Jehova ‘a nga na xihlawulela’

Xana u tshuka u chepetiwa? Xana u tshuka u tsoniwa nchumu, kutani ku mahelwa lunya hi kota ya hlonge ya wena, mudawuko wa wena, kutani hi kota ya xiyimeko xa wena? Loku zi hi tano, a hi wena wece. Kanilezi ku na ni mahungu yo saseka: Hambu lezi a kuchepetwa loko ku hangalakileko nguvu laha misaveni, le tilweni a ku kona. Mupostoli Pedro i wulile lezi na a hi ni kutiyiseka ka hombe: ‘Nungungulu a nga na xihlawulela.’ — Gonza Mitiro 10:34, 35.

Pedro i wulile a magezu lawa ka xiyimo xo kala ku toloveleka — a kaya ka wanuna Wamatiko a nga vitaniwa ku hi Korneliu. Pedro i wa hi muJuda, niku i hanyile ka xikhati lexi a vaJuda va nga wona a Vamatiko kota va nga hlazekangiko, hi xigelo lexo va wa zi wona na zi nga ringani a ku maha navo wunghana. Makunu, hikuyini Pedro a nga hi kaya ka Korneliu? Hi ndlela yo kongoma, hi Jehova Nungungulu a nga lulamisile a kutlhangana loko. Pedro i wa amukele a muwoniso wa Nungungulu laha a nga byeliwa lezaku: “Lexi Nungungulu a xi basisileko, u nga wuli wena uku xa yila.” Tolo wa kona, na Pedro a nga zi tivi, Korneliu yenawu i wa amukele a muwoniso lowu a ngelosi yi nga mu leletela lezaku a vitanisa Pedro. (Mitiro 10:1-15) A xikhati lexi Pedro a nga tiyiseka lezaku Jehova i wa patseka mhakeni leyo, a nga zi kotangi ku miyela.

Pedro i te ngalo: ‘Hakunene nza zi wona lezaku Nungungulu a nga na xihlawulela.’ (Mitiro 10:34) A gezu ga xiGreki legi gi hunzuluselweko ku “xihlawulela” hi kukongoma gi wula a “munhu a cuwukako tinghohe.” (The Kingdom Interlinear Translation of the Greek Scriptures) Xungetano hi gezu legi, a tlhari yo kari yi tlhamusela lezi: “Gi wula a mulamuli a cuwukako lomu nghoheni ya munhu a guma a mu lamula, na a ngayi hi lezi a mhaka yi tshamisileko zona, kanilezi hi lezi a mu ranzako kutani ku mu nyenya.” Nungungulu a nga nyiki lisima a nghohe yo kari ku hunza yinwani hi kuya hi hlonge, tiko ga mabeleko, kutani ni xihi lexi a xi wonako laha ka munhu.

A ku hambana ni lezo, Jehova i wona lezi hi nga zona lomu mbilwini ya hina. (1 Samueli 16:7; Mavingu 21:2) Pedro i lo engeta aku: “Ka tixaka tontlhe loyi a mu chavako, ni ku maha kululama, wa amukeleka ka yena.” (Mitiro 10:35) A ku chava Jehova zi wula a ku ti koramisa mahlweni kakwe, ku mu dumisa, ni ku mu tsumba, hi potsa ni xihi xi nga wa ta mu khunguvanyisa. A ku maha kululama zi patsa ku maha lezi zi lulamileko mahlweni ka Nungungulu. Jehova wa tsaka nguvu hi munhu loyi a mbilu yakwe yi nga ni xichawo xo eta xi mu kucako a ku maha lezi zi lulamileko. — Deuteronome 10:12, 13.

Loku ku hi lezaku u tshuka u chepetiwa kutani ku mahelwa xihlawulela, u na ni xigelo xo zwala xa lezaku u tiyisiwa hi magezu ya Pedro xungetano hi Nungungulu. Jehova i kokela vanhu va matiko wontlhe wukhozelini ga lisine. (Johani 6:44; Mitiro 17:26, 27) Wa ingisela a tlhela a hlamula mikhongelo ya vontlhe vakhozeli vakwe na ku nga khataliseki a hlonge yabye, a tiko gabye ga mabeleko, kutani xiyimeko xabye. (1 Tihosi 8:41-43) Hi nga tiyiseka lezaku loku Jehova a cuwuka laha misaveni, yena i wona hlonge yinwe basi — ku nga vanhu. Xana wa kuceka a ku gonza zotala hi Nungungulu loyi a nga hava xihlawulela?