A lisine la Biblia li hlamulile a ziwutiso za mina zontlhe

KALE KA MINA: Nzi pswalelwe le Baku, Azerbaijão.

Hi pswalilwe na hi hi vambiri, hi mina nzisana. A papai wa mina i wa hi muMwinyi a mamani wa mina i wa hi muJuda. A vapswali va mina va wa ranzana niku va wa nga tsiki wukhongeli gabye gi va hambanyisa. Mamani i wa vunetela papai xikhatini xa ku jejuara (ku ngagi zakuga hi masiku yo kari) ka hweti ya ramadani, niku papai yenawu i wa vunetela mamani ka xikhati lexi va nga maha Pasika. Laha kaya hi wa hi ni Alcorão, ni Tora (ntlhanu wa mabhuku yo sangula ya Biblia) ni Biblia gontlhe.

Nzi wa ti wona na nzi hi muMwinyi. Hambu lezi nzi nga kala nzi nga kaneti lezaku Nungungulu i kona, ku wa hi ni ziwutiso zo kari zi nga nzi karata. Nzi wa lava ku tiva lezi: ‘Hikuyini Nungungulu a vangileko vanhu, niku zi wa tava ni bhinzu muni lezaku munhu a xaniseka wutomini gontlhe a gumesa a yaswa tilweni ke?’ Kota lezi a vanhu vo tala va nge ni xihi lexi xi mahekako kuranza ka Nungungulu, nzi wa ti wutisa ku: ‘Xana Nungungulu i va vangela zikarato a vanhu zonake a xalala hi ku tshama a va cuwukisela na va xaniseka?’

Laha nzi nga hi ni 12 wa malembe, nzi lo sangula ku maha namaz ku nga mukhuwo wa vaMwinyi wa ku maha ntlhanu wa mikhongelo hi siku. Ka xikhati lexo, papai i lo rumela mina ni makabye wa mina wa nhonzo lezaku hi ya gonza ka xikola xa vaJuda. Lezi hi nga gonzisiwa zi wa patsa mikhuwo ya Tora ni lirimi la xiHeberu. Na hi nga se sangula ku gonza, siku ni siku hi wa fanele ku ranga hi ku maha mikhongelo hi kuya hi mukhuwo wa xiJuda. Hikwalaho, ni mixo, nzi wa maha namaz le kaya, zonake hi xikhati xinwani nzeni ka siku nzi wa maha mikhongelo ya xiJuda xikoleni.

Nzi wa xuva nguvu a ku kuma mihlamulo yo zwisiseka ya ziwutiso za mina. Hi kuphindaphinda nzi lo maha ziwutiso lezi ka varabi le xikoleni: “Hikuyini Nungungulu a vangileko vanhu? Xana Nungungulu i mu wonisa kuyini a papai wa mina wa muMwinyi? Munhu wa mu nene, makunu hikuyini a woniwako kota loyi a nga hlazekangiko? Hikuyini Nungungulu a mu vangileko?” A mihlamulo yi tsongwani leyi nzi yi kumileko yi wa nga zwisiseki niku yi wa nga ringani ku yi kholwa.

LEZI A BIBLIA GI NGA CICISA ZONA A WUTOMI GA MINA:

Hi 2002 a kukholwa ka mina ku lo mbhela ntamu. Laha hi nga hi ni viki ntsena na hi rurile hiya Alemanha, papai i lofa reve zonake a titivala. Nzi wa kari nzi khongela hi malembe yo tala lezaku a ngango wa hina wu hanya khwatsi. Na nzi tsumba lezaku Nungungulu wa Ntamu-wontlhe hi yena yece a nga ni ntamu wa ku nyika wutomi ni ku hlula kufa, nzi lo khongelela a wutomi ga papai wa mina siku ni siku. Nzi wa alakanya lezi: ‘Nungungulu za mu olovela nguvu a ku tatisa kuxuva ka mbilu ya nhanyana wa mu tsongwani wo kota mina.’ Nzi wa tiyiseka lezaku i ta ingisa zikombelo za mina. Kanilezi, papai i lofa.

A kuva Nungungulu a wonekisa ku khwatsi a nga khatali zi lo nzi hlamalisa zi tlhela zi nzi mbheta ntamu. Nzi lo alakanya lezaku ‘kuzilava nzo maha mukhongelo hi ndlela ya hava, kutani ku Nungungulu a nga kona.’ Nzi lo mbhela ntamu laha ka kuza nzi nga ha zi koti a ku maha kambe a mukhongelo wa namaz. A tichechi tinwani nzi wa nga ti woni kota nchumu, hikwalaho nzi lo ti byela lezaku Nungungulu a nga kona.

Loku ku hunzile a ntlhanu wa tihweti ni yinwe, ku lota a Timboni ta Jehova laha kaya. Kota lezi a wuKristu hi nga kala hi ga gi nyiki nguvu lisima, mina ni makabye wa mina hi wa lava ku va komba hi wunene lezaku va wa kholwa zilo zo kala zi nga hi zona. Hi lo va wutisa lezi: “Hikuyini a maKristu ma khozelako Jesu, ni xihambano, na Maria, ni zifananiso zinwani kuveni lezo zi lwisana ni Milayo ya Khume ke?” A Timboni ti lo hi komba ti tlhela ti hi tiyisekisa hi ku tirisa a Biblia lezaku a maKristu ya lisine ma beletelwa a ku khozela zifananiso niku a mikombelo ya hina yi fanele ku yisiwa ka Nungungulu ntsena. Lezo zi lo nzi hlamalisa nguvu.

Hi lo engeta hi va wutisa a ku: “Ahati a gonzo ya lezaku Nungungulu vanhu vanharu laha ka kunwe ke? Loku Jesu a hi Nungungulu, makunu zi mahisile kuyini a ku a ta hanya laha misaveni a tlhela a dawa hi vanhu ke?” Ka khati legi kambe, va lo hlamula hi ku tirisa a Biblia, zonake va tlhamusela lezaku Jesu a hi Nungungulu ne a nga fani Naye. A Timboni ti lo tlhamusela lezaku tona a ti kholwi ka gonzo leyi hi kota ya lezo. Nzi lo hlamala nguvu zonake nzi pimisa lezi: ‘Lawa hakunene maKristu ma nga tolovelekangiko.’

Hambu zi hi tano, nzi wa ha lava ku tiva a ku hikuyini a vanhu va fako niku hikuyini Nungungulu a tsikako kuxaniseka kuva kona. A Timboni ti lo nzi komba a bhuku, Conhecimento Que Conduz à Vida Eterna,a gi nga hi ni zipimo zi nga hlamula khwatsi a ziwutiso za mina. Va lo tekela ku sangula ku gonza a Biblia na mina.

Ka xigonzo xinwe ni xinwani, nzi wa kuma mihlamulo yo zwisiseka ya ziwutiso za mina — lomu ka Biblia. Nzi lo tiva lezaku a vito ga Nungungulu hi Jehova. (Tisimu 83:18) A tshamela gakwe ga tshinya liranzo. (1 Johani 4:8) I vangile vanhu hakuva i wa nga lavi ku hanya yece. I wa lava ku ti buza hi wutomi ni vanwani. Nzi lo tiva kambe lezaku hambu lezi a tsikako kuxaniseka kuva kona, yena wa ku venga niku lokuloku i ta ku fuvisela magumo. Nzi tlhelile nzi tiva lezaku a kuhluwuka ka Adamu na Eva hi kona ku va onhileko nguvu a vanhu. (Va Le Roma 5:12) A wunwe wa mihanzu ya kona yo bava, ku felwa hi munhu u mu ranzako, wo fana ni papai wa mina. Hambulezo, Nungungulu i ta lulamisa a tiphanja leto misaveni yiswa le’yi tako, lomu ku to vuxiwa a vafileko. — Mitiro 24:15.

A lisine la Biblia li hlamulile a ziwutiso za mina zontlhe. Nzi lo tlhela nzi sangula kambe a ku kholwa ka Nungungulu. Laha nzi ngaya nzi ti tiva khwatsi a Timboni ta Jehova, nzi lo wona lezaku va na ni kuzwanana ka hombe misaveni yontlhe kota vamakabye. A kuzwanana ni ku ranzana ka tona zi lo nzi khumba nguvu. (Johani 13:34, 35) Lezi nzi nga gonza xungetano hi Jehova zi lo nzi kuca ku lava ku mu tirela, hikwalaho nzi lo ti mahela xiboho xa kuva Mboni ya Jehova. Zonake nzi bapatizwa hi 8 ka Janeiro wa 2005.

LEZI NZI NGA VUNEKISA ZONA:

A kuzwisiseka ka Biblia ku cicile wutomi ga mina giva gi nene. A mitlhamuselo yo tsumbeka leyi nzi yi kumileko lomu ka Mhaka ya Nungungulu yi nzi nehele litsako la hombe. Nzi kumile a kutsaka ka hombe ni ku chavelelwa hi kutsumba ka ku tlhela nzi wona a papai wa mina kuvukeni ka vafileko loku ku tsumbisiwako hi Mhaka ya Nungungulu. — Johani 5:28, 29.

Nzi na ni ntlhanu wa malembe ni ginwe na nzi hanya hi kutsaka na Jonathan, a nuna wa mina wo chava Nungungulu. Hi gonzile lezaku a lisine xungetano hi Nungungulu la zwisiseka, a li karati niku i tshomba ya lisima nguvu. Hi xigelo lexo hi tsakako nguvu hi ku bhula ni vanwani xungetano hi lezi hi zi kholwako ni zilo zo saseka lezi hi zi rinzelako xikhatini xi tako. Inyamutlha nza zi tiva lezaku a Timboni ta Jehova a hi vanhu va nga “tolovelekangiko,” kanilezi maKristu ya lisine.