Papilo ga Hubye yi Fumako

Muranzi wa Jehova a ranzekako:

“Mu ta tiva zinene, ni zinene zi ta mu tlhatlhisa,” ku wulile Jesu. (Johani 8:32) A hi kona kutiyisa hlana ka magezu lawo! Ina, za koteka a ku tiva zinene, hambu ‘masikwini lawa yo gumesa’ lomu a mawunwa ni kukanganyisa zi teleko nguvu. (2 Timote 3:1) Wa alakanya a xikhati lexi u nga sangula ku tiva zinene kota lezi zi tlhamuselwako Mhakeni ya Nungungulu? Hakunene zi ku tsakisile nguvu!

Hambulezo, kota lezi zi nga za lisima a kuva ni wutivi ga lisine ga zinene ni ku tlhela hi byela vanwani xungetano hi wutivi lego hi kukhanzakanya, hi fanele ku hanya hi kuyelana ni zinene. Kasi hi maha lezo, hi fanele ku tshama liranzweni la Nungungulu. Xana lezo zi patsa yini? A magezu ya Jesu lawa a nga ma wula wusikwini ga mahlweni ka kufa kakwe ma hlamula a xiwutiso lexi. I te ngalo ka vapostoli vakwe vo tsumbeka: “Loku mu hlayisa a milayo ya mina, mu ta tshama liranzweni la mina; kota lezi mina nzi hlayisileko a milayo ya Dadani, nzi tshama liranzweni lakwe.” — Johani 15:10.

Wona lezaku Jesu i tshamile liranzweni la Nungungulu hi ku hlayisa milayo ya Dadani wakwe. Hinawu hi fanele ku maha lezo inyamutlha. Kasi ku tshama liranzweni la Nungungulu, hi fanele ku hanya hi kuyelana ni zinene wutomini ga siku ni siku. Ka wusiku galego, Jesu i te ngalo: “Loku mu tiva a timhaka leti, mu katekile loku mu ti maha.” — Johani 13:17.

Hi xuva hi mbilu yontlhe lezaku a bhuku legi gi ku vuna a ku simama u hanya hi zinene wutomini ga wena niku hi ku maha lezo u tshama ‘liranzweni la Nungungulu, na u cuwukela kuhanya ka pinzukelwa.’ — Juda 21.