen’wini [lexi] xo hetelela xa masiku,” hi veka ntshembo wa hina eka Yehovha. Ku nga khathariseki swiphiqo leswi hi nga langutanaka na swona, hi fanele hi yingisa marito ya ndzimana ya hina ya lembe ya 2005 leyi nge: “Mpfuno wa mina wu huma eka Yehovha.” (Ps. 121:2) Swi tiveni leswaku ha mi rhandza naswona hi hambeta hi mi khongelela.

Vamakwenu

Huvo Leyi Fumaka Ya Timbhoni Ta Yehovha