Ngha Uva Muvuneteli Mu Nene Ntirweni Wa Simu
1. Mabhinzu muni hi ma kumako hi ku tira ni munhu munwani wutirelini?
1 Ka khati go kari, Jesu i lo rumela a 70 wa vapizani lezaku vaya xumayela, zonake a “va ruma ha vambiri vambiri.” (Luka 10:1) Handle ko kanakana a mahela lego gi vumelele a vapizani vakwe lezaku va vunana ni ku tiyisana a xikhati lexi va nga kari va xumayela. A xikhati lexi hi tirako zinwe ni muhuweleli munwani wutirelini, xana hi nga mu vunisa kuyini?
2. A xikhati lexi a munghana wa hina a xumayelako, hi fanele a ku ingiselisa kuyini niku hikuyini?
2 Hi Ku Ingisela: Ingisela khwatsi a xikhati lexi a munghana wa wena a xumayelako. (Jak. 1:19) Loku ku gonziwa mutsalo, lanzela lomu ka Biblia ga wena. Cuwuka loyi a wulawulako, kani munghana wa wena kutani nwinyi wa muti. Loku u demba khwatsi ndleve ka bhulo, lezo zi nga ha kuca a nwinyi wa muti a ku mahawo zalezo.
3. Hi rini laha a munghana wa hina a nga ha tsakelako a kuva hi mu seketela?
3 Hi Ku Tiva A Xikhati Xo Wulawula: A xikhati lexi a munghana wa hina a xumayelako, ha mu kombisa xichawo hi ku mu vumelela a ku rangela a bhulo. (Rom. 12:10) Hi fanele ku potsa a ku mu colopetela. Loku yena a rivala lezi a faneleko ku wula kutani loku a nwinyi wa muti a nga vumeli xo kari kutani ku maha xiwutiso zonake a munghana wa hina a kombela ku vuniwa, hi ti karatela a ku tlhatekela ka magezu ya munghana wa hina wutshanwini ga ku sangula a mhaka yinwani. (Mav. 16:23; Mutsh. 3:1, 7) Loku hi wulawula, a magezu ya hina ma fanele ku seketela a wukustumunyu legi gi nyikiwako. — 1 Kor. 14:8.
4. Zini zi to hi nyika litsako ni kuhumelela wutirelini?
4 A xikhati lexi a 35 wa mipatswa ya vapizani va nga mbheta a ku xumayela, “va lo wuya hi kutsaka.” (Luka 10:17) Hinawu hi tava ni litsako hi tlhela hi humelela wutirelini loku hi ingisela ni ku tiva a xikhati xa ku wulawula loku hi lava a ku vuna a munghana wa hina ntirweni wa simu.