HLOKO YA MHAKA YA KAPA | U NGA ZWISISA A BIBLIA
Hikuyini u faneleko ku zwisisa a Biblia?
“A Biblia i bhuku ga wukhongeli niku ga tiveka nguvu. Kanilezi, a gi tolovelekangi xikari ka maChina niku a gi na lisima kabye.” — LIN, CHINA.
“Hambu mabhuku yo basa ya wukhongeli ga hina vaHindu a nzi ma zwisisi. Makunu zi wa ta kuyini hi Biblia go Basa?” — AMIT, INDIA.
“A Biblia nza gi nyika nguvu xichawo kota bhuku ga kale niku nzizwa ku i bhuku gi xavisiwako nguvu. Kanilezi a nzi se tshuka nzi gi wona.” — YUMIKO, JAPÃO.
A vanhu vo tala misaveni yontlhe va gi nyika nguvu lisima a Biblia. Hambulezo, kuzilava vo tiva zitsongwani hambu ku nga tivi nchumu hi mahungu ya gona. Lezo zi tano ka timiliyoni ta vanhu va hanyako le Asia, kanilezi hambu ni ka vanhu vo tala lomu a Biblia gi hangalakileko nguvu.
Hambulezo, u nga ha ti wutisa lezi: ‘Hikuyini nzi faneleko ku ti karatela ku zwisisa a Biblia?’ A ku zwisisa lezi a bhuku legi go basa gi zi wulako, zi nga ku vuna ku maha lezi zi lanzelako:
Ku kuma litsako
Ku lwisana ni zikarato za ngango
Ku lwisana ni kukarateka
Ku zwanana ni vanwani
Ku tirisa mali hi ndlela yi nene
Wona xikombiso xa Yoshiko wa le Japão. I wa nga zi tivi a ku a Biblia gi wulawula hi yini, hikwalaho i lo boha ku gi gonza. Give gihi wuyelo? I bika lawa: “A Biblia gi nzi vunile ku tiva lexi nzi hanyelako xona ni ku rinzela za zi nene xikhatini xi tako,” a engeta aku: “Zezi nza xi tiva lexi nzi hanyelako xona.” Amit a kumbukilweko kusanguleni ka nzima leyi, i lo ti yimisela ku kambisisa a Biblia ha yece. I ngalo: “Nzi lo hlamaliswa. Lomu ka Biblia ku na ni mahungu ma vunako ka vanhu vontlhe.”
A Biblia gi khumba a wutomi ga timiliyoni ta vanhu. A hi chukwana ku wenawu u gi kambisisa ha wece u wona lezi gi nga ku vunisako zona?