Zihotlovila Misaveni

U WA ta alakanya yini loku u wa khingiwa hi munhu, na yena a lehile kota a langwa la yindlu ya wena? Munhu loye i wa tava xihotlovila! Xi wa hi kona xikhati lexi hakunene ku nga hi ni zihotlovila misaveni. A Biblia gi komba lezaku a vararu va zona vave tingelosi ta le tilweni. Kanilezi, zi wa ta mahekisa kuyini zilo lezo?

Alakanya, a ngelosi yo biha, Satani, yi wa vanga zikarato. Yona kambe yi wa zama ku maha lezaku tingelosi ta Nungungulu ti biha. Hi kufamba ka xikhati, tingelosi to kari ti lo sangula ku ingisa Satani. Ti lo tsika a ntiro lowu Nungungulu a nga ti nyikile le tilweni. Tona ti lo relela misaveni ti ta ti mahela mimiri ya vanhu. Wa zi tiva a ku hikuyini?

A Biblia gi ngalo a vana lavo va Nungungulu va lo wona vavasati vo saseka misaveni niku va lo xuva ku hanya na vona. Vona va lota misaveni va ta tekana ni vavasati lavo. A Biblia gi ngalo lezo zi wa bihile, hakuva Nungungulu i mahile tingelosi lezaku ti hanya tilweni.

Laha a tingelosi ni vasati va tona va ngava ni vana, a vana lavo va lo hambana ni vanwani. Kusanguleni, a kuhambana loko ka zi kota ku ngha ku nga wonekangi nguvu. Kanilezi vona va lo simama ku kula va maha va hombe nguvu, va kuma ntamu wunyingi, kala va maha zihotlovila.

A zihotlovila lezo zi wa bihile. Kota lezi zi nga hi za hombe ni kuva ni ntamu wunyingi, zona zi wa zi kota ku bayisa vanhu. Zi lo zama ku kurumeta vontlhe lezaku va biha a ku kota zona.

Enoki i wa file, kanilezi xikhatini lexo i wa hi kona wanuna munwe a nga hi mu nene misaveni. A vito ga wanuna loye ku wa hi Noa. Xontlhe xikhati yena i wa maha lezi Nungungulu a nga zi lava.

Siku go kari Nungungulu i lo byela Noa lezaku xi wa chikele xikhati xa ku Yena a lovisa vontlhe vanhu vo biha. Kanilezi Nungungulu i wa ta ponisa Noa, ngango wakwe ni zihari zinyingi. A hi woneni lezi Nungungulu a nga mahisa zona.