‘A misava yi humesile a mihandzu ya yona, Nungungulu, yena Nungungulu wa hina, i ta hi katekisa.’ — LISIMU 67:6

Ti buze hi makatekwa ya Muvangi wa hina kala kupindzuka

Nungungulu i tsumbisile Abrahama a ku i ta tirisa mun’we wa vana vakwe lezvaku a katekisa “matiko wontlhe ya misava”. (Genesisi 22:18) Ku wa tava mani a n’wana loye?

Kwalomo ka 2000 wa malembe ma hundzileko, ku wa hi na Jesu, loyi a tileko hi ka Abrahama. Makunu, Nungungulu i no mu nyika ntamu Jesu wa ku maha zvihlamaliso zva hombe. A zvihlamaliso lezvo zvi kombile lezvaku lezvi Nungungulu a nga tsumbisa Abrahama zvi wa ta tatiseka hi ku tirisa Jesu. — Va Le Galatiya 3:14.

A zvihlamaliso lezvi Jesu a zvi mahileko zvi kombile lezvaku hi yena a nga hlawuliwa hi Nungungulu kasi ku katekisa vanhu. Zvi tlhela zvi komba lezvi Nungungulu a to mu tirisisa zvona kasi ku katekisa vanhu kala kupindzuka. Wona lezvi a zvihlamaliso zva Jesu zvi kombisisako zvona a matshamela yakwe yo tsakisa:

Wunene — I gi kombisile hi ku hanyisa vababyi.

Ka khati go kari, a wanuna a nga hi ni hlokonho i no khongotela Jesu lezvaku a mu hanyisa. Jesu i no mu henya a gumesa aku: “Ndza zvi lava!” A wanuna loye i no tekela ku hanyiswa hi citshuketi. — Marku 1:40-42.

Wuhana — I gi kombisile hi ku gisa vanhu va nga hi ni ndlala.

Jesu i wa nga lavi lezvaku a vanhu va xoka hi ndlala. I mahile cihlamaliso kuga vanhu va talela ga cima va xura hi ku tirisa tipawa ti tsongwani ni tinjhanjhi ti tsongwani— lezvo a nga zvi mahangi khati gin’we. (Matewu 14:17-21; 15:32-38) Vontlhe va gile va xura ku tlhela ku sala zvakuga zvo tala nguvhu.

Ku zwela wusiwana — I zvi kombisile hi ku vhuxa vafileko.

A noni yo kari yi no felwa hi n’wana — yaloyi wa mun’we yi nga hi naye wutomini ga yona. Makunu Jesu i no vhuxa a n’wana loye hi ku mu “zwela wusiwana”. — Luka 7:12-15.

A VANHU VA TA TI BUZA HI MAKATEKWA LAHA MISAVENI KALA KUPINDZUKA

Jesu i sina a kombile lezvaku Nungungulu i na ni ntamu wa ku neha makatekwa ka vanhu vontlhe. A cikhati leci Jesu a to wuya zvezvanyana, kota lezvi a nga tsumbisa, Nungungulu wa Ntamu Wontlhe i ta mu nyika ntamu wa ku maha zvihlamaliso zva hombe nguvhu misaveni yontlhe!

Makunu a wutomi gi ta tshamisa kuyini laha misaveni a cikhati leci Nungungulu a to maha lezvi a nga tsumbisa Abrahama? Vontlhe lava va randzako Nungungulu ni ku mu kombisa cichavo, “va taga tshomba ya tiko” va tlhela va “xalaliswa hi kurula ka hombe”. (Lisimu 37:11) “Ku nga ta hava ni kufa, hambu ni hlomulo, kutani kurila, ni kubayisa”. — Kuvhululelwa 21:4.

Hi nga wona lezvi zvi to tsakisisa zvona a ku hanya hi kurula laha misaveni kala kupindzuka! Hikwalaho, ha ku kuca lezvaku u nghena ka www.jw.org/tsc, kasi u gondza zvin’wani xungetano hi makatekwa lawa a Mufumo wa Nungungulu wu to ma neha zvezvanyanya.