Tirela Jehova ‘masikwini ya kubiha’

ERNSTO,a a nga kwalomo ka 70 wa malembe, i wula lezi hi kuketa: “A zikarato za mina za lihanyo ziya zi engetela ku nzi colopetela.” Xana lezo za ku humelelawo? Loku u kari u khosahala, na u wona a lihanyo la wena ni ntamu na zi hunguka, u nga ha vumelelana ni magezu ma nga ka Mutshawuteli xipimo 12. Ka vesi 1, a masiku ya wukhosana ma vitaniwa lezaku “masiku ya kubiha,” kutani ya zikarato. Hambulezo, a wu konelwangi ku hanya hlomulweni. U nga simama u hanya wutomi go tsakisa, na u tirela Jehova hi kutsaka.

SIMAMA KUVA NI KUKHOLWA KO TIYA

Nwina vamakabye vo ranzeka mu khosaheleko a hi nwina nwece mu kumanako ni zikarato lezi. A malanza ya Jehova yo khosahala ya zikhatini za kutsaliwa ka Biblia wonawu ma kumene ni zikarato zo fana ni lezo. Hi xikombiso, Isaka, na Jakobe, na Ahija va wa nga ha woni. (Gen. 27:1; 48:10; 1 Tih. 14:4) Hosi Davida i wa “ngazwi kukufumela.” (1 Tih. 1:1) Barzillai, a nga hi munhu wo ganya, i wa nga hazwi kunanziha ka zakuga kutani a pfumawulo wa wucenje. (2 Sam. 19:32-35) Abrahama na Naomi va felwe hi munghana wa wukati hi wumbiri gabye. — Gen. 23:1, 2; Rute 1:3, 12.

Xini xi nga va vuna ku simama va tsumbekile ka Jehova va tlhela va nga luzi litsako ke? Wukhosaneni gakwe, Abrahama hi ku kholwa a zitsumbiso za Nungungulu “i lo tiyiswa kukholweni” (Rom. 4:19, 20) Hinawu hi fanele kuva ni kukholwa ko tiya. A kukholwa loko a ku khegeli ka tanga ya hina, wuzikoti, kutani ziyimo. Hi xikombiso, hambu xikhati lexi a nga mbhelile ntamu, a nga ha woni, na a nga zi koti ku vuka laha mubhedini, Jakobe i lo kombisa kukholwa ka hombe hi zitsumbiso za Nungungulu. (Gen. 48:1-4, 10; Maheb. 11:21) Nyamutlha, Ines wa 93 wa malembe i xaniswa hi mababyi ya ku mu mbheta ntamu lomu nyameni, hambulezo i ngalo: “Siku ni siku nzi ti wona na nzi chachazelwe hi Jehova. Siku ni siku nzi ehleketa hi Paradise. Lezo zi nzi nyika kutsumba.” Hi nga wona a moya lowo wa wu nene!

Hi tiyisa a kukholwa ka hina hi kukhongela, ku gonza a Mhaka ya Nungungulu, ni kuya mitlhanganweni ya wuKristu. Laha a nga khosahele, muprofeti Danieli i wa khongela kunharu hi siku niku i lo simama ku gonza a Mhaka ya Nungungulu. (Dan. 6:10; 9:2) Ana, loyi a nga khosahele tlhelo noni, “i wa nga suki le tempeleni.” (Luka 2:36, 37) Loku uya mitlhanganweni wontlhe masiku u zi kotako u tlhela u hlamula hi laha u zi kotako hi kona, u kuma ntamu u tlhela u nyika ntamu vontlhe va nga kona. Niku Jehova xontlhe xikhati wa tsaka hi mikhongelo ya wena, hambu loku zi hi zi tsongwani u zi kotako ku maha. — Mav. 15:8.

A kutala ka nwina vamakabye vo tsumbeka mu tsakela kuva ni mahlo yo wona ku lera ni kuva ni ntamu wa kuta mitlhanganweni, kanilezi ziya zi engetela ku mu karatela, hambu ku nga koteki. Mu ta ku yini? Tirisani khwatsi lezi ma ha hiko nazo. A votala va kalako va nga zi koti kuya mitlhanganweni va yi ingisela hi telefone. Hambu lezi a kalako a nga ha woni khwatsi, Inge wa 79 wa malembe i vuxeta mitlhangano hi ku tirisa maphepha yo gandliwa hi komputadori ma nga ni maletela ya hombe lawa a longiselelweko hi makabye wo kari lomu bandleni.

Kuzilava u na ni nchumu lowu a vanwani va wu vumalako — xi nga xikhati. Hikuyini u nga xi tirisiko kasi ku ingisela Biblia ni mabhuku yo thepiwa, tikanelo, ni tidrama ke? Ahandle ka lezo, u nga ha fonela makholwa-kuloni kasi ku ma avela xinyikiwo xo kari xa moya ni ku tiyisana. — Rom. 1:11, 12.

SIMAMA KU HISEKA NTIRWENI WA NUNGUNGULU

Christa, a nga kwalomo ka 85 wa malembe, i keta aku: “Za bayisa loku u nga zi koti ku hiseka a ku fana ni kale.” Makunu, lava va khosaheleko va nga zi kotisa kuyini ku simama va tsakile? Peter wa 75 wa malembe i ngalo: “Hi kuva ni mawonela ma nene, u nga tshami hi ku alakanyela lezi u kalako u nga ha zi koti ku maha, kanilezi u ti buza hi lezi u zi kotako.”

Xana u nga ehleketa hi tindlela to kari ta ku nyika wukustumunyu leti ta ha hiko ntanwini wa wena? Heidi a nga ha zi koti ku famba hi muti ni muti a ku fana ni kale. Malembeni yakwe ya 80, i lo gonza ku tirisa komputadori kasi ku tsala mapapilo. A vahuweleli vo kari va khosaheleko va sangula mabhulo ya Biblia na va tshamile ka parki yo kari kutani laha ku khilelwako mimova. Kutani loku zalezi u hanya ka muti wa kuhlayisa zikhosana, xana u nga ti mahela “xipanze” xa wena xa simu hi vanhu lava va ku hlayisako ni lava u hanyako navo ke?

Ka malembe yakwe yo gumesa, Hosi Davida i lo vuvumisa nguvu a wukhozeli ga lisine. I lo humesa mali a tlhela a nyika xivuno mayelano ni kuakiwa ka tempeli. (1 Kro. 28:11–29:5) Wenawu u nga kombisa kukhatala hi lezi zi mahiwako ntirweni wa Mufumo misaveni yontlhe. Hikuyini u nga seketeliko a maphayona kutani vahuweleli vanwani vo hiseka bandleni ga wena hi magezu yo tiyisa hlana, zinyikiwo zi tsongwani, kutani zinambureti basi? Mikhongelweni ya wena, u nga ha patsa a vaswa ni mingango, malanza ya xikhati xontlhe, vababyi, ni lava va nga ni wutihlamuleli go binza.

Nwina ni ntiro wa nwina ma nyikwa nguvu lisima. A Dadani wa hina wa le tilweni a nga ta tshuka a mu hoxa nwina mu khosaheleko. (Tis. 71:9) Jehova wa mu ranza ni ku mu nyika lisima. Lokuloku hontlheni hi ta kula hi malembe na hi nga ha keti hi nchumu. Wutshanwini ga lezo, hi ta simama ku tirela Nungungulu wa hina wa liranzo Jehova kala kupinzuka na hi hi ni ntamu wa hina wontlhe ni lihanyo lo mbhelela!