GEORGIA
“Eka Xikwembu Swilo Hinkwaswo Swa Koteka”
Natela Grigoriadis
U VELEKIWE HI 1960
U KHUVURIWE HI 1987
MATIMU YAKWE HI KU KOMISA Endzhaku ka loko a ha ku khuvuriwa, Natela u tirhise ntokoto wakwe swin’we ni ku va a tiva vanhu tanihi mininjhere wa swa mabindzu leswaku a antswisa ndlela leyi ntirho wo kandziyisa exihundleni a wu endliwa ha yona.
EMINHLANGANWENI ya hina eku heleni ka va-1980, nkandziyiso wa Xihondzo xo Rindza lexi dyondziwaka evandlheni a wu khomiwa hi loyi a fambisaka dyondzo ntsena naswona hi ntolovelo a wu va wu tsariwe hi voko. Ndzi ye eka Genadi Gudadze loyi a ri un’wana wa vakulu va kwalaho kutani ndzi ringanyeta leswaku hi ringeta ku ti kandziyisela timagazini ta hina.
Ku sukela kwalaho, vamakwerhu a va tirhisa muchini lowu va ti endleleke wona wo kandziyisa lowu a wu vuriwa mimeograph leswaku va ti kandziyisela minkandziyiso yitsongo. Leswaku ku kandziyisiwa timagazini nkarhi na nkarhi, a ku laveka muchini wo endla tikopi, munhu loyi a a kota ku thayipa, muchini wo thayipa hi wona ni loyi a ta hi xavisela maphepha lama faneleke. Hambiswiritano, switirhisiwa hinkwaswo swo kandziyisa ku katsa ni maphepha a swi tsarisiwe hi mfumo ni ku tlhela swi lawuriwa hi varindzi lava nga ni ntokoto.
Ndzi kume muchini wo thayipa hi wona eka mutirhelamfumo loyi a ndzi tolovelane na yena, loyi a a kota ku kuma michini leyi a yi nga ha lawuriwi hi mfumo. Sesi wa mina a kota ku thayipa naswona a ta hi pfuna. Vamakwerhu va endle mimeograph yin’wana kutani va kuma munhu loyi a hi ta xava eka yena maphepha. Swilo se a swi tshamisekile, hi ku hatlisa hi kandziyise kopi ya hina yo sungula ya Xihondzo xo Rindza ya Xigeorgia.
Kambe ku ve ni xiphiqo. Siku rin’wana Genadi u ndzi byele a ku: “Hi fanele hi kuma munhu un’wana loyi hi nga ta xava eka yena maphepha.” A a vone maphepha ehofisini ya mfumo kambe a nga ta kota ku ma xava hi ku va maphorisa a ma n’wi veke tihlo. A hi ta ma kuma njhani? Hi ku phindhaphindha ndzi te: “A swi nge koteki!” Genadi u ndzi hlamule a ku: “Tshika ku vula leswaku, ‘A swi nge koteki.’ ‘Eka Xikwembu swilo hinkwaswo swa koteka’!”—Mat. 19:26.
Ndzi anakanyisise hi swona hi ku phindhaphindha loko ndzi ri karhi ndzi ya ehofisini ya mfumo hi siku leri landzeleke. Yehovha u ndzi kongomise eka muthayipi un’wana loyi a ri ni xinghana, loyi a tiyimisele ku yisa xikombelo xa mina eka murhangeri wa kwalaho. A ku ri nuna wakwe! Hi ku hatlisa se a ndzi xava maphepha ehofisini yoleyo naswona endzhaku ka sweswo a hi tlhelanga hi va ni xiphiqo loko hi lava ku ma xava.