Kutsumba muni ku nga kona hi vakokwani va mina va fileko?

KA xikhati xi hunzileko, ku lova ni hloko ya mhaka yo koka kupima ka The Chosun Ilbo, ku nga phepha-hungu ga le Coréia. Yi lo wutisa lezi: “A nhanyana wo hlamalisa Shim Cheong, loyi a nga kala a nga tivi nchumu xungetano hi Jesu — i yile a yaswa tilweni ke?”

A hloko ya mhaka leyo yi wa khumba nguvu, hakuva Shim Cheong i nhanyana wo ranzeka nguvu ka matimu ya Coréia loyi a nyikeleko wutomi gakwe kasi ku vuna papai wakwe wa xikhumu. Ku hunza malembe yo tala, na a dzunziwa nguvu. Hi lisine, le Coréia, “Shim Cheong” i woniwa kota xikombiso xa nhanyana wo pinyama.

Ka votala, a mawonela yaku a munhu wo kota loye i wa taswa tilweni ntsena hi kota ya lezi a nga kala a nga hi muKristu a bapatizilweko, ma woneka na ma bihile, hambu kuva xiruko. A matimu lawo ma alakanyelwa ku ngha ma mahekile na mahungu ya xungetano hi Kristu ma nga se chikela doropeni ga nhanyana loyi.

A mahungu lawo ma wa patsa ni mabhulo yo kari ma mahilweko ni mufundisa. I lo wutisiwa lezaku xana lava va fako na va nga gonzangi nchumu ha Jesu va konelwa kuya nzilweni wu nga timekiko ke. I te yini? I te ngalo: “A hi zi tivi. Kanilezi hi nga ha wula lezaku za fanela ku ngha ku hi ni lulamiselo go kari ga Nungungulu [ka vanhu lavo].“

LEXI XI LAVEKAKO KASI KUHANYISWA

A bhuku The New Catholic Encyclopedia (Ensiklopedia Giswa ga Katolika) gi ngalo: ‘A ku bapatizwa ka laveka kasi ku hanyiswa. Hi laha Jesu wutsumbu a wulileko ha kona, loku munhu a nga belekiwi hi mati ni Moya wa kubasa, a nga na ku enghena mufunweni wa Nungungulu. (Johani 3:5).’ Hi kota ya lezo, a vokari va kholwa lezaku lava va fako na va nga bapatizwangi va hoxiwa nzilweni wu nga timekiko kutani ku xaniseka hi ndlela yo kari anzhako ka kufa.

Hambulezo, ku na ni vanwani vo tala, lava va wonako lezo kota mhaka yi nga zwaliko. A timiliyoni ta vanhu ti file na ti nga tivangi Biblia. Xana va fanelwa hi xanisa ya pinzukelwa? Gi le yini a Biblia hi mhaka leyi?

XITSUMBISO XA LOMU KA BIBLIA

A Biblia gi zi veka laha kubaseni lezaku Nungungulu wa khatala hi lava va hanyileko na va nga tivi zileletelo zakwe. A bhuku ga Mitiro 17:30 ga hi tiyisa: “Nungungulu i lo hunisela zikhati za kungativi.” Makunu zini lezi a Biblia gi zi tsumbisako hi lava va fileko na va nga kumangi lungelo ga ku gonza zo kari ha Nungungulu?

A hlamulo hi nga wu kuma ka lezi Jesu a byelileko a xinwe xa zigevenga lezi zi fileko kusuhani kakwe. A wanuna loye aku ka Jesu: “Nzi alakanye loku u chikele mufunweni wa wena.” Wuve wihi hlamulo wa Jesu? “Hizinene nziku ka wena nyamutlha, u tava na mina Paradiseni.” — Luka 23:39-43, Tradução do Novo Mundo.

Xana Jesu i wa tsumbisa lezaku a wanuna loye i wa taya tilweni? Ahihi. A wanuna loye i wa nga se ‘belekiwa luswa’ hi mati ni moya, ku nga xilaveko xo sangula kasi ku enghena mufunweni wa tilo. (Johani 3:3-6) A kuhambana ni lezo, Jesu i wa tsumbisa lezaku a xigevenga lexo xi wa ta tlhela xi hanya, Paradiseni. Hi kota ya kuva muJuda, kuzilava a wanuna loye i wa gi tiva khwatsi a Paradise ga laha misaveni — ku nga simu ga Edeni — gi tlhamuselwako ka bhuku go sangula ga Biblia. (Genesisi 2:8) A xitsumbiso xa Jesu xi mu nyikile a kutsumba ko tiya ka ku vuka hi ka vafileko Paradiseni, a xikhati lexi gi to tlhela giva kona laha misaveni.

Hi lisine, a Biblia gi tsumbisa “a kuvuka ka valulamileko ni va nga lulamangiko.” (Mitiro 24:15) A “va nga lulamangiko” hi lava va nga kala ku tiva matshinya ya milayo yo lulama ya Nungungulu hakuva va wa nga tivi kuranza ka Nungungulu. Jesu i ta vuxa a xigevenga xi nga lulamangiko, lexi xi wulawulileko naye, zinwe ni timiliyoni, kuzilava hambu tibiliyoni ta vanwani ti fileko na ti nga tivangi Nungungulu. Zonake, Paradiseni laha misaveni, va ta gonziswa a zileletelo za Nungungulu, niku va tava ni lungelo ga ku komba lezaku va mu ranza Nungungulu hi ku ingisa zileletelo zakwe.

KUVUXIWA KA VA NGA LULAMANGIKO HI KA VAFILEKO

Xana a xikhati lexi a va nga lulamangiko va to vuxiwa hi ka vafileko, va ta lamulwa maringano ni mitiro yabye ya kale? Ahihi. A bhuku ga Va Le Roma 6:7 gi ngalo: “Hakuva loyi a fileko i tirulwe kuonheni.” A va nga lulamangiko va tava va hakhele zionho zabye hi kufa. Hikwalaho, va ta lamulwa maringano ni lezi va mahako anzhako ka kuva va vukile hi ka vafileko, na ku nga hi lezi va mahileko na va nga sefa. Va ta vunekisa kuyini?

Anzhako ka ku vuka hi ka vafileko, a va nga lulamangiko va tava ni lungelo ga ku gonza milayo ya Nungungulu, leyi yi to woneka a xikhati lexi a bhuku go fananisa gi to vululwa. Zonake va ta lamulwa hi kuya hi “mitiro yabye,” hi ku hlayisa milayo ya Nungungulu kutani ku yi ala. (Kuvululelwa 20:12, 13) Ka va nga lulamangiko vo tala, legi gi tava lungelo go sangula ka vona , na ku nga hi ga wumbiri, ga ku kuma wutomi ga pinzukelwa laha misaveni hi ku gonza ni ku maha kuranza ka Nungungulu.

A gonzo leyi ya Biblia yi vuna vanhu vo tala lezaku va tiyisa kukholwa kabye ka Nungungulu. A munwe wabye hi Yeong Sug. I wundlilwe kota muKatolika wo hiseka. A ziro za ngango wakwe zi wa hi vapristi. Na a tsumba lezaku i tava freira, i lo nghena ka xikola xa vafreira. Anzhako ka xikhati, i lo xi tsika hi kota yo khunguvanyiswa hi lezi a nga zi wona na zi maheka laho. A xa hombe, hi lezaku i wa nga ta vumela a gonzo ya kuswa tilweni hakuva ka yena a kuxanisa vanhu tiveni ga nzilo zi wa nga tava za liranzo ne ni kutsongwani.

Zonake, a Mboni yo kari ya Jehova yi lo mu komba a magezu lawa lomu ka Biblia: “A vahanyako va zi tiva lezaku va tafa, kanilezi a vafileko a va tivi nchumu, ge, kuva ni nchachazelo, hakuva a va ha alakanyiwi.” (Mutshawuteli 9:5) A Timboni ti mu vunile ku tiva lezaku a vakokwani vakwe a va lomu ka kuswa hi nzilo le tilweni. A kuhambana ni lezo, va lomu ko etlela kufeni, na va rinzela ku vuxiwa hi ka vafileko.

Hi ku tiva lezaku a vanhu vo tala a va se tshuka vazwa lisine la lomu ka Biblia, Yeong Sug i lo ingisa magezu ya Jesu ma nga ka Mateu 24:14. Me ngalo: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” Zalezi i hlengela ntirweni wo xumayela mahungu yo saseka hi ku bhulela vanwani a kutsumba kakwe ko saseka ku seketelwako lomu ka Biblia.

‘NUNGUNGULU A NGA NA XIHLAWULELA’

A Biblia gi ngalo: “Nungungulu a nga . . . na xihlawulela; kanilezi ka tixaka tontlhe loyi a mu chavako, ni ku maha kululama, wa amukeleka ka yena.” (Mitiro 10:34, 35) Loko kululama ko mbhelela loku hontlheni hi nga ku rinzelako ka Nungungulu, loyi a ranzako “kululama ni nongameto.” — Tisimu 33:5.