Tirisa xingheniso xi vuxako kutsakela
1. Hi gonza yini ka zingheniso zo hambanahambana za maKristu yo sangula?
1 A maKristu yo sangula ma xumayele mahungu yo saseka ka vanhu va midawuko ni wukhongeli go hambanahambana. (Kol. 1:23) Hambu lezi va nga xumayela mahungu yalawa ya manwe — wu nga Mufumo wa Nungungulu — a zingheniso zi wa cicacica maringano ni vanhu lava va nga va xumayela. Hi xikombiso, a xikhati lexi Pedro a nga wulawula ni vaJuda lava va nga kombisa xichawo xo eta hi Mitsalo, i lo sangula hi ku tshaha magezu ya muprofeti Joeli. (Miti. 2:14-17) Kanilezi, wona lezi Paule a nga bhulisanisa zona ni vaGreki, kota lezi zi tsalilweko ka Mitiro 17:22-31. Inyamutlha, ku na ni matshamu lawa a vanhu va kombisako xichawo hi Mitsalo. Ka matshamu lawo, hi nga tirisa Biblia na hi tlhatlhekile a xikhati lexi hi xumayelako hi muti ni muti. Kanilezi, loku hi wulawula ni vanhu lava va nga khataliko hi Biblia kutani hi wukhongeli, kutani lava va lumbako wukhongeli gi nga hiko ga wuKristu, ku nga ha laveka lezaku hi tirisa wutlhari.
2. Hi nga ma tirisisa kuyini mabhuku ya hina kasi ku vuna lava va kombisako ni lava va na kombisiko xichawo hi Biblia?
2 Tirisa khwatsi a mabhuku lawa ma nyikelwako: Ka lembe legi ga ntiro, a mabhuku lawa hi nyikelako ma ta cica loku ku hunza tihweti timbiri, niku hi ta nyikela nguvu a marevista, ziphephana, ni mabroxura. Hambu loku a kutala ka vanhu lomu xipanzeni xa hina va nga khatali hi Biblia, a hi ti karateleni ku wulawula hi mhaka yo kari yi va tsakisako yi nga ka mabhuku ya hina. Za koteka ku hi nga gonzi gonzi mutsalo kutani ku kumbuka a Biblia ka lienzo lo sangula, kanilezi loku a munhu loye a kombisile kutsakela, hi nga ha tlhela na hi hi ni kungo ga ku mu vuna a ku kholwa ka Muvangi ni ka Mhaka yakwe yi pimisilweko. Kanilezi, loku hi xumayela xipanzeni lexi a vanhu va nyikako lisima a Biblia, hi nga tirisa a mabhuku ni xingheniso xi kombako xichawo lexo. Kunene, hi nga nyikela a bhuku A Biblia Gi Gonzisako kutani mabroxura Ingisa Nungungulu ni Ingisa Nungungulu Kasi U Hanya Kala Kupinzuka ni ka xihi xikhati hambu loku ma nga hi wona mabhuku ma nyikelwako ka hweti leyo. A xa lisima ku tirisa xingheniso xi vuxako kutsakela.
3. Xana a timbilu ta vanhu lomu xipanzeni xa hina ti fana ni misava hi ndlela muni?
3 Longisela misava: A mbilu ya munhu yi fana nguvu ni misava. (Luka 8:15) A timbilu to kari ti fanele ku longiselwa nguvu kasi a timbewu ta lisine la Biblia ti kota ku zima mitsu ti tlhela ti kula. A vavangeli va zana ga malembe go sangula va lo byala ka tixaka tontlhe ta misava va tlhela va pfuna, niku lezo zi va nehele litsako la hombe. (Miti. 13:48, 52) Loku hinawu hi chela kota ka zingheniso za hina, hi ta bhinzula.